1 Kilang, I ndahionguhk, me ahnsou me nei sounpapah Martin Harris inengieng en wia nei soun kadehde, me kowe, nei sounpapah Sosep Smith, Jun., alehdier pileit kan me ke kadehdehki oh kasalehdahier me ke alehdi sang rehi;

2 Oh met, kilang, met ke pahn ndahiong ih—ih me ketin mahseniong uhk, ketin mahsaniher ong kowe: Ngehi, Kauno, iei Koht, oh kihonguhkehr mepwukat ong kowe, nei sounpapah Sosep Smith, Jun., oh mahsanihonguhk me ke pahn wia sounkadehdehn mepwukat;

3 Oh I kupwurehdahr me ke pahn wiahda ehu inou ong ie, me ke sohte pahn kasalehiong emen ihte ongete aramas akan me I pahn mahsanihonguhk ken kasalehiong; oh ke sohte pahn ahneki manaman powe ihte ma I pahn kihonguhk.

4 Oh ke ahneki kisakis en kawehweh pileit kan; oh met iei tepin kisakiso me I ketikihong uhk; oh I mahsenihonguhk me ke sohte pahn kamwomwehieng me mie ehu kisakis tohrohr lao ei koasondi pahn pweida ong met; pwe I sohte pahn mweidehnguhk ehu kisakis tohrohr lao met imwisekla.

5 Mehlel, I ndahionguhk, meid suwed pahn kohdohng tohn sampah ma irail sohte pahn rong ei mahsen kan;

6 Pwe mwurin met kohla ke pahn kasarawihla oh kohwei oh wahwei ei mahsen kan ong aramas akan.

7 Kilang, ma irail sohte pahn kamehlele ei mahsen kan, irail sohte pahn kamehleleiuk, nei sounpapah Sosep, ma e pahn kak pwe ken kasalehiong irail mepwukat koaros me I kihonguhk ehr.

8 Oh, dih soupwoson oh keptakai wet—I engiengidahr pahrail.

9 Kilang, mehlel I ndahiong kumwail, I nekinekid soahng ko me I likihkihonguhk, nei sounpapah Sosep, sang ni eripit me I ahneki, oh e pahn sansalohng dih en mwuhr akan;

10 Ahpw dih wet sohte pahn alehdi ei mahsen sang rehmw;

11 Oh me pahn kapatahieng ahmw kadehdehn, iei kadehdehn nei sounpapah silimeno, me I pahn malipe oh kasarawihla, me I pahn kasalehiong mepwukat, oh irail pahn kohwei kadehdehki ei mahsen me I pahn kihwei rehmw.

12 Ei, irail pahn ese ni mehlel me mepwukat udahn mehlel, pwe sang nanleng I pahn kalohngkihong irail.

13 I pahn kihong irail manaman pwe irail en kol oh kilang mepwukat ni udahn mwomwarail;

14 Oh sohte me I pahn mweidehng manaman wet, en alehdi soangen kadehdehu nan dih wet, nan tepidahn kekeirdahn oh kokoudahn ei mwomwohdiso sang nan sapwtehno—marain duwehte maram, oh lingan duwehte ketipin, oh kamasepwehk duwehte pilaik en sounpei kan.

15 Oh I pahn kadarewei sang ei mahsen ehn sounkadehde silimeno ar kadehdehu.

16 Oh kilang, mehmen me pahn kamehlele ei mahsen kan, irail me I pahn pwarengki kasansal en ei Ngehno; oh irail pahn ipwsapahl sang rehi, iei sang ni pihl oh Ngehno—

17 Oh kumwail anahne awih ansou kis, pwe kumwail saikinte kasarawihla—

18 Oh arail kadehdehu pahn pil kohwei ong kadeikpen dih wet ma irail pahn kakeluwakehla arail mohngiong kan ong irail;

19 Pwe kalokolok en tehnla pahn kohwei rehn tohn sampah, oh pahn wiwiawi nan ehu ehu ansou kan, ma irail sohte pahn kohluhla, lao sampah pahn tehnla, oh toweh kan koaros pahn sohrala oh kamwomwala mehlel sang ni marain en ei pahn ketido.

