Iralaud 10
Kaudiahl kohieng Soukohp Sosep Smith, nan Harmony, Pennsylvania, ansou kis nan Epreil 1829, oh ekei mwein ahpw alahldi nan tepin samer en 1828. Wasaht Kauno ketin mahsanihong Sosep duwen wekidekla kan me aramas suwed kan wiahiong kawehweh kan me mih nan teh 116 me kawehwehdier sang nan pwuhk en Lihai, nan Pwuhk en Mormon. Kawehwehdahn teh pwukat salongala ansou me Martin Harris kolokol, ni ansou me likilik kohieng en apwalihki ni lepin ansou kis. (Tehk ni oarelap en iralaud 3.) Koasoandi suwedo iei en awih ahnsou me kawehweh sapahl pahn wiawihong teh kan me pirapalahu oh re ahpw pahn song en kahrehda aramas en kelikamwe sounkawehwehu sang ni arail pahn kasalehda wekideklah kan me irail wekidala. Pwe koasoandi en wiewia suwed wet sang rehn me suwedo oh e sansalohng Kauno nan ahnsou me Mormon, me wia sounpoadoapoad en Nihpai en kawa, ni ahnsou me e kamwkamwotehla pileit kan me e kihpene, iei me sansal nan Pwuhk en Mormon (tehk Mahsen kan en Mormon 1:3–7).
1–26, Sehdan kamwakidada aramas suwed kan en uhwong sapwellimen Kauno doadoahk; 27–33, E kin rapahki en kawehla palingenen aramas; 34–52, Rongamwahuo iei en kohwei rehn Mehn Leimen kan oh wehi kan koaros sang nan Pwuhk en Mormon; 53–63, Kauno pahn ketin wiahda Sapwellime Mwomwohdiso oh Sapwellime rongamwahu rehn aramas akan; 64–70, E pahn kihpene me koluhlah kan nan Sapwellime Mwomwohdiso oh pahn kamourala me peik kan.
1 Eri, kilang, I ndahionguhk, pwehki ke kilahr nting kan me I kihonguhk manaman en kawehwehdi sang ni doadoahngki Urim oh Dummum, ong ohl suwed men, ke kasalongelahr.
2 Oh ke pil keselahr ahmw kisakiso ni ansouohte, oh ahmw madamadauo pil rotorotala.
3 Ahpw, met e pwurehng kopwurupwurdohnguhk; eri tehk mwahu pwe ken kak loaloapwoat oh uhsehla kanekehla luhwen doadoahk en kawehwe nin duwen ahmw tapiadao.
4 Dehr tang marahrahsang de doadoahk laudsang ahmw kehlail oh wiepe kan me kohieng uhk pwe en soweseiuk kawehweh; ahpw pwerisekiong lao lel imwi.
5 Kapakap ansou koaros, pwe ken kak powehdi; ei, pwe ken kak powehdi Sehdan, oh pwe ken kak pitsang nan pehn nein Sehdan sounpapah kan me kin utuhtung eh doadoahk.
6 Kilang, irail rapahki ren kaweiukala; iei, pil iangahki ohl me ke likih pil rapahki en kaweiukala.
7 Oh kahrepe wet me I ndahki me ih iei aramas suwed, pwe e kin rapahki en kihsang soahng kan me kohienguhk sang ni likilik; oh e pil song en kawehla ahmw kisakis.
8 Oh pwehki ahmw kihongehr nting kan nan peh kan, kilang, aramas suwed kan kihsanguhkehr.
9 Eri, ei, ke kilahr dahme sarawio rehn me suwed kan.
10 Oh kilang, Sehdan kihongehr nan mohngiongarail kan ren wekidala mahsen kan me ke wiahdahr en ntingdi, de me ke kawehwehdier, me kohsangehr nan pehmw kan.
11 Oh kilang, I ndahionguhk, pwehki arail wekidalahr mahsen kan, mahsen kan sohla duwehte dahme ke kawehwehdiero oh kahredahr eh ntingdi;
12 Oh, ni wiepe wet, tepelo song en wiahda koasondi suwed ehu, pwe en kak kawehla doadoahk wet;
13 Pwe e kihongehr nan mohngiongarail kan ren wia met, pwe sang ni arail likamw irail pahn kak nda me irail diaradahr nan ntingko me ke likamwkihda ahmw kawehweh.
