Iralaud 7
Kaudiahl kohieng Soukohp Sosep Smith oh Oliver Cowdery, nan Harmony, Pennsylvania, Epreil 1829, ahnsou me irail doadoahngki Urim oh Dummum oh kalelapak ma Sohn, tohnpadahk kesempwalo, momourete ni paliwar de e melahr. Kaudiahl wet iei kawehwehn poadoapoad ehu me Sohn ntingihda nan kisin likou ehu oh pein ekihla.
1–3, Sohn Kesempwalo pahn momourete lao Kauno pwurehng ketido; 4–8, Piter, Seims, oh Sohn kolokol kih kan en rongamwaho.
1 Oh Kauno ahpw ketin mahsanihong ie: Sohn, me ih kin kesempwaliki, dahme komw kupwuriki? Pwe ma ke pahn peki dahme komw kupwuriki, e pahn mweimweionguhk.
2 Oh I ndahiong ih: Maing Kaun, komw ketikihong ie manaman en powehdi mehla, pwe I en kak momour oh wahdo aramas akan rehmwi.
3 Oh Kauno ahpw ketin mahsanihong ie: Mehlel, mehlel, I ndahionguhk, pwehki ih me komw kupwurki en met a ke pahn mihmi lao I pahn kohdo nan ei lingan, oh ke pahn kin kokohp mwohn wehi kan, keinek kan, lokaia kan, oh aramas akan.
4 Oh pwehki kahrepe wet Kauno ketin mahsanihong Piter: Ma I pahn men en mihmi lao I pwurodo, ia katepehionguhk? Pwe e inangih sang rehi pwe en kak wahdo aramas rehi, ahpw kowe ke inangih ken mwadangete kohdo rehi nan ei wehio.
5 Piter, I ndahionguhk me met e wia ineng mwahu ehu; ahpw nei me kesempwalo inangih en kak wiahda laudsang, de doadoahk lap ehu saikinte lel rehn aramas akan me e saikinte wia.
6 Ei, e alehdahr doadoahk lap ehu; eri I pahn wiahiong ih en wia lullul en kisiniei oh tohnleng en kalohk; e pahn kalohkohng irail me pahn sohsohki komouro me kin mihmi pohn sampah.
7 Oh I pahn wiahionguhk ken apwalih ih oh riomw ohl Seims; oh ong kumwail meh silimenen I pahn kihong kumwail manaman wet oh kih kan en doadoahk wet lao I pwurehng pwurodo.
8 Mehlel I ndahionguhk, kumwa koaros pahn alehdi nin duwen amwa ineng kan, pwe kumwa koaros pereniki dahme kumwa inangih.