Iralaud 3
Kaudiahl kohieng Soukohp Sosep Smith, nan Harmony, Pennsylvania, Sulai 1828, me kosokosoia duwen teh 116 me kawehwedier sang ni pali keieu en Pwuhk en Mormon, me pil kahdaniki Pwuhk en Lihai. Soukohpo sohte kanaiehng oh mweidehng teh pwukat rehn Martin Harris, me ansou kis e wia pwukoahn soun nting ong kawehwehdi en Pwuhk en Mormon. Kaudiahlo kohieng sang nan Urim oh Dummum. (Tehk iralaud 10)
1–4, Sapwellimen Kauno koasondi kin pidipidek kohkohlahte; 5–15, Sosep Smith anahne koluhla ma soh e pahn sohla ahneki kisakis en kawehwe; 16–20, Pwuhk en Mormon kohdo pwe en doarehla kadaudok en Lihai kan.
1 Sapwellimen Koht doadoahk kan, oh wiepeh kan, oh koasondi kan sohte kak en sohte pweida, de pahn uhdi.
2 Pwe Koht sohte kin ketin keid nan ahl pirek, de pil sohpeila pali maun de pil pali meing, e pil sohte kin ketin wekid dahme e ketin mahsanih, eri sapwellime ahl me inen, oh sapwellime koasondi kin pidipidek kohkohlahte.
3 Tamataman, tamataman me kaidehn sapwellimen Koht doadoahk me kin sohte pweida, ahpw ahn aramas doadoahk;
4 Pwe aramas men kak alehdi kaudiahl tohto kan, oh tungoaleniki manaman en wia doadoahk kehlail tohto, ahpw ma e pahn aksuweiki pein eh kehlail, oh pwilikihdi sapwellimen Koht kaweid kan, oh idawehn pein nsene oh ineng en paliwar, e udahn pahn pwupwidi oh kahrehda Koht pwungo eh pahn ketin kaloke.
5 Kilang, ke alehdier mepwukat sang ni likilik, ahpw ia uwen kehlail en kosonned akan me ke alehdi oh tamataman me inou kan me wiawihong uhk, ma ke sohte pahn kawehla.
6 Oh kilang, pak depe ke pahn kawehla sapwellimen Koht kosonned kan oh koasondi kan, oh idawehnla ahn aramas akan koasoi kan.
7 Pwe, kilang, ke sohte pahn masak aramas laudsang Koht. Mehndahte aramas akan kin pwilikihdi sapwellimen Koht kaweid kan, oh sohte kesempwaliki sapwellime mahseno—
8 Ahpw ke udahn anahne loaloapwoat; oh e pahn ketin kapahwei lime kan oh soweseiuk powehdi nein sounkasongosongo arep keng kan; oh e pahn kin ketin ieianguhk ansou apwal koaros.
9 Kilang, kowe me Sosep, oh ke pilipildahr en wia doadoahk en Kauno, ahpw pwehki sapwungalah kan, ma ke sohte pahn ese ke udahn pahn pwupwidi.
10 Ahpw tamataman, Koht me kalahngan; eri, koluhkihla dahme ke wiadahro me uhwong kosonned me I kihong uhk, oh ke pahn pilipildahte, oh ke pahn pwurehng malipilipieng doadoahko;
11 Ma ke sohte pahn wia met, ke pahn kopwurupwurla oh duwehla aramas teikan, oh ke sohla pahn ahneki kisakis.
12 Oh ahnsou me ke kihla dahme Koht ketikihong uhk ken kilang oh ahneki manaman en kawehwe, ke kihla dahme sarawi nan pehn aramas suwed kan,
13 Me sohte kin idawehn kaweid en Koht, oh kawelahr inou me keieu sarawi me wiawihdahr mwohn Koht, oh idawehn pein eh tenek oh suweiki pein eh eripit.
14 Oh met iei kahrepen ahmw sohlahr kak wia pwukoa wet ni ereihn ahnsou kis—
15 Pwe ke mweidehng kaweid en ahmw sounkaweid en tiatipeseng sang ni tapio.
16 Ahpw, ahi doadoahk pahn kohwei, nin duwen marain en Sounkomouro e kohdohr nan sampah, sang nan kadehdehn mehn Suhs akan, iei pil duwen marain en Sounkomouro e pahn kohieng nei aramas akan—
17 Oh ong Mehn Nihpai kan, oh Mehn Seikop kan, oh Mehn Sosep kan, oh Mehn Soram kan, pahn sang ni kadehdehn arail pahpa ko—
18 Oh kadehdeh wet pahn kohdo ong kamarainpen Mehn Leimen kan, oh Mehn Lemuel kan, oh Mehn Ismael kan, me pwupwidi nan soupwoson pwehki dihp en semarail ko, me Kauno ketin mweidehng irail en kamwomwala riarail Mehn Nihpai kan, pwehki ar wiewia suwed kan oh arail tiahk suwed kan.
19 Oh pwehki kahrepe wet me mepwukat wie nekinengki, me audaudiki poadoapoad pwukat—pwe inou kan en Kauno en kak pweida, me e ketin wiadahr ong sapwellime aramas;
20 Oh me Mehn Leimen kan en kak wehwehkihda duwen semarail ako, oh pwe irail en kak esehda sapwellimen Kauno inou kan, oh pwe irail en kak kamehlele rongamwahuo oh koapworopworiki kupwur kalahngan en Sises Krais, oh kalinganla sang ni arail pwoson mwareo, oh sang ni arail koluhla irail en kak komourla. Ahmen.