14 Mehlel, I ndahionguhk, me I sohte pahn mweidehng en Sehdan pilahn suwed en pweida nan soahng wet.
15 Pwe kilang, e kihong nan mohngiongarail kan ren wiahionguhk ken kasongesonge Kauno ahmw Koht, pwe ken pwurehng peki ken pwurehng kawehweh.
16 Oh pil, kilang, irail nda oh kin medewe nan mohngiongarail kan—Kitail pahn kilang ma Koht ketikihong ih manaman en kawehwe; ma mehlel, e pahn pwurehng ketikihong manaman;
17 Oh ma Koht pwurehng ketikihong ih manaman, de ma e pwurehng kawehwehda, de ni ehu koasoi, ma e pahn pwurehng kihdo soangen mahsenohte, kilang, kitail kolokol mahsenohte, oh kitail wekidalahr;
18 Eri e sohte pahn pahrekpene, oh kitail pahn nda me e likamwkihda eh koasoi kan, oh me e sohte ahneki kisakis, oh me e sohte ahneki manaman;
19 Eri kitail pahn kawehla ih, oh pil doadoahko; oh kitail pahn wia met pwe kitail dehr namenekla ni imwio, oh pwe sampah en kak kepinga kitail.
20 Mehlel, mehlel, I ndahionguhk, me Sehdan koledier kehlail mohngiongarail kan; e kamwakidadahr irail en wiahda dihp ong me mwahu;
21 Oh mohngiongarail kan suwedlahr, oh direkihla mour suwed oh tiahk suwed kan; oh irail poakehng rotorot oh sohte poakehng marain, pwehki arail wiewia me suwed; kahrehda irail sohte kin peki rehi.
22 Sehdan kamwakidadahr irail, pwe en kak kahluwa palingenarail kan kohlahng mehla.
23 Oh met e kaunopadahr koasondi suwed ehu, ni eh medemedewe en kawehla doadoahk en Koht; ahpw I pahn anahne met sang irail, oh e pahn wiahla arail mehn kanamenek oh lekidengkihla ni rahn en kadeiko.
24 Ei, e kin kamwakidada mohngiongarail kan en lingeringer oh uhwong doadoahk wet.
25 Ei, e ndahiong irail: Kumwail awih pwe kumwail en koledi nan amwail pahn ketewehdi oh likamw, pwe kumwail en kak kawehla; kilang, met sohte suwedih. Oh met e kin pitihkin irail, oh ndahiong irail me sohte dihp nan likamw pwe irail en kak kalowehdi aramas men nan eh likamw, pwe irail en kak kawehla ih.
26 Oh met e kin pitihkin irail, oh kakahluweahkinirail lao e waikidihla palingenarail kan nan ehl; oh met e kahrehda arail pitida nan pein arail lidip kan.
27 Oh met e kin kohdahla oh kohdihla, kokohseli nan sampah, raparapahki en kawehla palingehn en aramas akan.
28 Mehlel, mehlel, I ndahionguhk, meid suwediong ih me kin likamw pwe en pitihdi emen pwehki e kin medewe en emen kin likilikamw, pwehki soahngen aramas wet sohte pahn pitsang kpwung en Koht.
29 Met, kilang, irail wekidalahr mahsen pwukat, pwehki Sehdan mahsanihong irail: E ketweweikumwaildier—oh iei ih me e pitihkin irail lao irail wiahda dihp, en wiahionguhk ken song Kauno ahmw Koht.
30 Kilang, I ndahionguhk, me ke sohte pahn pwurehng kawehwehda mahsen pwukat me kohweisangehr nan pehm kan;
31 Pwe kilang, irail sohte pahn pweida nan arail koasondi suwed en likamwkihda mahsen pwukoa. Pwe, kilang, ma ke pahn kihdo mahsenkohte irail pahn nda me ke likamw oh me ke mwomwehda kawehwe, ahpw ke pein sapwungalahr.
