Padahk oh Inou kan

1 Rong mwahu, kumwail aramas en ei mwomwohdiso, kepitien ih me ketiket wasa ile ketin mahsanih, oh me sihlangihr kin ketin mahmahsanih aramas koaros; ei, mehlel I nda: Kumwail aramas me doh kan kumwail rong mwahu; oh kumwail me mih pohn dekeh kan, kumwail ehupene rong.

2 Pwe mehlel kepitien Kauno pahn kohieng aramas koaros, oh sohte me pahn pitsang; oh sohte pworin mas me sohte pahn kilang, de pil saleng me sohte pahn rong, de pil mohngiong me sohte pahn kehn.

3 Oh me kahngohdi kan pahn kehnda ni ar pahtou laud; pwe diparail akan pahn pakairda pohn ihmw akan, oh arail wiewia rir kan pahn kasansalda.

4 Oh sang ni ewen nei tohnpadahk kan me I pilada ni imwin rahn pwukat pahn ngihl en kapariki pahn kohieng aramas koaros.

5 Oh irail pahn kohwei oh sohte emen pahn kauhdi irail, pwe ngehi Kauno me ketin mahsanihong irail.

6 Kilang, met iei ei manaman, oh manaman en nei soun papah kan, oh ei oaralap ong pwuhk en ei kosonned akan, me I kihong irail en wiahda ong kumwail, kumwail tohn sampah.

7 Eri, kumwail nei aramas, kumwail lemwiki oh rerrer pwe dahme ngehi Kauno ketin mahsanih loale udahn pahn pweida.

8 Oh mehlel I ndahiong kumwail, me irail akan me pahn kohwei, oh kalkalohngki rongamwahu pwukat ong tohn sampah, manaman kohieng irail pwe ren katengehdi pohn sampah oh nanleng, me soupwoson oh kahngohdi kan;

9 Ei, mehlel, katengeiraildi ong ni rahno ahnsou me engieng en Koht pahn mwerediong pohn me suwed kan ni sohte imwi—

10 Ong rahno ahnsou me Kauno pahn ketido pwehn pwainehng emen emen aramas nin duwen eh doadoahk, oh sohng emen emen aramas nin duwen sosohng me e wiahiong mehn mpeh kan.

11 Eri kepitien Kauno iei ong wasa koaros pohn sampah, pwe koaros me kak rong en rong:

12 Kumwail kaunopada, kumwail kaunopada ong dahme pahn kohdo, pwe Kauno kerendohr;

13 Oh Kauno ketin engiengdahr, oh sapwellime kedlahs udoudehr nanleng, oh e pahn lelohng tohn sampah pwon.

14 Oh limen Kauno pahn sansalada; oh rahno pahn kohdo me irail me sohte pahn rong kepitien Kauno, de pil kepitien sapwellime sounpapah kan, de pil sohte rong mahsen kan en soukohp akan oh wahnpoaron kan, re pahn lipasang rehn nei aramas akan;

15 Pwe irail salongasangehr ei tiahk sarawi kan, oh kawelahr ei inou poatoapoat;

16 Irail sohte rapahki Kauno pwe irail en koasonehdi sapwellime mour pwung, ahpw aramas koaros ideidawehn pein arail koasondi kan, oh mwohmw en pein arail koht, me mwomwe rasohng sampah, me wiawihsang dikadiken eni, me kin merila oh pahn mehla nan Papilon, duwehte Papilon lapo, me pahn pwupwidi.

