1 Rong kepitieng Sises Krais, amwail Soundor, NGEHI IEI NGEHI me Lapalapo, me sapwellimanki kupwurkalahngan oh tomwkihla dipamwail kan;

2 Me pahn kihpene sapwellime aramas akan duwehte litok men eh kin kihpene nah pwurok kan pahn peh, iei nin duwen koaros me pahn rong ngileiet oh karakarahkiala pein irail mwohi, oh ekerie ni arail kapakapak kehlail.

3 Kilang, mehlel, mehlel, I ndahiong kumwail, me ansou wet I mahkohngehr dipamwail akan, eri kumwail alehdi mepwukat; ahpw tamataman dehr pwurehng wiahda dihp, pwe me suwed sang me de lelohng uhk.

4 Mehlel, I ndahionguhk me kumwail pilipilda sang nan sampah pwe kumwail en kalohngki ei rongamwahu sang ni ngihl en pereperen, rasohngete ngihl en sewi ehu.

5 Kumwail perenda nan mohngiongamwail kan oh pereperen, pwe I wie mihmi rehmwail, oh ngehi me wia sawasepemwail rehn Sahmo; oh iei kupwure en ketikihong kumwail wehio.

6 Oh, e ntingdier—Soang koaros me kumwail pahn peki ni pwoson, miniminkipene nan kapakap nin duwen ei mahsen, kumwail pahn alehdi.

7 Oh kumwail malipilipda pwe kumwail en kihpene nei aramas pilipilda kan; pwe nei aramas pilipilda kan kin rong ngileiet oh sohte kin kakeluwakahla mongiongarail kan;

8 Eri kalohk o ketidohsangehr rehn Sahmo me irail pahn kohpene wasa ehute pohn sahpwet, pwe en kaunopada mohngiongarail kan oh kaunopohng nan soahng koaros ong rahno ahnsou me kahpwal oh tehnla kan pahn pekederdohng me suwed kan.

9 Pwe awahu kerendohr oh rahn kerendohr ahnsou me sampah mahier; oh me pohnmwahso koaros oh irail akan me kin wiewia suwed arail pahn tehnla; oh Kauno Wasa Lapalap mahsanih, I pahn isikirailla, pwe wiewia suwed pahn sohla mih pohn sampah;

10 Pwe awahu kerendohr, oh dahme nei soukohp akan kohpadahr udahn pahn pweida; pwe nin duwen arail mahsen iei duwen eh pahn pweida;

11 Pwe I pahn pwaredo nanleng sang ni manaman oh lingan lapalap, iangahki karihso pwon, oh koukousoang ni mour pwung rehn aramas akan pohn sampah erein sounpar kid, oh me suwed kan sohte pahn pweida.

12 Oh pil ehu, mehlel, mehlel, I ndahiong kumwail, oh met kohweiehr sang ni kalohk mehlel ehu, sang ni kupwur en Sahmo, me nei wahnpoaron ko, Ehkriemeno me ieiang ie nan ehi doadoahk nan Serusalem, pahn kesihnen ni palimauni ni rahn en ei pwaredohu nan uhr en kisiniei ehu, ni ar pahn likouki likou puhp en mour pwung, iangahki mwaramwar akan pohn moangerail akan, ni lingan duwehte ngehi, pwe en kadeik peneinei en Israel pwon, iei koaros me poakohng ie oh kapwaiada ahi kosonned akan, oh sohte liki.

13 Pwe sowi ehu pahn pepeuk ansou werei oh ni ngihl laud, iei pohn Nahna en Sainai, oh sampah pwong pahn rerrer, ni me mehla kan ar pahn kohda—iei, irail me loaloapwoat ong ie lao lel mehla, pwe irail en alehdi mwaramwar en mour pwung, oh pwe irail en likouda, iei duwehte ngehi, pwe sen kak wiahla ehu.

