Na
Vunau kei na Veiyalayalati
Wase 1
Na ivakatakila sa soli vei Josefa Simici na Parofita, ena 1 ni Noveba, 1831, ena dua na nodra koniferedi bibi na italatala qase ni Lotu, a vakayacori e Airame, Oaio. E vuqa sara na ivakatakila sa ciqomi mai vua na Turaga ni bera na gauna oqo, kei na vakasokumuni ni veika kece oqo me sa tabaki vakaivola, ko ya e dua na ulutaga levu ka vakadonui ena koniferedi. Na iwase oqo e tiko kina na nona ikau ni ivunau, veiyalayalati, kei na ivakaro ni Turaga, sa soli ena itabagauna oqo.
1–7, Na domo ni ivakasala vei ira kecega na tamata; 8–16, Na vuki tani kei na caka ca ena yaco ni bera na iKarua ni Lako Mai; 17–23, Sa kacivi ko Josefa Simici me vakalesuya ki vuravura na dina kei na kaukauwa ni Turaga; 24–33, Na iVola i Momani e sa basika mai ka sa vakaduri na Lotu dina; 34–36, Na vakacegu ena kau tani mai vuravura; 37–39, Vakasaqara na veivakaro oqo.
1 Dou vakatudaliga, Koi kemudou na lewe ni noqu lotu, sa kaya na domona ko koya sa tiko mai cake, na matana sa raici ira na tamata kecega; io, au sa kaya vakaidina: Dou vakatudaliga koi kemudou mai na vanua vakayawa; kei kemudou mai na veiyanuyanu ni wasawasa, dou vakarorogo vata mai.
2 E dina na domo ni Turaga sa baleta na tamata kecega, ena sega e dua me dro bula; ena sega na mata me na sega ni raica, ena sega na daliga me sega ni rogoca, ena sega na yalo me sega ni laubasikata.
3 Ia ko ira sa veisaqasaqa era na lausua ena rarawa levu; ia na nodra caka cala ena kacivaki mai e dela ni vale, kei na nodra cakacaka vuni ena vakatakilai mai.
4 Ia na domo ni veivakasalataki sa baleti ira kecega na tamata, ena gusudra na noqu tisaipeli, kau sa digitaki ira ena veisiga e muri oqo.
5 Ia era na lako yani ka na sega e dua me tarovi ira, ni koi Au na Turaga sa vakaroti ira.
6 Raica, oqo na noqu kaukauwa, kei na kaukauwa ni noqu tamata, kei na ikau ni ivola ni noqu ivakaro, kau sa solia vei ira me ra tabaka vei kemudou, Koi kemudou na kai vuravura.
7 Ia, dou rere ka sautaninini, Koi kemudou na tamata, ni veika Au sa lewa vei ira koi Au na Turaga ena yaco ga vakaidina.
8 Kau sa kaya vakaidina vei kemudou, ni ko ira era na lako yani, ka vunautaka na itukutuku oqo vei ira na kai vuravura, sa soli vei ira na kaukauwa me ra vauca ruarua ena vuravura kei na lomalagi, ko ira sa tawavakabauta kei ira sa talaidredre;
9 Io, sa dina sara, me ra na vauci ki na siga ka na sovaraki kina na cudru ni Kalou e sega ni yalani rawa vei ira na dau caka ca—
10 Ki na siga ena lako mai kina na Turaga me sauma vei ira na tamata yadua me vaka na nodra cakacaka, ia ena vakarautaka tale ga vei ira na tamata yadua na ivakarau era sa vakarautaka vei ira na kai nodra.
11 O koya kina na domo ni Turaga sa baleta na iyalayala kecega kei vuravura, ia o ira era rawa ni rogoca me ra rogoca sara:
12 Dou vakarau, dou vakarau ki na veika ena lako mai, ni sa voleka mai na Turaga;
13 Ka sa waqa na cudru ni Turaga, kei na nona iseleiwau sa lomoci mai lomalagi, ka na lutuki ira na lewei vuravura.
14 Ka na vakatakilai mai na liga ni Turaga; ka na toro mai na siga vei ira era na sega ni rogoca na domo ni Turaga, se na domodra na nona tamata, ka sega ni muria na nodra vosa na parofita kei na iapositolo, era na muduki tani mai vei ira na tamata;
15 Ia era sa lako tani mai na noqu cakacaka vakalotu, ka voroka na noqu veiyalayalati tawavakaiyalayala;
16 Era sa sega ni vakasaqara na Turaga ka vakadeitaka na nona yalododonu, ia era sa dui muria ga na nodra sala na tamata yadua, kei na ivakatakarakara ni nodra kalou vakataki ira, na kena ivakatakarakara sa vakataki vuravura, kei na veika e buli mai kina sa vaka ga na matakau ceuceu, sa makawa mai ka na rusa e Papiloni, io ko Papiloni levu, ena rusa.
