Pali 81
Soukohp Sosep Smith alehdiehr kaudiahl nan Hiram, Ohio, Mahs 15, 1832. Frederick G. Williams malipilipidahr pwe en wia samworo lapalap oh soun sawas emen nan Presendensi en Prihsduhd Lapalap. Nan poadoapoad en rekohd kan kasalehda me ni ansou me kaudiahl wet alahldi nan Mahs 1832, Jesse Gause malipilipida ong ohpis en sounkaweid ong Sosep Smith nan Presedensi. Ahpw, ni ansou me tepida pweiek nan ah pwukoah doadoahk wet, pwukoah wet uhd peieklahng Frederick G. Williams. Kaudiahlo (me wiawi Mahs 1832) anahne en doadoahk ong en wia ehu dake ong koasonepen pwihn en Presedensi Keieu, mehlel malipilip ong ohpis en sounkaweid nan pwukoahu oh en kawehwe uwen kesempwal en idihda wet. Brother Gause papahki uwen ahnsou kis ahpw mwuhr lekdeklahsang Mwomwohdiso nan Tihsempe 1832. Brother Williams ahpw uhd kasarawiahla ong pwukoahn ohpiso nan Mahs 18, 1833.
1–2, Kih kan en wehio kin ansou koaros mihmi rehn Presendensi Keieu; 3–7, Ma Frederick G. Williams loaloapwoat nan ah pwukoahn papah, e pahn ahneki mour soutuk.
1 Mehlel, mehlel, I mahsanihong uhk nei ladu Frederick G. Williams: Rong kepitien ihr me kin mahsenki, mahsen en Kauno ahmw Koht, oh rong mwahu malipilip me ke malipilipkidahr, iei samworo lapalap nan ei mwomwohdiso, oh sounkaweid ong nei ladu Sosep Smith, Jun.;
2 Me I ketkihongehr kih kan en wehio, me ansou koaros kin mihmi rehn Presedensi en Prihsduhd Lapalap:
3 Eri, mehlel I pohnese ih oh pahn kapaiada ih, oh pil kowe, ni ahmw pahn kin loaloapwoatieng kihda kaweid, nan ohpis me I idiadahnguhk, kapakap ansou koaros, ni ngihl oh nan mongiongomw, mwohn weipokon oh wasa rir, pil nan ahmw pwukoahn papah ong kalkalohngki rongamwahuo nan sapwen me momour kan, oh nanpwungen riomw kan.
4 Oh sang ni wia mepwukat ke pahn wia mehkot mwahu lap ong iengomw aramas akan, oh pahn kalaudehla sapwellime lingan iei Kauno ahmw kaun.
5 Eri, ahneki loaloapwoat; wia pwukoahn ohpis me I idiadahng uhk; sewese me luwet akan, sewesehda pehn irail me daulahr kan, oh kakehlakahda me pwukie luwetalahr kan.
6 Oh ma ke pahn loaloapwoat lao lel ni imwi ke pahn kamwaramwarikihdi mour poatoapoat, oh mour soutik nan tehnpas kan me I kaunopadahr nan tehnpas en Semeio.
7 Kilang, oh kilang mwahu, iei mepwukat me mahsen en Alpa oh Omeika, iei Sises Krais. Ahmen.