1 Tepdahn Mwomwohdiso en Krais ni imwin rahn akan, nan pahr kid welipwiki silihsek mwurin atail Kaun oh Sounkomour Sises Krais eh ketdohr nan paliwar, oh e wiawidahr oh koasoansoandi ni pwungih nin duwen kosonned akan en atail wehi, sang ni kupwuren Koht oh sapwellime kosonned akan, ni kapahieu en sounpwung, oh rahn keweneu en rahn en sounpwung en me iei Eipril—

2 Kosonned akan me kohiengehr Sosep Smith, Jun., nan Koht ketin malipehier, oh kasarawihong wahnpoaron en Sises Krais, pwe en wia tepin elder en mwomwohdiso wet;

3 Oh ong Oliver Cowdery, me Koht pil ketin malipehier, ong wahnpoaron en Sises Krais, en wia keriemen en elder en mwomwohdiso, oh kasarawihla sang ni pwilidi en peh kan;

4 Oh met iei nin duwen kupwur kalahngan en atail Kaun oh Sounkomour Sises Krais, me iei sapwellime lingan koaros, ansou wet oh kohkohlahte. Ahmen.

5 Mwurin e kasansaliongehr ni mehlel tepin elder menenet me alehdier kamwakelpen dipe kan, e pwurehngehr kapinipinihong pein ih nan mehkot mwahl akan en sampah;

6 Ahpw mwurin eh kolkoluhlahr, oh karakarahkialahr pein ih ni mehlel, sang ni pwoson, Koht ahpw ketin sowesedahr sang tohnleng sarawi men, me lingaling en powe rasohngete liol piripir ehu, oh me sapwellimaniki likou mwakelekel oh pwetepwet sang pwetepwet koaros;

7 Oh ketikihong ih kosonned akan me kamarainiada ih;

8 Oh ketikihong ih manaman sang powe, sang ni wiepe me kaunopdahr mwowehsang, pwe en kawehwehdi Pwuhk en Mormon;

9 Me audaudikihda poadoapoad en aramas pwupwidi kei, oh rongamwahu unsek en Sises Krais ong Mehn Liki kan oh pil ong Mehn Suhs akan;

10 Me kohda sang ni kamarain, oh kasansalohngehr ekei sang ni sawas en tohnleng kan, oh e kalohkdahr ong sampah sang irail—

11 Me kadehdehiong sampah me pwuhksarawi kan mehlel, oh me Koht ketin kamarainiadahr aramas kan oh malipe irail ong sapwellime doadoahk sarawi nan pahr oh dih wet, duwehte dih kan en kawa;

12 Pwe sang ni wiepe wet en ketin kasalehda me iei ihte me Koht en aio, rahnwet, oh kohkohlahte. Ahmen.

13 Eri, pwehki sampah eh alehdier kadehdeh lap akan, me pahn kadeikada, ni mehlel koaros me pahn kohdo mwuhr oh wehwehkihda doadoahk wet.

14 Oh koaros me pahn alehdi sang ni pwoson, oh wia doadoahk en mour pwung, pahn alehdi kamwaramwar en mour soutuk;

15 Ahpw irail akan me pahn kakeptakaihla mohngiongarail akan, oh soikala, e pahn wekideklahng kauparail—

16 Pwe Kauno Koht me ketin mahsaniher; oh kiht, elder kan en mwomwohdiso, rongehr oh kadehdehier mahsen kan en Wasalapalap lingan me ketiket wasa ile, me sapwellimaniki lingan kohkohlahte. Ahmen.

17 Sang mepwukat se ese me mie Koht emen nanleng, me sohte imwi oh soutuk, Kohtohte me sohte kin wekidek poatoapoat kohkohlahte, me wia soun wiepen nanleng oh sampah, oh audepara kan koaros;

18 Oh iei ih me ketin kapikada aramas, ohl oh lih, rasehngete ih oh sang pein mwomwe, e ketin kapikada ira;

19 Oh e ketikihong ira kosonned akan me ira pahn poakohng oh papah ih, Kohto kelehpw me ieias oh mehlel, oh me ihte kelehpw me irail pahn pwongih.

20 Ahpw sang ni aramas ar kasapwungehla kosonned sarawi pwukat irail wiahlahr aramas me kin momouriki inengarail oh mour en tepel, oh wiahla aramas pwupwidi.

21 Eri, Koht Wasa Lapalap ketin meirongkilahr Sapwellime Iehroso, nin duwen eh ntingdier nan pwuhksarawi kan me kadehdehkier ih.

