Iralaud 43
Soukohp Sosep Smith alehdi kaudiahl, nan Kirtland, Ohio, nan Pepuari 1831. Nan ansouo ekei tohn Mwomwohdiso pwunodada sang aramas me wiahda koasoi likamw me irail wia soun kihla kaudiahl. Soukohpo peki rehn Kauno oh alehdi kaweid wet ong elder kan en Mwomwohdiso. Tepin pali e dokdoke ireh kan en koapworment en nan Mwomwohdiso; pali keimwsekpeh audaudki men kapehm ong elder kan me ren kihong wehi kan en sampah.
1–7, Kaudiahl kan oh kosonned kan kin kohdo ihte sang rehn me idihdahu; 8–14, Souleng kan kin sarawihla sang ni momouriki mour sarawi mwohn Kauno; 15–22, Elder kan kin pekederwei pwe irail en kalohngki koluhla oh kaunopada aramas akan ong sapwellimen Kauno rahn lapo; 23–28, Kauno kin ketin malipe aramas akan sang ni pein kepitie oh sang ni manaman en ahng kan en sampah; 29–35, Mileniem oh katengtengdi en Sehdan pahn kohdo.
1 Kumwail rong mwahu, kumwail elder kan en ei mwomwohdiso, oh kumwail kaieng salengamwail kan mahsen kan me I pahn mahsanihong kumwail.
2 Pwe kilang, mehlel, mehlel, I ndahiong kumwail, me kumwail alehdier kosonned ehu pwe en wia koasondi nan ei mwomwohdiso, sang rehn ih me I idiadahr ong kumwail pwe en kin alehdi kosonned akan oh kaudiahl kan sang nin limei.
3 Oh met kumwail udahn pahn esehla ni mehlel—me sohte emen pahn idihdada ong kumwail pwe en kin alehdi kosonned akan oh kaudiahl akan lao e pahn wisiksang, ma e pahn kin poadehng ie.
4 Ahpw mehlel, mehlel, I ndahiong kumwail, me sohte emen pahn idihda nan kisakis en pwukoa wet ihte ma sang ih; pwe ma e pahn kohsang reh, ihte manaman me e pahn ahneki, iei en idiada emen en weliandi ih.
5 Oh met pahn wia ehu kosonned ong kumwail, me kumwail sohte pahn alehda padahk kan en aramas sohte lipilipil me pahn kohdo mwohmwail en wia kaudiahl kan de kosonned kan;
6 Oh met I kihong kumwail pwe irail en dehr pitihkumwaildi, pwe kumwail en ese re sohte kohsang rehi.
7 Pwe kilang I ndahiong kumwail, me mehmen me kasarawihla sang ie pahn kohdo ni wenihmw en kehlo oh pahn kasarawihla nin duwen ei mahsaniher mwohmwail, pwe ren padahngki kaudiahl kan me kumwail alehdier oh pahn alehdi sang reh me I idiadahro.
8 Oh met, kilang, I kihong kumwail kosonned ehu, me ni ahnsou me kumwail pahn kin pokonpene kumwail pahn kin kaweid oh kakehlaka emen emen kumwail, pwe kumwail en kak ese ia mwomwen amwail pahn kin kapwaiada oh kaukaweid ei mwomwohdiso, ia mwomwen amwail pahn kin kapwaiada ei koasoandi kan oh kosonned akan, me I kihong kumwail.
9 Oh met kumwail pahn kaweidada nan koasoandi kan en ei mwomwohdiso, oh sarawihkihla sang ni soahng kan me kumwail alehdi, oh kumwail pahn katengei kumwaildi en momouriki mour sarawi mwohi—
10 Sang nin duwen amwail pahn wia met, lingan pahn kapatapationg wehio me kumwail alehdi. Nin duwen amwail sohte pahn wia, e pahn kohsang kumwail, iei soahngo me kumwail alehdier.
11 Kumwail kamwakelehsang suwed me mih rehmwail; kumwail kasarawih kumwailla mwohi;
12 Oh ma kumwail inangih lingan kan en wehio, kumwail idiada nei ladu Sosep Smith, Jun., oh utungada ih mwohi sang ni amwail kapakap en pwoson.
13 Oh pil, I ndahiong kumwail, ma kumwail inengieng esehla me rir kan en wehio, kumwail sowesehki ih mwonge oh likou, oh soahng sohte lipilipil me e anahne pwe en kanekehla doadoahk me I mahsanihong ih;
14 Oh ma kumwail sohte pahn wia, e pahn mihmihte rehn irail akan me alehda ih, pwe I en kak kolokolehng ie aramas mwakelekel mwohi.
15 I pil pwurehng nda, elder kan en ei mwomwohdiso kumwail rong mwahu, kumwail me I idiadahr: Kumwail sohte pekederwei pwe kumwail en kaskuhlda, ahpw kumwail en padahkihong aramas akan soahng kan me I pahn kihong nan pehmwail kan sang ni manaman en ei Ngehno;
16 Oh kumwail pahn kaskuhlsang wasa ile. Kumwail kasarawikumwailla oh kumwail pahn kisakiskihdi manaman, pwe kumwail en kak kihwei nin duwen ei mahseniher.
