Irelaud 72
Sosep Smith alehdi kaudiahl nan Kirtland, Ohio, Tihsempe 4, 1831. Ekei elder kan oh toweh kan ahpw pokonpene pwe irail en kak kasukuhlki duwen arail pwukoah oh kapatahieng ale kalaudpen arail en wewehkihla mwahu padahk kan en Mwomwohdiso. Irelaud wet kapatapene kaudiahl siluh me alahldi nan rahn ehute. Ire tikitik 1 lel 8 kasalehda malipilip en Newel K. Whitney ni ah wia pisop men. Mwuhr e ahpw uhd malipilipda oh kasarawiala, mwurin ansou me ire tikitik 9 lel 23 alahldi, me audawudki iren kapatapat kan ong pwukoah kan en pisop. Mwurin mwo, ire tikitik 24 lel 26 ahpw kohieng, me kasalehda kaweid kan ong me pid duwen pokonpene me pahn wiawi Saion.
1–8, Elder kan en kiheng kisin likou en audepen doadoahk me irail kohwahki rehn pisop; 9–15, Pisop pahn apwalih wasahn nahk oh tehk me semwehmwe oh me anahne sawas; 16–26, Pisop kan me pahn kin kamanahla ma elder kan warohng.
1 Rong mwahu, oh rong kepitien Kauno, kumwail me pokonpenehr, me wia samworo lapalap akan en ei mwomwohdiso, irail kan me wehio oh manaman kohieng irail.
2 Pwe mehlel Kauno mahsaniher, e konehng ong ie ong pisop emen en idihda ong kumwail, de sang kumwail, ong mwomwohdiso nan sapwellimen Kauno mwetuwel wet.
3 Oh mehlel nan soahng wet kumwail wiahier sang ni loalokong, pwe anahnepe sang Kauno, sang ni pehn me kin kohwahki kan koaros, en kiheng kisin likou en audepen doadoahk me e kohwahki, nan ahnsou wet oh nan mour mwurin met.
4 Pwe mehmen me loaloapwoat oh loalokong nan ahnsou wet Kauno piladahr me e warohng en sohsohki tehnpas akan me kaunopadahr ong ih rehn Semeio.
5 Mehlel I mahsanihong kumwail, elder kan en ei mwomwohdiso nan wasa kiset nan ei mwetuwel en kihong kisin likou en audepen arail doadoahk me irail kohwahki rehn pisop, me I pahn pilada ong wasaht nan ei mwetuwelo.
6 Mepwukat pahn mih nan rekerd, pwe en kohieng pisop me mihmi Saion.
7 Oh pwukoahn pisop pahn sansal nan kosonned akan me Kauno ketkihong kumwail, oh sang ni arail usuhs en utuht.
8 Oh met, mehlel I mahsanihong kumwail, me nei ladu Newel K. Whitney me wia ohl me pahn idihda oh kasarawihla ong manaman wet. Met me wia kupwuren Kauno amwail Koht, amwail Soundor. Ihme pahn wiawi. Ahmen.
9 Mahsen en Kauno, me wia iren kapatapat ong kosonned me wiawidahro, me kasalehda pwukoah en pisop me kasarawialahr ong mwomwohdiso nan wasa kiset en mwetuwele, me iei mehlel met—
10 En apwalih sapwellimen Kauno wasahn nahk; en kin alehda mwohni kan en mwomwohdiso nan wasa kiset en mwetuwele;
11 En ale rekerd en doadoahk en elder kan me duwehte me kin wiawi mwowehu; oh sewesehkin irail arail anahn akan, me pahn pwain dahme irail ale, nin duwen me irail kak pwaihn;
12 Pwe met en pil wia tohnmetei ong kamwaupen mwomwohdiso, ong me semwehmwe oh anahne sawas.
13 Oh mehmen me sohte kak pwaihn, rekerd pahn wiawihda oh pekederlahng pisop en Saion, me pahn uhd pwaihnla pweipwando sang nan me Kauno pahn ketkihong nan pehrail kan.
14 Oh doadoahk en me loaloapwoat kan me kin doadoahngki madamadau en ngehno, nan doadoahk en kihla rongamwahuo oh audepeh kan en wehio ong mwomwohdiso, oh ong sampah, pahn pwainla pweipwand ong pisop en Saion;
15 Met e pweipweisang nan mwohni en mwomwohdiso, pwe sang ni kosonned me aramas koaros me kohdo Saion pahn anahne kihong pisop arail kopwe koaros.
16 Oh met, mehlel I mahsanihong kumwail, me elder koaros me wia kisehn mwetuwel wet pahn anahne en kiheng pisop en kisehn mwetuwel wet kisin likou me pahn kasalehda audepen doadoahk me e kohwahki.
17 Kisin likou en kamanaman sang sounkopwung de pisop me wia kisehn mwetuwel wet, ong pisop en Saion, pahn kiheng aramas koaros me warohng, oh kapwaiadahr soahng koaros, ong sohsoh, oh en alahlda en wia soun apwahpwalih oh wia tohn doadoahk loaloapwoat men;
18 Ma soh a pisop en Saion sohte pahn alehda ih.
19 Oh met, mehlel I mahsanihong kumwail, mweidohng elder koaros me pahn kihong audepen arail doadoahk kan rehn pisop en mwomwohdiso me wia kisehn mwetuwel wet en ale mweimwei sang kapokon en mwomwohdiso de kapokon kan en mwomwohdiso, wasa me irail doadoahk ie, pwe en kak kasalehda peihn ih oh audepen ah doadoahk kan me e warohng soahng koaros.
20 Oh pil, mweidohng nei ladu kan me pilipildahr en wia soun apwahpwalih ireh kan me kin pwarada ong audepen nting kan en ei mwomwohdiso me ahniki pwung ong sawas sang pisop de pisop kan nan soahng koaros—
21 Pwe kaudiahl kan en kak wiawihda ni nting, oh kohpehseng ni keihmw kan en sampah; pwe irail en pil kak alehdi mwohni doadoahk kan me pahn wia kamwahupen mwomwohdiso nan soahng koaros;
22 Pwe irail en pil kak kasalehda peihn irail me irail warohng soahng koaros, oh me irail wia soun apwahpwalih lelepek kei.
23 Oh met, kilang, e pahn wia karasaras ehu ong branch tohtoh kan en ei mwomwohdiso, ni sohte lipilipil wehi me irail pahn wiawihda ie. Oh met me wia keimwseklahn ei mahsen kan. Ahmen.
24 Ekei iren mahsen kapatapak kan ong kosonned akan en wehio, wauneki toweh kan en mwomwohdiso—irail kan me pilipildahr sang Ngehn Sarawio en kohdahla Saion, oh irail kan me ahneki paiamwahu en kohdahla Saion—
25 Mweidohng irail en wahla rehn pisop kisin likou en kamanaman sang elder silimen en mwomwohdiso, de ehu kisin likou en kamanaman sang pisop;
26 Ma sohte, a e pahn kohdahla nan sapwen Saion oh sohte pahn iang wia emen soun apwahpwalih lelepek men. Met e pil wia ehu karasaras. Ahmen.