20 Kilang, I ndahiong kumwail mepwukat, duwehte ei pil ndahiong aramas akan duwen kamwomwalahn Serusalem; oh ei mahsen pahn kamehlelda ansou wet nin duwen eh wiawihero.

21 Oh met I mahsenionguhk, nei sounpapah Sosep, en koluhla oh kakehlakahla momouriki mour pwung mwohi, oh uhdihsang rongorong kaweid en aramas akan;

22 Oh me ke pahn tengediong kapwaiada kosonned akan me I mahsenihonguhk; oh ma ke pahn wia met, kilang I pahn kihonguhk mour soutuk, mehndahte ma ke kamakamala.

23 Oh met, I pwurehng ndahiong uhk, nei sounpapah Sosep, duwen ohlo me inangih wia sounkadehde—

24 Kilang, I ndahiong ih, me e kin aksuweiki pein ih oh sohte itar eh karakarahkihla pein ih mwohi; ahpw ma e pahn poaridi mwohi, oh karakarahkiala pein ih sang ni kapakap kehlail oh pwoson, sang nan mohngiong mehlel, eri I pahn kamanahiong ih en kilang soahng kan me e inangih en kilang.

25 Oh e ahpw pahn ndahiong aramas en dih wet: Kilang, I kilangehr soahng kan me Kauno ketin kasalehiong Sosep Smith, Jun., oh I ese ni mehlel me re mehlel, pwe I kilangehr, pwe re kasansalohng ie sang ni manaman en Koht oh kaidehn aramas.

26 Oh I ngehi Kauno me ketin mahsanihong ih, nei sounpapah Martin Harris, me e pahn uhdihsang ndahiong irail duwen mepwukat, ihte me e pahn nda: I kilangehr mepwukat, oh re kasansal ong ie sang ni manaman en Koht; oh iei ih mahsen pwukat me e pahn nda.

27 Ahpw ma e pahn kahmahmiki met e pahn kawehla inouo me e inoukihdahr ong ie, oh kilang, e pahn lekidekla.

28 Oh met, ma e sohte pahn karakarahkiala pein ih oh wehkada ong ie soahng kan me e wia me sapwung, oh inoukihong ie me e pahn kapwaiada ei kosonned akan, oh pwoson ie, kilang, I ndahionguhk, e sohte pahn kak kilang me, pwe I sohte pahn kamanahiong en kilang soahng kan me I mahsaniher.

29 Oh ma iei ih irair en met, I mahsanihonguhk, nei sounpapah Sosep, me ke pahn ndahiong ih, me e solahr pahn wia mehkot, de pil pwurehng kediropwehkin ie irair wet.

30 Oh ma iei ir irair en met, kilang, I ndahionguhk Sosep, ahnsou me ke pahn kawehwehdi ekei teh ke pahn uhdi ansou kis, lao I pahn pwurehng mahsenihonguhk; ahnsou me ke kak pwurehng kawehwe.

31 Oh ma ke sohte pahn wia met, kilang, ke sohla pahn alehdi kisakis, oh I pahn kihsanguhk soahngo me I likihkihonguhk.

32 Oh met, pwehki ahi kilangehr likamw akan me awiawihiuk pwe en kaweiukala, ei, I kilangehr ma nei sounpapah Martin Harris sohte pahn karakarahkiala pein ih oh alehdi kadehdeh sang rehi, e udahn pahn pwupwidi nan dihp;

33 Oh tohto me likamw awiawih pwe ren kaweiukala sang pohn sampah; oh pwehki karepe wet, pwe ahmw ahnsou en kak reireila, I kihonguhk kosonned pwukat.

34 Ei, pwehki kahrepe wet I nda: Uhdi, oh nenenla lao I mahsenionguhk, oh I pahn kasalehionguhk wiepen omw pahn kak kanekehla dahme I pahn mahsanihonguhk.

35 Oh ma ke pahn loaloapwoationg kapwaiada ei kosonned akan, ke pahn pwopwokdahla ni imwin rahno. Ahmen.