Iralaud 51
Soukohp Sosep Smith alehdi kaudiahl nan Thompson, Ohio, Mei 20, 1831. Nan ahnsou wet me Souleng kan seiseilokodohsang palimese en wehi kan tepida lellelpene nan Ohio, oh e konehng koasondi en koasoneiraildi en wiawi. Pwehki kemwekid wet anahne koasondihsang ohpis en pisop, Pisop Edward Partridge rapahki kaweid ong dahme pahn wiawi, oh Soukohpo ahpw keinemwe rehn Kauno.
1–8, Edward Partridge ahpw pilipilda pwehn kaweid koasondihn doadoahk kan oh dipisou kan; 9–12, Souleng kan mehlel pene oh epwelperail soahngetehieu; 13–15, Irail anahne en mie arail sdohwahn pisop wasahn nahk mwonge oh koasoanepen dipwisou en wiawi nin duwen kosonned en Kauno; 16–20, Ohio pahn wiahte wasahn keiru en lepin ahnsou.
1 Rong ie mwahu, Kauno amwail Koht ahpw mahsanih, oh I pahn koasoieng nei sounpapah Edward Partridge, oh kiheng ih kaweid kan; pwe udahn anahnepe en alehdi kaweid kan ong mwomwen eh pahn koasoanehdi aramas pwukat.
2 Pwe e udahn anahnepe me irail en koasonehdi nin duwen ai kosonned akan; pwe ma soh, irail pahn lekdekla.
3 Eri, mweidohng nei sounpapah Edward Partridge, oh irail kan me e piladahr, me I kupwurpereniki, en koasonehieng aramas pwukat arail koapweh kan, aramas emen pahn nehne ni pahrek nin duwen aramas depe nan eh peneinei, irair me eh mihmi loale, oh eh ineng oh anahn kesempwal kan.
4 Oh mweidohng nei sounpapah Edward Partridge, ni ansou me e pahn pilehng emen ohl ah kopweh kan, ntingihieng ni inting pwehn kak sansal me ih ah kopweh kan mwo, pwehn kak koledi, mehlel pwuhng wet oh sohso wet nan mwomwohdiso, lao e kawehla kosonned akan oh sohla warohng sang ni ngilen kosoandi en mwomwohdiso, nin duwen kosonned akan oh inou sarawi kan en mwomwohdiso, me mwomwohdiso ahniki.
5 Oh ma e pahn kawehla kosonned oh sohla warohng en wia towe en mwomwohdiso, e sohte pahn ahniki manaman en repenpwungih kopweh kan me tohnmeteikihong pisop ong me semwehmwe oh me anahne anahn en sawas en ai mwomwohdiso; eri, e sohte pahn koledi kisakiso, ahpw ihte me e kak repenpwung ong iei kopwe me ede nting powe me sansal nan kosonned.
6 Oh soahng koaros pahn sansal ni petehk mwahu, nin duwen kosonned akan en sahpw.
7 Oh mweidohng dahngeh kan me en aramas pwukat en kohiengete aramas pwukat.
8 Oh mwohni kan me luwehdi ong aramas pwukat—mweidohng en mie emen sounsawas ong aramas pwukat, pwehn ale mwohni en kak apwalihki mwonge oh likou, nin duwen ineng en anahn en aramas pwukat.
9 Oh mweidehng emen emen ohl en pein kasalehda ah mehlel, oh en kak duwehte aramas pwukat, oh alehdi nehne pahrek, pwe irail en kak wia ehu, me duwehte dahme I ndahiong uhk ken wia.
10 Oh dehr mweidohng dahme en aramas pwukat en wisiksang oh wisiklahng ehu ihmw sarawi.
11 Eri, ma ehu ihmw sarawi pahn alehdi mwohni sang ihmw sarawi wet, mweidohng irail en pil ehu pwainehngete ihmw sarawi wet nin duwen me irail pwungkipene;
12 Oh met pahn wiawi sang rehn pisopo de sounsawaso, me pahn pilipildahsang ni ngilen koasondi en mwomwohdiso.
13 Oh pil ehu, mweidohng pisopo en wiahda ehu wasahn nahk mwonge ong ihmw sarawi wet; oh mweidohng soahng koaros en mih ni weren mwohni oh mwonge, me pahn depelahsang ineng en anahn kan en aramas pwukat, oh mepwukat koaros pahn mih pahn epwelpen pisop.
14 Oh mweidohng en pil mie sawas wet ong pein ih ong dahme e anahne, oh ong anahn en ah peneinei, ni ah patohwan wia tohn doadoahk en pwukoah wet.
15 Oh met me I patohwan kamanahieng aramas pwukat arail ahnsou mwahu en koasoneiraildi nin duwen ai kosonned akan.
16 Oh I patohwan kasarawialahr sahpw wet ong irail ong ni lepin ansou kis, lao Ngehi, Kauno, pahn patohwan kaunopada ong irail, oh patohwanohng irail en mweselahsang wasaht;
17 Oh awao oh rahno saikinte kohieng irail, eri mweidohng irail en doadoahk pohn sahpw wet ki erein sounpar kei, oh met pahn kak pwurehng irail ong pein kamwauperail.
18 Kilang, met pahn wia mehn karasaras ong nei sounpapah Edward Partridge, nan wasa tei kan, ni ihmw sarawi teikan.
19 Oh mehmen me wia ladu men me pwoson, lelepek, oh tohn doadoahk loalokong men pahn iang alehdi kapai en sapwellimen Kauno popohl oh iang sohsohki mour soutuk.
20 Mehlel, I ndahiong kumwail, Ngehi me Sises Krais, me mwadang lelledo, nan awa me kumwail sasairiki. Iei ni mehlel. Ahmen.