Iralaud 14
Kaudiahl kohieng Soukohp Sosep Smith ong David Whitmer, nan Fayette, New York, Suhn 1829. Peneinei en Whitmer perenkihda mehlel doadoahk en kawehwehn Pwuhk en Mormon. Soukohpo kousoanla nan imwen Peter Whitmer Sr., wasa me e kin koukousoan lao doadoahk en kawehweh imwisekla oh manaman en wiahda pwuhko kamanamanla. Nein peneinei en Whitmer pwutak silimen, emen emen irail alehdi kadehdehpen mehlel en doadoahko, pwunodkihda mehlel irair en arail pwukoa kan. Kaudiahl wet oh meh riau mwurin me (iralaud kan 15 oh 16) kohda pwe en wia pasapeng nan roporop me wiawi nan Urim oh Dummum. Mwuri, David Whitmer ahpw wiahla emen Sounkadahde Silimeno ong Pwuhk en Mormon.
1–6, Tohn doadoahk en nan mwetuwelo pahn komourla; 7–8, Mour soutuk iei Sapwellimen Koht kisakis keieu lapalap; 9–11, Krais kapikada nanleng kan oh sampah.
1 Doadoahk kesempwal oh kapwuriamwei ehu pahn kohdo rehn aramas akan.
2 Kilang, Ngehi Koht; kumwail rong ei mahsen, me momour oh manaman, e keng sang kedlahs me au riau, e kin lelohng loalen aramas wasa me keieu rir, wasa me koakon oh sal tuhpene ie; eri rong mwahu ei mahsen kan.
3 Kilang, mwahto lellehr ansou en rahk; eri, mehmen me inangih iang sapak, mweidehng en ale kehlail nah kama, oh iang sapak ni rahn eh maramarainte, pwe en kak kihpenehng palinge komour poatoapoat nan wehin Koht.
4 Ei, mehmen me pahn ale kehlail nah kama oh sapak, e malipilipdahr sang Koht.
5 Eri, ma ke pahn peki rehi ke pahn alehdi; ma ke pahn letelet e pahn ritidahnguhk.
6 Rapahki ken kak sowese wiahda oh koasonehdi doadoahk ahi Saion. Kapwaiada ei kosonned akan nan mehkoaros.
7 Oh, ma ke pahn kapwaiada ei kosonned akan oh dadaurete lel imwi ke pahn alehdi mour soutuk, me iei sapwellimen Koht kisakis keieu lapalap.
8 Oh ahnsou pahn kohdo, ma ke pahn peki rehn Sahmo ni mwarei, pwoson oh kamkamehlele, ke pahn alehdi Ngehn Sarawi, me ketin kapwil mahsen, me ke pahn wia emen sounkadehde en soahng kan me ke pahn rong oh kilang, oh me ke pil pahn kalohngki koluhla ong dih wet.
9 Kilang, ngehi Sises Krais, Sapwellimen Koht ieiaso, me ketin kapikada nanleng kan oh sampah, marain ehu me sohte kak ekiekla nan rot;
10 Eri, I pahn wahdo unsek en ei rongamwahu sang rehn Mehn Liki kan ong peneinei en Israel.
11 Oh kilang, kowe David, oh ke malipilipdahr en iang sawas; oh ma ke pahn wia met, oh loaloapwoat, ke pahn kapaida nan palingehn oh paliwar, oh katingpen pahn lap. Ahmen.