14 Ahpw, kilang, I ndahionguhk me mwohn rahn kesempwal wet eh pahn lelledo ketipino pahn rotorotala, oh maramo pahn weitahtahla duwehte nta, oh usu kan pahn pwupwidihsang nanleng, oh kilel kapwuriamwei kan pahn pwarada nanleng oh pahn sampah;

15 Oh karihs en aramas akan pahn wie sengiseng oh mwamwahiei;

16 Oh kisinieng en kotou ahis takai pahn mweredi oh kawehla wahn sahpw en sampah.

17 Oh mepwukat pahn wiawi, pwehki wiewia suwed en sampah, kahrehda I pahn dupukiohng me suwed kan, pwe irail sohte pahn koluhla; pwe kep en ei engieng pahn dirala; pwe kilang, ei ntao sohte pahn kamwakeleirailda ma irail sohte pahn rong ie.

18 Eri, ngehi Kauno Koht pahn kadarewei loahng kan pohn sampah, me pahn kehdi irail, oh ngalis udukarail kan, oh pahn kahrehda mwahs eh pahn douda pohrail;

19 Oh ewarail akan pahn nenenla pwe irail sohte pahn kak koasoia mehkot me uhwong ie; oh udukarail akan pahn mwerasang pohn tihrail kan, oh pwoaren masarail akan pahn pwupwisang nan masarail akan;

20 Oh mahn lawalo kan oh men pihr akan ahpw pahn kohdo oh kangirailla.

21 Oh mwomwohdiso kalaimwong oh suwedo, me rasohng lih en nenek en sampah pwon, pahn lekidekdihla sang ni kisiniei me pahn isikalao, nin duwen dahme Soukohp Esekiel mahsaniher sang nan ewe, me koasoiahier mepwukat, me saikinte wiawi ahpw udahn pahn wiawi, nin duwen ei momour, pwe tiahk suwed kan sohte pahn kaunda.

22 Oh pil, mehlel, mehlel, I ndahiong kumwail me ahnsou me sounpar kido pahn imwsekla, oh aramas pwurehng tepida lahlahwe arail Koht, eri ngehi ahpw pahn mweidehng sampaht ekiste ansou;

23 Oh imwio ahpw pahn lelledo, oh nanleng oh sampah ahpw pahn kamwomwala oh imwisekla, oh nanleng kapw oh sampah kapw ehu ahpw pahn miehda.

24 Pwe soahng kan en mahs pahn imwisekla, oh soahng koaros pahn weliakapwala, iei nanleng oh sampah, audaparah kan koaros, aramas oh mahn akan koaros, men pihr kan, oh mwahmw akan;

25 Oh sohte pitenwel ehu, de pil diper kis pahn salongala, pwe iei mepwukat pehi kat me kapikada.

26 Ahpw, kilang, mehlel I ndahiong kumwail, mwohn sampah eh pahn imwisekla, Maikel, nei tohnleng lapalapo, pahn peuk nah sewio, oh me mehla kan koaros pahn pirida, pwe arail sousou kan pahn ritida, oh irail pahn kohdahdo—iei, koaros.

27 Oh me mwahu kan pahn kohpene ni palimaun en pehi ong mour soutuk; oh me suwed kan pahn mih ni palimeing en pehi pwehki ei pahn namenengki nainikinirail mwohn Sahmo;

28 Eri I pahn ndahiong irail—Kumwail kohkohwei sang ie, kumwail me riahla, kumwail kohwei nan kisiniei poatoapoato, me kaunopadahr ong tepelo oh nah tohnleng kan.

29 Oh met, kilang, I ndahiong kumwail, saik pak ehu I me I kalohngki sang nan eweiet me irail pahn pwurodo, pwe wasa me I mihmih ie irail sohte kak kohdo, pwe irail sohte ahneki manaman.

30 Ahpw tamataman me ei kopwung koaros sohte kohieng aramas akan; oh nin duwen ei mahsen kan eh kohwei sang nan eweiet iei pil duwen eh pahn pweida, pwe me tihengo pahn ikmwurihla, oh me ikmwurio pahn tiehngla nan soahng koaros nan sohte lipilipil me I kapikada sang ni manaman en ei mahsen, me iei manaman en Ngeniet.

31 Pwe sang ni manaman en Ngeniet me I kapikinirailda; ei, soahng koaros nan palingehn oh paliwar—

32 Keieu palingehn, keriau paliwar, me iei tepin ei doadoahk; oh pil, keieu paliwar, oh keriau palingehn, me iei keimwsekpen ei doadoahk—

33 I ndindahiong kumwail pwe kumwail en kak wehwehki sang amwail pein ese; ahpw ong ie ei doadoahk sohte imwi, de pil tapi; ahpw e mweimwei ong kumwail pwe kumwail en kak wehwehki, pwehki kumwail peki rehi oh miniminkipene.

