Ìpín 7
Ìfihàn tí a fifún Wòlíì Joseph Smith àti Oliver Cowdery, ni Harmony, Pennsylvania, Oṣù Kẹrin 1829, nígbàtí wọn béèrè nípasẹ̀ Úrímù àti Túmímù bóyá Jòhánnù, àyànfẹ́ ọmọ ẹ̀hìn, sì wà nínú ẹran ara tàbí o ti kú. Ìfihàn náà jẹ́ ẹ̀dà ìyípadà èdè ti àkọsílẹ̀ èyí tí Jòhánnù ṣe sí orí awọ-ẹranko tí ó sì fi pamọ́ fúnra rẹ̀.
1–3, Jòhánnù àyànfẹ́ yíò wà láàyè títí tí Olúwa yíò fi dé; 4–8, Pétérù, Jákọ́bù, àti Jòhánnù di àwọn kọ́kọ́rọ́ ìhìnrere mú.
1 Olúwa sì sọ fún mi pé: Jòhánnù, àyànfẹ́ mi, kínni ìwọ fẹ́? Nítorí bí ìwọ bá béèrè ohun tí o fẹ́, èmi yíò fií fún ọ.
2 Èmi sì wí fún un pé: Olúwa, fi agbára fún mi ní orí ikú, kí èmi lè wà láàyè kí èmi sì mú awọn ọkàn wá sí ọ̀dọ̀ rẹ.
3 Olúwa sì wí fún mi pé: Lóotọ́, lóotọ́, ni mo wí fún ọ, nítorítí ìwọ béèrè èyí, ìwọ yíò dúró títí èmi yíò fi dé nínú ògo mi, ìwọ yíò sì sọtẹ́lẹ̀ níwájú àwọn orílẹ̀-èdè, ìbátan, èdè àti ènìyàn.
4 Àti nítorí ìdí èyí Olúwa sọ fún Pétérù pé: Bí èmi bá fẹ́ kí ó dúró títí èmi yíò fi dé, kínni èyí jẹ́ sí ọ? Nítorí ó fẹ́ lati ọ̀dọ̀ mi pé kí òun lè mú àwọn ọkàn wá sí ọ̀dọ̀ mi, ṣùgbọ́n ìwọ nfẹ́ kí o lè yára wá sí ọ̀dọ̀ mi nínú ìjọba mi.
5 Èmi sọ fún ọ, Pétérù, èyí jẹ́ ìfẹ́-inú rere; ṣùgbọ́n àyànfẹ́ mi nfẹ́ pé kí òun lè ṣe púpọ̀ síi, tàbí iṣẹ́ tí ó tóbi síbẹ̀ láàrin àwọn ènìyàn ju èyí tí ó ti ṣe ṣíwájú.
6 Bẹ́ẹ̀ni, òun ti dáwọ́lé iṣẹ́ títóbi kan; nítorínáà èmi yíò ṣe òun bíi ọ̀wọ́ inà àti ángẹ́lì tí ó njíṣẹ́ ìrànṣẹ́; òun yíò ṣe iṣẹ́ ìránṣẹ́ fún àwọn tí wọn yíò di ajogún ìgbàlà tí wọn ngbé ní ilẹ̀ ayé.
7 Àti pé èmi yíò jẹ́ kí ìwọ ó ṣe iṣẹ́ ìránṣẹ fún òun àti fún arákùnrin rẹ Jákọ́bù; àti ẹ̀yin mẹ́tẹ̀ta ni èmi yíò fi agbára yìí àti àwọn kọ́kọ́rọ́ iṣẹ́ ìránṣẹ́ fún títí èmi yíò fi dé.
8 Lóotọ́ ni mo wí fún yín, ẹ̀yin méjèèjì yíò rí gbà gẹ́gẹ́bí ìfẹ́-inú yín, nítorí ẹ̀yin méjèèjì yọ̀ nínú ohun tí ẹ ti fẹ́.