17 Kumwail rong mwahu, pwe, kilang, rahn lap en Kauno kereniongehr.
18 Pwe rahno pahn kohdo me kepitien Kauno pahn mahsendo sang nanleng; nanleng kan pahn wie rerrer oh sampah pahn itikek, oh sowi en Koht pahn pepeuhk ansou reirei oh ngihl laud, oh pahn mahsanihong wehi kan me memeir: Kumwail souleng kan kumwail pwourda oh komourla; kumwail me dipan akan kumwail mihmi oh memeir lao I pahn pwurehng eker.
19 Eri kumwail katengehdi lukopemwail akan pwe kumwail dehr dierek rehn me suwed kan.
20 Kumwail lokaiahda oh dehr uhdi. Kumwail lukuweriong wehi kan en koluhla, ong me mah kan oh pwulopwul kan, ong me sensel kan oh saledek kan, ndindahiong irail: Kumwail kaunopda ong rahn lap en Kauno;
21 Pwe ma ngehi, me wia aramas men, lokaiadahr oh eker kumwail en koluhla, oh kumwail kailongkin ie, dahme kumwail pahn nda ahnsou me rahno pahn kohdo ahnsou me ngihl en nansapwe pahn koasoi wei sang ni keimw en sampah, koasoakoasoi wei ong nan saleng koaros me momour, ndinda—Koluhla, oh kaunopada ong rahn lap en Kauno?
22 Ei, oh pil, ahnsou me lioal pahn pir sangete palimese kohla palikapi, oh ngihlehkan pahn koasoi wei ong koaros aramas me momour, oh katairongehda nan salengarail kan, ndinda mahsen pwukat—Kumwail koluhla, pwe rahn lap en Kauno kohkohdo?
23 Oh pil, kepitien Kauno pahn mahsendo sang nanleng, mahmahsanih: Kumwail rong mwahu, Oh kumwail tohn wehi kan en sampah, oh rong mahsen kan en Kohto me kapikada kumwail.
24 Oh, kumwail tohn wehi kan en sampah, pak depe me I pahn kihkumwailpene duwehte litok men eh kin pwoalepene nah pwurok kan pahn peh kan, ahpw kumwail kahng!
25 Pak depe me I kin eker kumwail sang ni ewen nei ladu kan, oh sang ni doadoahk en papahn tohnleng kan, oh sang ni pein ngilei, oh sang ni ngihl en nansapwe kan, oh sang ni ngihl en lioal kan, oh sang ni ngihl en kisinieng kehlail kan, oh sang ni ngihl en rerrer en sahpw akan, oh mweredi en keteu ais lap akan, oh sang ni ngihl en lehk lapalap akan oh soangoasoangen soumwahu lusulus kan koaros, oh sang ni ngihl lap en souwi, oh sang ni ngihl en pakadeik, oh sang ni ngihl en mahk rahno pwon, oh sang ni ngihl en lingan oh wahu oh kapai kan en mour soutuk, oh pahn kakete kamaurkinkumwailla komourla poatoapoat, ahpw kumwail kahng!
26 Kilang, rahno leledohr, ahnsou me kep en ei engieng diralahr.
27 Kilang, mehlel I ndahiong kumwail, me mahsen pwukat iei mahsen en Kauno amwail Koht.
28 Eri, kumwail doadoahk, kumwail doadoahk nan ei mwetuel ni lahs en ansou—pwe lahs en ansou me I pahn eker aramas en tohnsampah.
29 Pwe ansou me konehng me I koasonehdi, I pahn kohdo kadeik sampah, oh nei aramas akan pahn padoandoarla oh iang ie kakaun sampah.
30 Pwe mwehi en Mileniem lapo, me I koasoiahier sang nan ewen nei ladu kan, pahn kohdo.
31 Pwe Sehdan pahn selidi, oh ni ansou me e pahn pwurehng sapwedekda e pahn kaunkihte ni lepin ahnsou oh ahnsouo me imwin sampah pahn leleldo.
32 Oh mehmen me pahn momouriki mour pwung pahn kiewek ni marep ehu, oh sampah pahn sohrala sang ni kisiniei.
33 Oh me suwed kan pahn kohla nan kisiniei me sekehkun, oh keimsekpe sohte aramas ese pohn sampah, de me pil pahn ese, lao re pahn kohdo mwohi nan ansou en kadeiko.
34 Kumwail rong mwahu mahsen pwukat. Kilang, Ngehi Sises Krais, Soundor en sampah. Kumwail nekidala mepwukat nan amwail mohngiong duwehte mehkot kesempwal, oh kumwail mweidehng soahng kan me wahu en mour soutuk en kin mihmi nan amwail madamadau kan.
35 Kumwail ahneki mour wahu. Kapwaiada ei kosonned akan. Ihme me pahn wiawi. Ahmen.