34 Eri, mehlel I ndahiong kumwail me ong ie soahng koaros mie palingene, oh sohte pak ehu me I kihong kumwail kosonned en sampah; de [kihong kosonned en sampah] ong aramas men, de aramas akan; de Adam, sememwaillo, me I kapikadao.

35 Kilang, I kihong ih en pein mwekidiki pein ih; oh I kihong ih kosonned, ahpw kaidehn kosonned en sampah me I kihong ih, pwe ei kosonned akan ong palingehn; re sohte wia kosonned en sampah de pein wiawihda, de mour en sampah de ineng.

36 Kedekedeo pwehki Adam eh kasongosongehr pahn tepelo—pwe, kilang, tepelo kohdo mwohn Adam, pwehki e uhwong ie, ndinda, Kihdo ahmw wahu, me iei ei manaman; oh pil silikis ehu en karihs en nanleng e kahluwahsang ie pwehki arail seledek en pilipil;

37 Oh irail lekidekdihla, oh tepelo ahpw miehda oh nah tohnleng kan;

38 Oh, kilang, mie wasa me kaunopdahr ong irail sangete nit apio, wasa wet iei ehl.

39 Oh e pahn konehng me tepelo pahn kasongosongih aramas akan, ma soh irail sohte pahn kak wia pein arail pilipil; pwe ma irail sohte alehdi kahpwal irail sohte pahn kak ese peren—

40 Eri, kedekedeo tepelo ahpw kasongosonge Adam, oh e ahpw tungoale wahn tuhke me sohte mweimweio oh kawehla kosonnedo, sang met e mihla pahn manaman nsenen tepelo, pwehki e dukiong kasongosongo.

41 Eri, ngehi, Kauno Koht, kupwuredahr me e pahn pakasarasang nan Mwetuel en Ihden, sang mwohn sihlangi, pwehki eh wiahda dihp, iei me kahrehda eh mehla ni palingehn, me iei keieu en mehla, iei mehlahute me pahn pil wia keimwsekpen mehla, me ong palingehn, me Kauno pahn mahsenihong me suwed ni ahnouo ketihtihki: Kumwail me riahla kan, kumwail kohkohla.

42 Ahpw, kilang, I ndahiong kumwail me ngehi, Kauno Koht, ketikihong Adam oh kadaudoke kan, me irail sohte pahn mehla nin duwen mehlahn paliwar, loa ngehi, Kauno Koht, pahn kadarewei tohnleng kan pwe en kalongkihongirail koluhla oh poadoandoarlao, sang ni arail pahn pwoson mwaren nei Iehros.

43 Oh iei met me ngehi, Kauno Koht, koasonehdiongehr aramas rahn en ah kaunopada—kahrehda sang ni mehlahn paliwere e pahn kak pwourdahng mour kohkohlahte nan mour soutuk, iei ong koaros me pahn kamehlele;

44 Oh lekidekla soutuk ong irail akan me sohte pahn kamehlele; pwe irail sohte pahn kak kamwakelsang pwupwidi en palingehn, pwe irail sohte koluhla;

45 Pwe irail poakohng rotorot laudsang marain, oh arail wiewia kan suwed, oh irail pahn alehdi iseparail sang rehn me irail peikiongo.

46 Ahpw kilang, I ndahiong kumwail, me kisin seri kan mwakelekeldahr sangehte ni tepin sampah sang nei Iehroso;

47 Eri, irail sohte kak dihp, pwe sohte manaman kohieng Sehdan en kak kasongosonge kisin seri kan, lao irail pahn kak pwukoahki arail wiewia kan mwohi;

48 Pwe e pahn wiawihong irail sang ni nsenei, nin duwen me I mwahuki, kahrehda soahngkan me kapwuriamwei pahn anahnepe sang rehn arail pahpa kan.

49 Oh, I pil ndahiong kumwail, I sou mahsaniher me mehmen me pahn wehwehki en koluhla?

50 Oh mehmen me sohte wehwehki, e mihmihte rehi nin duwen me ntingdier. Oh met I pahn kaimwsekalahr ei koasoi ong kumwail ansou wet. Ahmen.