32 Oh, kilang, irail pahn ntingihda met, oh Sehdan pahn kakeluwakiala mohngiong en aramas akan pwe ren kamwakidirail en lingeringer oh uhwonguhk, pwe irail en dehr kamehlele ei mahsen kan.
33 Eri met iei me Sehdan medewe pwe en powehdi ahmw kadehde nan dih pwe, pwe doadoahk wet en dehr wiawihda nan dih wet.
34 Ahpw kilang, iet ehu eripit, oh pwehki ei kasalehionguhk eripit wet, oh kihonguhk kosonned kan duwen mepwukat, dahme ke pahn wia, dehr kasalehiong sampah lao ke kanekehla doadoahk en kawehwe.
35 Dehr pwuriamweiki ei ndahionguhk: Met iei eripito, dehr kasalehiong sampah—pwehki I nda, ken dehr kasalehiong sampah, pwe ken kak poadoandoarla.
36 Kilang, I sohte nda me ke sohte pahn kasalehiong me mour pwung kan;
37 Ahpw pwehki ke sohte pahn kak kasawiada me mour pwung kan ansou koaros, de ke sohte pahn kak ese aramas suwed kan sang me mwahu ansou koaros, eri I ndahionguhk, koledihte ahmw popohl lao I pahn kilang me e pahn konehng kasalehda soangen koaros ong sampah me pid duwen soahng koaros ong sampah me pid duweng soahng wet.
38 Oh met, kilang I ndahionguhk, me poadoapoad akan en soahng pwukoa me ke ntingihdahr, me kohsangehr nan pehm kan, e ntingdi pohn pileit kan en Nihpai;
39 Ei, oh ke tamataman me nan ntingko kasaledahr me pisetik en poadoapoad en mepwukat mih nan pieit kan en Nihpai.
40 Eri met, pwehki poadoapoad me ntingdi pohn pileit kan en Nihpai me pisetik mehlel nin duwen soahng kan me, sang ni ahi eripit, I pahn kasalehiong nei aramas akan pwe re en kak esehla sang nan poadoapoad wet—
41 Eri, ke pahn kawehwehda nting kan me mih pohn pileit kan en Nihpai, kohdi lel nan mwehin nanmwariki Pensamin, de lao lel wasa me ke kawehweda, me ke kolokolete;
42 Oh kilang, ke pahn ntingihda nin duwen poadoapoad en Nihpai; oh met I pahn kasarewehdi irail kan me wekidala ei mahsen kan.
43 I sohte pahn mweidehng irail en kawehla ei doadoahk; ei, I pahn kasalehiong irail me ahi eripit lapalapasang widing en tepelo.
44 Kilang, irail alehdihte ekiste was, de oaralap en poadoapoad en Nihpai.
45 Kilang, mie soahng tohto kan me ntingdi pohn pileit kan en Nihpai me katehlapahla kawehwepen ei rongamwahu; eri, iei met sang ni ei eripit me ke pahn kawehwehdi pali keieu en nting kan en Nihpai, oh kadarewei nan doadoahk wet.
46 Oh, kilang, luhwen doadoahket pwon audaudik pali koaros en ei rongamwahu me nei soukohp sarawi kan, ei, oh pil nei tohnpadahk kan, inangih sang nan arail kapakap en kohdo rehn aramas pwukat.
47 Oh I ndahiong irail, me e pahn mweimweiong irail nin duwen arail pwoson nan ar kapakap kan;
48 Ei, oh met iei arail pwoson—me ei rongamwahu, me I kihong irailehr en kak kalohkehng irail nan arail rahn akan, en kak kohdo rehn riarail Mehn Leimen kan, oh pil koaros me wiahla Mehn Leimen kan pwehki arail pwupwidi.