17 Raica, koi Au na Turaga, au sa kila tu na veika rarawa ena yaco vei ira na kai vuravura, au sa kacivi Josefa Simici Lailai kina na noqu tamata ka vosa vua mai lomalagi, ka solia vua na ivakaro;
18 Kau sa solia talega na ivakaro vei ira eso tale, me ra vunautaka yani na veika oqo ki vuravura; ia na veika kece oqo me na vakayacori kina, ka ra sa vola tu na parofita—
19 Na veika malumalumu ni vuravura ena lako mai ka vakarusa na veika kaukauwa ka qaqa, ia na tamata me kakua ni vakasalataki ira na tamata, se vakabauta na liga vakayago—
20 Ia ko ira kece na tamata me ra vosa ena yaca ni Kalou na Turaga, ia na iVakabula kei vuravura.
21 Na vakabauta talega me na vakalevutaki e vuravura;
22 Io na noqu veiyalayalati tawavakaiyalayala me na vakataudeitaki;
23 Io na taucoko ni noqu kosipeli me ra na vunautaka yani ko ira na malumalumu kei na tamata wale ki na iyalayala kei vuravura, vei ira na tui kei ira na iliuliu.
24 Raica, koi Au na Kalou kau sa kaya; nai vakaro oqo sa vu mai vei au, ka a soli vei ira na noqu tamata ena nodra malumalumu, ena ivakarau ni nodra vosa, me rawa ni ra kila kina.
25 Ia ena veigauna kece era cala kina sa na vakatakilai mai;
26 Ia ena veigauna kece era kerea kina na yalomatua me ra na dusimaki;
27 Ia ena veigauna kece era sa ivalavala ca kina, me ra cudruvi, me rawa ni ra veivutuni;
28 Ia ena veigauna kece era sa yalomalumalumu kina, era na vakaukauwataki, ka vakalougatataki mai cake, ka rawata na kila ka mai na dua na gauna ki na dua tale.
29 Ia ni sa tauri oti na kedra ivolatukutuku na Nifai, io, me na tu vua na noqu tamata o Josefa Simici Lailai na kaukauwa me vakadewataka kina na iVola i Momani ena loloma cecere ni Kalou kei na kaukauwa ni Kalou.
30 Ka vakatalega kina o ira ka soli vei ira na ivakaro oqo, me na tiko vei ira na kaukauwa me ra tura na yavu ni lotu oqo, me ra kauta tani mai na kena tabogo tu kei na vanua butobuto e tu kina, na lotu dina ka bula duadua ga e vuravura taucoko, kau sa vakadonuya koi Au, na Turaga, ka vosa tiko ki na lotu raraba ka sega ki na tamata yadua—
31 Ia koi Au na Turaga ka’u sa sega ni rawa ni raica na ivalavala ca ka vakadonuya mada ga vakalailai;
32 Ia, ko koya sa veivutuni ka muria na vunau ni Turaga ena vosoti;
33 Ia ko koya sa sega ni veivutuni, ena kau tani mai vua na rarama sara mada ga sa ciqoma; ni Yaloqu ena sega ni dau veivakauqeti tikoga vei ira na tamata, sa kaya na Turaga ni Lewevuqa.
34 Ia e dua tale, kau sa kaya vakaidina vei kemudou, Oi kemudou na kai vuravura: Koi Au na Turaga au sa vakadonuya me vakatakilai na veika kece oqo vei ira na tamata kecega;
35 Raica au sa nanumi ira vakatautauvata na tamata kecega, ia me ra kila na tamata ni na yaco kusarawa mai na siga; na auwa e se bera, ia sa voleka sara, ka na kau tani mai kina na vakacegu e vuravura, ka na mai lewa na tevoro na nona matanitu.
36 Ia na Turaga talega ena lewai ira na nona yalododonu, ka na liutaki ira, ka na lako sobu mai me lewai Itomi, se ko vuravura.
37 Vakasaqara na ivakaro oqo, ni ra sa dina ka dodonu, kei na parofisai kei na iyalayala ka tiko vei ira era na yaco vakaidina kece.
38 Na veika Au sa kaya koi Au na Turaga, au sa kaya, kau na sega ni vakaiulubaletaki au mai kina; e dina ga ni na takali na lomalagi kei na vuravura, na noqu vosa ena sega ni takali, ia era na yaco kece vakaidina, se mai na domoqu ga se mai na domodra na noqu tamata e sa tautauvata ga.
39 Ia raica, ka kila, ni sa Turaga na Kalou, ka sa tukuni Koya na Yalo, ka sa dina na itukutuku ni ka e tukuna, ka na taura matua na dina me sega ni mudu ka sega ni mudu. Emeni.