22 E ketin lokolongki kasongosong kan ahpw e sohte dukiong irail.

23 E ketin kalohpwuhla, pwoula, oh iasada ni kesiluh en rahno;

24 Oh ketidahla nanleng, pwe en ketdi nan mwoale ni palimaun en Sahmo, pwe en kaun sang ni manaman kehlail nin duwen kupwur en Sahmo;

25 Pwe koaros me pahn kamehlele oh papidaisla ni mware sarawio, oh dadauriki pwoson lel ni imwio, pahn komourla—

26 Kaidehn ongete irail akan me kamehlele mwurin eh ketido alehda paliwar nan werengen ansou, ahpw pil ong koaros sangete ni tapio, iei koaros me kamehlel mahsen kan en soukohp akan mwohn eh ketido, soukohp akan me kin mahsen sang ni ar alehdi kamarain sang kisakis en Ngehn Sarawio, me kin ketin kadehdehki ih nan mehkoaros, pahn alehdi mour soutuk,

27 Oh pil ong irail akan me pahn kohdo mwuri, me pahn kamehlele kisakis kan oh malipilip kan en Koht sang Ngehn Sarawi, me kin kadehdehki Sahmo oh Sapwellimeo;

28 Sahmo, Sapwellimeo, oh Ngehn Sarawio iei Kohtehmen, poatoapoat oh soutuk, sohte imwi. Ahmen.

29 Oh se ese me aramas koaros anahne koluhla oh kamehlele mwaren Sises Krais, oh pwongih Sahmo ni mware, oh dadauriki pwoson mwareo lel ni imwi, ma soh irail sohte kak komourla nan wehin Koht.

30 Oh kitail ese me pwungila sang kupwur kalahngan en atail Kaun oh Sounkomour Sises Krais e pwung oh mehlel;

31 Oh kitail pil ese, me sarawihla sang kupwur kalahngan en atail Kaun oh Sounkomour Sises Krais e pwung oh mehlel, ong irail koaros me poakohng oh papah Koht sang ni arail kak unsek, madamadau unsek, oh kehl unsek.

32 Ahpw e kakete mie aramas me pahn pwupwidi sang kupwur kalahngan en Koht ieiaso oh kohkohlahsang.

33 Eri kumwail tohn mwomwohdiso kumwail rong mwahu oh kalapw kapakap, pwe kumwail de pwupwidi nan kasongosong;

34 Ei, oh pil kumwail akan me sarawihla kumwail pil rong mwahu.

35 Oh kitail ese me mepwukat mehlel oh nin duwen kaudiahl akan en Sohn, dehr kapatahieng, de kihsang kokohp en pwuhk wet, pwuhksarawi kan, de kaudiahl akan en Koht me pahn kohdo mwurin met sang ni kisakis oh manaman en Ngehn Sarawio, kepitien Koht, de sawas en kaweid en tohnleng kan.

36 Oh Kauno Koht ketin mahsaniher; oh wahu, manaman oh lingan en kohieng mware sarawio, sang met oh kohkohlahte. Ahmen.

37 Oh pil, sang ni mahsen ehu ong mwomwohdiso duwen wiepen papidais—Koaros me pahn karakarahkihala pein irail mwohn Koht, oh inangih papidaisla, oh patohdo sang ni mohngiong karakarahk oh ngehn peik, oh kadehdehda mwohn mwomwohdiso me irail koluhkihla ni mehlel diparail kan koaros, oh inangih mehlel en alehda mwaren Sises Krais, oh koasondehdi me re pahn papah ih lel ni imwi, oh kasalehda ni mehlel sang arail doadoahk kan me irail alehdahr Ngehn en Krais ong kamwakelpen diparail kan, a re pahn alahlda sang ni papidaisla nan sapwellime mwomwohdiso.

38 Pwukoahn elder kan, samworo kan, sounpadahk kan, dihken kan, oh towe kan en mwomwohdiso en Krais—Wahnpoaron men wia elder men, oh iei eh pwukoa en papidais;

39 Oh en kasarawihla ekei elder kan, samworo kan, sounpadahk kan, oh dihken kan;

40 Oh en kapaiada pilawa oh wain—me rasohng uduk oh ntahn Krais—

41 Oh en kasarawihla irail akan me papidaisla nan mwomwohdiso, sang ni pwilidi en peh kan ong papidais en kisiniei oh Ngehn Sarawi, nin duwen me sansal nan pwuhksarawi kan;

42 Oh en padahkih, kawehwehda, kangonge, papidais, oh tetehk mwomwohdiso;

43 Oh en kasarawihla mwomwohdiso sang ni pwilidien peh kan, oh kihla Ngehn Sarawio;

44 Oh en kaunda tiepene kan koaros.

45 Oh elder kan pahn kin kaweid tiepene kan sang ni arail pahn idawehn Ngehn Sarawio, nin duwen sapwellimen Koht kosonned kan oh kaudiahla kan.