17 Eri, ngehi Kauno, pwehki ei wehwehki kehnaudok me pahn kohdohng tohn sampah, malipehier nei sounpapah Sosep Smith, Jun., oh mahsaniong ih sang nanleng, oh kihong ih kosonned akan;

18 Oh pil kihong mehteikan kosonned akan, me irail pahn kalohngki mepwukat ong sampah; oh mepwukat koaros wiawiher pwe en kak pweida, iei dahme ntingihdier sang irail soukohp akan—

19 Soang me luwet akan en sampah pahn kohdo oh kawehla me kehlail oh komwad akan, pwe aramas en dehr kaweid mehn mperail, de pil likih kaweid en aramas—

20 Ahpw aramas koaros en koasoi ni mwaren Kauno Koht, iei Sounkomour en sampah;

21 Pwe pwoson en kak keirda pohn sampah;

22 Pwe ei inou poatoapoato en kak wiawihda;

23 Pwe unsek en ei rongamwahu en kak kalohk wei sang me luwet oh mpai ong ni keimw en sampah, oh mwohn nanmwariki kan oh soumas akan.

24 Kilang, ngehi Koht oh ngehi me ketin mahsanih; ahi kosonned pwukat, oh e kohieng nei sounpapah ni arail luwet, nin duwen arail lokaia, pwe ren kak wehwehda.

25 Oh irail kin sapwungala pwe en kak sansalada;

26 Oh irail kin rapahki eripit pwe irail en kak wehwehkihda;

27 Oh ni arail kin wiahda dihp irail kin kamakam, pwe irail en kak koluhla;

28 Oh irail kin karakarahkala pwe irail en kak kehlaila, oh kapaida sang powe, oh alehdi kamarain nan ehu ehu ansou.

29 Oh mwurin nei sounpapah Sosep Smith, Jun., alehdier poadoapoad en Nihpai kan, e pahn tungoaleniki manaman en kawehwehdi Pwuhk en Mormon sang ni kupwur kalahngan en Koht, sang ni manaman en Koht.

30 Oh pil ong irail akan me kosonned pwukat kohieng, pahn ahneki manaman en kauwada poahson en mwomwohdiso wet, oh kihsang nan apwal oh nan rotorot, mwomwohdiso me ihte me mehlel oh ieias pohn sampah pwon, me ngehi Kauno, ketin kupwurpereniki, koasokoasoiong tohn mwomwohdiso pwon oh kaidehn emente—

31 Pwe ngehi Kauno sohte kak kilang oh mweidala ekiste kisin dihp;

32 Ahpw, mehmen me koluhla oh kapwaiada kosonned kan en Kauno pahn alehdi mahk;

33 Oh mehmen me sohte pahn koluhla, maraino me e alehdi pahn kohsang reh; pwe Ngehnie sohte pahn kalapw ieiang aramas, Kauno Wasalapalap ketin mahsanih.

34 Oh pil, mehlel I ndahiong kumwail, kumwail tohn sampah: Ngehi Kauno inangih kasalehiong mepwukat ong paliwar koaros;

35 Pwe I sohte kin lipilipilki aramas akan, oh aramas koaros en ese me rahno kereniongehr lelledo; awahu saikinte, ahpw e kereniongehr, ahnsou me popohl pahn sohralahsang pohn sampah, oh tepelo pahn ahneki manaman pohn pein nah aramas akan.

36 Oh Kauno pahn pil sapwellimaniki manaman pohn sapwellime souleng kan, oh pahn kaunda nanpwungarail, oh pahn ketidihdo kadeikada Idomia, de sampah.

37 Rapahki kosonned pwukat, pwe kosonned pwukat me mehlel oh poatoapoat, oh kokohp akan oh inou kan me mih loale udahn koaros pahn pweida.

38 Dahme ngehi Kauno ketin mahsaniher, I mahsaniher, oh I sohte pahn kapwure; oh mehndahte ma nanleng oh sampah pahn imwisekla, ei mahsen sohte pahn imwisekila, ahpw koaros pahn pweida, mehndahte ma sang ni ngilei de ngilen nei sounpapah kan, e duwepenehte.

39 Pwe kilang, Kauno iei Koht, oh Ngehno kadehdehkier, oh kadehdehu mehlel, oh mehlelo kin mihmihte kohkohlahte. Ahmen.