49 Met, kaidehn ih koaros met—arail pwoson nan arail kapakapo iei me rongamwahuo en pil kak sansalada, ekei wehi kan pahn sapwanikihla sahpw wet;
50 Oh met irail pwilikihda kapai ehu pohn sahpwet nan arail kapakap kan, pwe sohte lipilipil aramas me pahn kamehlele rongamwahuo nan sahpwet en kak alehdi mour soutuk;
51 Ei, pwe en kak saledekiong koaros sohte lipilipil wehi, keinek, lokaia, de aramas me irail wia.
52 Oh met, kilang, nin duwen arail pwoson nan arail kapakap kan I pahn wahdo pali en ei rongamwahuo pwe nei aramas akan en wehwehkihda. Kilang, I sohte wahdo pwe en kawehla dahme irail alehdi, ahpw en kakehlakahda.
53 Oh pwehki kahrepe wet me I ndahki: Ma dih wet sohte pahn kakeluwakiala mohngiongarail kan, I pahn wiahda ei mwomwohdiso rehrail.
54 Met I sohte nda pwe I en kawehla ei mwomwohdiso, ahpw I nda pwe I en kawada ei mwomwohdiso;
55 Eri, mehmen me iang ei mwomwohdiso sohte anahne masak, pwe re pahn sohsohki wehin nanleng.
56 Ahpw iei irail akan me sohte masak ie, de pil sohte kapwaiada ei kosonned akan ahpw kaukawada mwomwohdiso kan ong pein irail pwe ren kepwehpwehkihla, ei, oh koaros irail me kin wiewia suwed oh kaukawada wehin tepelo—ei, mehlel, mehlel, I ndahionguhk, me iei irail me I pahn kedirapwa, oh kamwakid oh itikada loalerail.
57 Kilang, ngehi Sises Krais, Sapwellimen Koht. I kohdo rehn pein nei aramas, oh pein nei aramas sohte aleiehda.
58 Ngehi me wia marain me kamarainih wasa rotorot, oh rotoroto sohte kak powehdi.
59 Ngehi me mahsanih—Ekei nei sihp me I nainiki sohte mih nan kehl wet—ong nei tohnpadahngko, oh tohto me sohte wehwehki.
60 Oh I pahn kasalehiong aramas pwukat me mie nei ekei sihp, oh me Irail rasohng ehu rahn peneinei en Seikop;
61 Oh I pahn kasalehda nan marain arail doadoahk kapwuriamwei kan, me irail wia ni mwarei;
62 Ei, ohi pahn pil wahdo nan marain ei rongamwahu me kalohkehng irail, oh kilang, irail sohte pahn kahmahmiki dahme ke alehdier, ahpw irail pahn kakehlakahla, oh pahn wahdo nan marain iren padahk mehlel en ei padahk en rongamwahu, ei, oh padahk mehlelohte me sang rehi.
63 Oh met I pahn wia pwe I en kak koasonehdi ei rongamwahu, pwe e dehr mie pingiping laud; ei, Sehdan ariarih nan mohngiong en aramas akan en uhwong ei irehn ei padahk en rongamwahu; oh nan soahng wet irail sapwung, pwehki irail wekidalahr pwuhksarawi kan oh sohte wehwehkin Irail.
64 Eri, I pahn kasalehiong irail padahk rir lap wet;
65 Pwe, kilang, I pahn kihpene irail duwehte litok men eh kin kihpene kisin pwurok kan pahn peh kan, ma irail sohte pahn kakeluwakehla mohngiongarail kan;
66 Ei, ma irail men kohdo, irail kak, oh saledek iang tungoale pihl en komour.
67 Kilang, iei met ei padahk—me mehmen me pahn koluhla oh kohdo rehi, duwehte nan ei mwomwohdiso.
68 Mehmen me pahn kalohngki laudsang de tikitiksang met, met kaidehn nei, ahpw e uhwong Ie; eri sohte wia tohn ei mwomwohdiso.
69 Oh met, kilang, mehmen wia tohn ei mwomwohdiso, oh dadaurete ei mwomwohdiso lao lel imwi, I pahn koasonehdi pohn ei paip, oh ewen kehl en ehl sohte pahn kak pweida rehrail.
70 Oh met, tamataman mahsen kan en ih me wia mour oh marain en sampah, amwail Soundor, amwail Kaun oh amwail Koht. Ahmen.