46 Pwukoahn samworo men iei en kalohk, padahk, kawehwehda, kangoange, oh papidais, oh kapaiada kamadipw sarawio,

47 Oh pas nimwen emen emen towe kan, oh kangoangehkin irail en kapakap ni ngihl laud oh ni rir oh wia pwukoahn peneinei kan koaros.

48 Oh e pil kak kasarawihla ekei samworo kan, sounpadahk, oh dihken kan.

49 Oh e pahn kaunda tiepene kan ahnsou me sohte mie elder;

50 Ahpw ahnsou me mie elder men, e pahn kin kalohkte, padahkte, kaukawehwehte, kangoangehte, oh papidais,

51 Oh pas ni ihmwen towe kan, kangkoangoangehkin irail en kapakap ni ngihl laud oh ni rir oh wia pwukoahn peneinei kan koaros.

52 Nan pwukoah pwukat koaros samworo kan pahn kin sowese elder kan ma mie anahnepe nan ansou kan.

53 Pwukoahn sounpadahk men iei en tetehk mwomwohdiso ansou koaros, oh kin ieiang oh kakehlaka irail;

54 Oh tehk me sohte dihp nan mwomwohdiso, de pil pepehm en kahngohdipene, de pil likamw, lipahned, de koasoi en kau;

55 Oh tehk me mwomwohdiso kin tuhpene ansou koaros, oh pil tehk me towe kan koaros wiwia arail pwukoah.

56 Oh e pahn kin kauweid tiepene kan ma elder de samworo sohte mie—

57 Oh dihken kan pahn kin sowese ansou koaros nan eh pwukoah kan nan mwomwohdiso, ma mie anahnepe nan ansou kan.

58 Ahpw sounpadahk men de dihken men sohte ahneki mweimwei en papidais, kapaiada kamadipw sarawio, de pwilikihdi peh kan;

59 Ahpw irail pahn kin kapariki koaros, kawehwehda, kangoange, oh padahkih, oh luke koaros en kohdo rehn Krais.

60 Elder koaros, samworo koaros, sounpadahk koaros, de dihken koaros pahn kin kasarawihla nin duwen sapwellimen Koht kisakis kan oh malipilip kano ng irail; oh e pahn kasarawihla sang ni manaman en Ngehn Sarawio, me pahn mih rehn aramaso me pahn kasarawihla ih.

61 Ekei elder kan me wiahda mwomwohdisohn Krais pahn kin tuhpene nan kapokon pak ehu nan sounpwung siluh, de sang ansou kan me kapokon kan pahn kin koasondi de idiada;

62 Oh kapokon kan me kosoiepe wiawiher pahn kin wia koasondi en pisnes kan me anahnepe en wiawi ansouo.

63 Elder kan pahn kin alehdi neirail kisin likou en mweimwei kan sang rehn elder teikan, sang ni usuhs en utuht en mwomwohdiso me irail kin iang, de sang nan kapokon kan.

64 Emen emen samworo, sounpadahk, de dihken, me pahn kasarawihla sang emen samworo, kak alehdi kisin likou en kamanaman sang reh ansouo, me wia kisin likou me pahn kasansalehng elder men, me pahn kak kihong nan kisin likou en mweimwei, me pahn kihong mweimwei en wia pwukoah kan me e malipilipieng, de e kak alehdi sang nan ehu kapokono.

65 Sohte aramas pahn kasarawihong nan ohpis en mwomwohdiso, wasa me prans kan saikinte wiawihda, ma sohte usuhs en utuht en tohn mwomwohdisohu;

66 Ahpw elder kan me pahn kin kaunda, de pisop kan me seiloakseli, sounsawas lapalap akan, samworo lapalap akan, oh elder kan, kak ahneki pwukoahn kasarawihla, wasa me sohte prans en mwomwohdiso pwe usuhs en utuht en kak wiawi.

67 Presiden koaros en prihsduhd lapo (de elder me kakaun), pisop, sounsawas lapalap, oh samworo lapalap, pahn kin kasarawihla pahn kaweid en pwihn en sounsawas lapalap akan de kapokon lap.

68 Pwukoahn towe kan mwurin arail alahdahr sang ni papidais—Elder kan de samworo kan en kiheng ansou me pahn itarehng kawehwehda soahng koaros duwe mwomwohdisohn Krais pwe irail en kak wehwehkihda, mwohn arail pahn tungoale kamadipw sarawio oh kasarawihla sang ni elder kan ar pahn pwilikihdi pehrail kan, pwe soahng koaros en kak wiawi ni koasondi.

