Iralaud 56
Soukohp Sosep Smith alehdi kaudiahl, nan Kirtland, Ohio, Suhn 15, 1831. Kaudiahl wet kawehkihla Ezra Thayre pwehki eh sohte peihkiong kaudiahl ehu mwohweu (“kosonned” me sansal nan ire tikitik 8), me Sosep Smith alehda ong ih, kaweidkiheng Thayre duwen ah pwukoah kan nan mwaht en Frederick G. Williams, wasa e kin kouson ie. Kaudiahl kan me sansal pil kihsang mweimwei en Thayre’s pwukoah en iang Thomas B. Marsh seiloklahng Misori (tehk iralaud 52:22).
1–2, Souleng kan anahne en kapaihkada arail lohpwu oh idawehn Kauno en kak alehda komour; 3–13, Kauno kin ruwese oh kasohrehla, oh me kin sapeihk kan kin lekdekla; 14–17, Meid suwediong me kopwehpweh kan me sohte kin men sewese me semwehmweh kan, oh meid suwediong me semwehmweh kan me arail mongiong kan kin sohte pahtoula; 18–20, Meidpai me semwehmweh kan me ahniki mongiong mwakelekel, pwe irail pahn sohsohki sampah.
1 Rong mwahu, O kumwail aramas akan me kin kalohngki mwarei, amwail Kauno Koht me mahsanih met; pwe kilang, I kin engiengda pahn irail me kahngohdi kan, oh irail en ese me nin limei kan oh pwung en ai lingeringer, ni rahn en ketidou oh me kalokolok pahn wiawi ong wehi kan.
2 Oh mehmen me sohte pahn kapaihkada ah lohpwu oh idawehn ie, oh peihkiong ai kosonned akan, e sohte pahn iang komourla.
3 Kilang, Ngehi, Kauno, me ruwese; oh mehmen me sohte pahn peihkiong pahn lekdekla ni ahnsou me I kupwuriki, mwurin ai pahn ruwesehier oh kosonnedo olahr.
4 Eri Ngehi, Kauno, me kin ruwese oh kasohrehla, iei me mwahu ong ie; oh mepwukat koaros pahn kohieng irail me kahngohdi kan, Kauno me mahsanih met.
5 Eri, I kasohralahr kosonned me kohieng nei ladu Thomas B. Marsh oh Ezra Thayre, oh ketkihong kosonned kapw ong nei ladu Thomas, me en tapiada ah seilok kohla nan sapwen Misori ansou mwadang, oh nei ladu Selah J. Griffin pahn pil iangih ih.
6 Pwe kilang, I kasohrala kosonned me kohieng nei ladu Selah J. Griffin oh Newel Knight, pwehki sang ni keptakai en ai tungoal aramas akan me mihmi nan Thompson, oh arail kahngohdi kan.
7 Eri, mweidong nei ladu Newel Knight en mihmi rehrail; oh uwen tohto me men kohla ren kohla, me kin peihkiong ie, oh en kaweid iraillahng nan sahpw me I patohwan piladahro.
8 Oh pil, mehlel I ndahiong kumwail, me nei ladu Ezra Thayre anahne en koluhkihla ah pohnmwahso, oh liaktohrohr, oh en peihkiong kosonned en mwohweu me I ketkihong ih me pid duwen wasa me e kin kousonie.
9 Oh ma e pahn wia met, e sohte pahn mie wiawihdahn lopidih kan nan sahpwo, e pahn pilipildahte pwe en kohla nan wehin Misori.
10 Ma soh a e pahn ale sent me e pwaihnkihdiero, oh pahn kohkohsang wasahu, oh pahn lekdeklahsang nan ai mwomwohdiso, Kauno Koht wasa lapalap me ketin mahsanih met;
11 Oh mehndahte ma nanleng oh sampah pahn imwisekla, mahsen pwukat sohte pahn sohrala, ahpw pahn pweida.
12 Oh ma nei ladu Sosep Smith, Jun., anahne en pwaihn sento, kilang, Ngehi, Kauno, pahn pwaihnehng ih nan wehin Misori, pwe irailko me e pahn alehda pahn kak pwurehng ale ketingparail nin duwen me irail koadoahkehda.
13 Pwe nin duwen me irail koadoahkehda iei uwen me irail pahn ale, pil duwehte sapwen arail sohsoh kan.
14 Kilang, iei me Kauno ketin mahsaniong neis aramas akan—kumwail ahniki soahng tohto en wia oh koluhkihla; pwe kilang, dipemwail kan me kodohr pohi, oh e sohte pitsang, pwehki kumwail rapahki en ale kaweid sang ni pein amwail kehlki pein kumwail.
15 Oh amwail mongiong kan sohte itariki. Oh kumwail sohte peihkiong me mehlelo, ahpw ahniki inengin perepereniki wia mehkot sohte pwung.
16 Meidsuwediong aramas kopwehpweh kan, me sohte kin ehukieng amwail pai rehn me somwehmweh kan, pwe amwail kopwehpweh kan pahn kaweidsuwediala palingenemwail kan; oh met me pahn wia mwomwemwail ni rahn en ketidou, oh rahn en kadeihko, oh rahn en engiengkihda me pwung: Rahn en rahk imwseklahr, rahn en karakaro nekier, oh palingeniet sohte komourla!
17 Meidsuwediong kumwail aramas somwehmweh kan, me arail mongiong kan kin sohte ahniki pahtou, me palingenerail kan sohte kin peihk, oh me nan kapehderail kan sohte kin itarikihla dahme mie, oh me pehrail kan sohte kak uhdisang pirpirapa en ekei aramas kopwe, me pwoaren meserail kan direkihla noahrek, oh kumwail me sohte kin men doadoahngki pein pehmwail kan!
18 Ahpw meidpai irail me somwehmweh kan me ahniki mongiong mwakelekel, me arail mongiong kan kin ahniki pahtou, oh me ngenirail kan kin peihk, pwe irail pahn kilang wehin Koht ah pahn ketido ni manaman oh lingan lapalap pwehn kapitiraila; pwe soahng mwahu kan koaros en sampah iei arail.
19 Pwe kilang, Kauno pahn ketido, oh e pahn ketin wa pweinen doadoahk, oh e pahn ketin pwainehng emenemen aramas, oh me somwehmweh kan pahn pereperen;
20 Oh dihrail kan pahn sohsohki sampah sang ehu dih ong ehu dih, sang met oh pil kohkohlahte. Oh met me wia keimwseklahng ai koasoieng kumwail. Iei met me mehlel. Ahmen.