69 Oh towe kan pahn kasalehda mwohn mwomwohdiso, oh pil mwohn elder kan, sang ni arail weweidiki mour pwung oh koasoi, me irail warohng, pwe en mie wiewia oh pwoson me pahrekiong pwuhksarawi kan—weweidiki mour sarawi mwohn Kauno.

70 Tohn mwomwohdiso Krais koaros me nainiki seri kan pahn kin wairaildo rehn elder kan mwohn mwomwohdiso, me pahn kin pwilikihdi pehrail kan pohrail ni mwaren Sises Krais, oh kapaiada irail ni mware.

71 Sohte me pahn kin alahlda nan mwomwohdisohn Krais ma e saikinte lel sounpar en ese dahme e wiwia mwohn Koht, oh e pahn lao kak koluhla.

72 Papidais pahn kin wiawi ni wiepe me pahn mih pah ong koaros me pahn koluhla—

73 Aramaso me Koht ketin malipedahr oh alehdier manaman sang Sises Krais en papidais, pahn kohdihla nan pihlo iangahki aramas me kaunopadahr pein ih ong papidais, oh e pahn eker edehu oh nda: Sang ni manaman me Sises Krais ketikihongiehier, I papidaisihuhkala ni mwaren Sahm, oh Sapwellimehu, oh Ngehn Sarawi. Ahmen.

74 Eri e ahpw pahn kaduhdihla ih nan pihlo, oh pwurehng kapwurehda sang nan pihlo.

75 E konehng me mwomwohdiso pahn kin tuhpene pak tohto pwe ren tungoale pilawa oh wain ong ketemenpen Kauno Sises;

76 Eri elder kan de samworo kan pahn kin kasarawiala; oh iet mwomwen e pahn kin kasarawiala—e pahn kin iang tohn mwomwohdiso kelipwikihdi oh eker Sahmo ni wahu, ndinda:

77 Maing Koht, Sahm Soutuk, se patohwan peki rehmwi ni mwaren sapwellimomwi Iehros, Sises Krais, en ketin kapaiada oh kasarawiala pilawa wet ong war koaros me pahn patohwan tungoale, pwe irail en tungoale ong mehn katamanpen war en sapwellimomwi Iehroso, oh kadehdehiong komwi, Maing Koht, Sahm Soutuk, me pein irail men patohwan ale mwaren sapwellimomwi Iehroso, oh patohwan tamatamaniki ih ahnsou koaros oh kapwaiada sapwellime kosonned akan me e ketikihong irailehr; pwe sapwellime Ngehn en ketiket rehrail ahnsou koaros. Ahmen.

78 Mwomwen kasarawiala waino—e pahn pil alehda kepo, oh nda:

79 Maing Koht, Sahm Soutuk, se patohwan peki rehmwi ni mwaren sapwellimomwi Iehros, Sises Krais, en ketin kapaiada oh kasarawiala wain wet ong war koaros me pahn patohwan tungoale, pwe irail en wia ong mehn katamanpen ntahn sapwellimomwi Iehroso, me kepwilipwilkidier pwehki irail; pwe irail en patohwan kadehdehiong komwi, Maing Koht, Sahm Soutuk, me irail pahn patohwan tamatamaniki ih ahnsou koaros, pwe sapwellime Ngehn en ketiket rehrail. Ahmen.

80 Tohn mwomwohdisohn Krais men me pahn dipada, de dierekda nan wiewia sapwung, pahn epwelda nin duwen pwuhksarawi kan kaweidki.

81 E pahn wia pwukoahn mwomwohdiso kan, sang mwomwohdisohn Krais, en kadarewei emen de ekei neirail sounpadahk kan en iang ekei kapokon kan me kin wiawi sang pahn kaweid en elder kan en mwomwohdiso,

82 Iangahki irekdi en eden towe kan me iangala mwomwohdiso mwurinte kapokon me lahs en wiawio; de kadaredo samworo men en wahdo; pwe en kak mie kileldier eden tohn mwomwohdiso pwon me emen elder pahn kin nekinekid, me elder teikan pahn idiada en pwukoahki nan ansou kan;

83 Oh pil, ma mie me lekideksang nan mwomwohdiso, pwe adarail akan en pil kohsang nan rekoht en eden tohn mwomwohdiso.

84 Towe koaros me pahn kin keseusang nan arail mwomwohdiso wasa me irail kin kousoan ie, ma re pahn kohla iang ehu mwomwohdiso wasa me irail sohte dehde, irail pahn kin wahda neirail kisin likou me kasalehda arail wia towe mehlel oh momourik koasondi, oh kisin likou wet elder men de samworo men kak sainla ma towe me pahn alehdi kisin likou wet wia kempoakepahn eldero de samworohu, de sounpadahk men de dihken en mwomwohdiso kak sainla.