1 Dou rogoca, oi kemudou na lewe ni noqu lotu, sa kaya na Turaga na nomudou Kalou, ka rogoca na vosa ni Turaga ena vukumudou—

2 Na Turaga ena lako vakasauri mai ki na nona valetabu; na Turaga ka na lako mai ki vuravura vata kei na dua na cudru me ia na veilewai; io ki na veimatanitu kecega sa guilecava na Kalou, ka vakakina vei ira kecega era sa sega ni vakalou ena kemudou maliwa.

3 Ni na vakaraitaka mai ko koya na ligana tabu ki na veimatanitu kecega, ka na raica na iyalayala kecega kei vuravura na veivakabulai ni nodra Kalou.

4 O koya, mo dou vakarautaki kemudou, dou vakarautaki kemudou, oi kemudou na noqu tamata; dou vakasavasavataki kemudou; dou vakasoqoni kemudou vata, Oi kemudou na tamata ena noqu lotu, ki na vanua ko Saioni, oi kemudou kece sa sega ni vakaroti mo dou wawa tiko mai.

5 Dou lako tani mai Papiloni. Mo dou savasava mai koi kemudou sa kauta na iyaya ni Turaga.

6 Dou kaciva na nomudou soqoni tabu, dou dau veivosaki vakawasoma vakataki kemudou. Ia me ra masuta na yaca ni Turaga na tamata vakayadua ga.

7 Io, au sa kaya vakaidina tale vei kemudou, sa yaco mai na gauna sa gole yani kina vei kemudou na domo ni Turaga: Dou lako tani mai Papiloni; dou vakasoqoni kemudou tani mai na veimatanitu, mai na matanicagi e va, mai na dua na mua i lomalagi ki na dua tale.

8 Dou talai ira yani na italatala qase ni noqu lotu ki na veimatanitu vakayawa; io ki na veiyanuyanu ni wasawasa; dou talai ira yani ki na veivanua tani; dou vunauci ira na veimatanitu kecega, me liu vei ira na Matanitu Tani, ka qai muri vei ira na Jiu.

9 Ia raica, ka rogoca, me vakaoqo na nodra vosa, na domo ni Turaga ki na tamata kecega: Dou lako yani ki na vanua ko Saioni, io me vakarabailevutaki na iyalayala ni nodra vanua na noqu tamata, ka vaqaqacotaki na nodra iteki, ia me tete yani ko Saioni ki na veivanua vakavolivolita.

10 Io, me lako yani na nodra vosa vei ira kecega na tamata: Dou yadra ka tucake ka lako yani me veitata kei na Tagane sa qai Vakawati; raica ka rogoca ni sa lako mai na Tagane sa qai Vakawati; dou lako yani koi kemudou, ka sotavi koya. Dou vakarautaki kemudou ki na siga sa levu ni Turaga.

11 O koya mo dou vakatawa, ni dou sa sega ni kila na kena siga se na kena auwa.

12 O koya, me ra dro tale ga yani ki Saioni ko ira sa tiko ena kedra maliwa na Matanitu Tani.

13 Ia me ra dro yani ki Jerusalemi ko ira na kawa i Juta, io ki na veiulunivanua ni vale ni Turaga.

14 Dou lako tani mai na kedra maliwa na veimatanitu, io mai Papiloni, ena kedra maliwa na dau caka ca, sai koya na Papiloni vakayalo.

15 Ia sa kaya vakaidina vakaoqo na Turaga, me kakua ni vakusakusa na nomudou dro, ia me vakarautaki vakavinaka na veika kecega e baleti kemudou; ia ko koya sa dro me kakua ni rai ki muri, de na rusa vakaidina.

16 Dou vakatudaliga ka rogoca, Oi kemudou na lewei vuravura. Dou vakarorogo vata mai oi kemudou na italatala qase ni noqu lotu, ka rogoca na domo ni Turaga; raica sa kaciva na tamata kecega, ka vakaroti ira na tamata kecega ena veivanua me ra veivutuni.

17 Raica, sa tala yani na agilosi na Turaga na Kalou, a sa vuka voli ena maliwa kei lomalagi, ka kaya: Dou caramaka na sala ni Turaga ka cakava me dodonu na nona salatu, ni sa voleka na auwa me lako mai kina ko koya—

18 Na gauna ena tucake tu kina ena Ulunivanua ko Saioni na Lami, ka na tu vata kei koya e duanadrau vasagavulukava na udolu, ka volai tu e yadredra na yacai Tamana.

19 O koya, mo dou vakarautaki kemudou ena nona lako mai na Tagane sa qai Vakawati; dou lako yani, dou lako yani ka veitata kaya.

20 Ia raica, ena tucake tu ena Ulunivanua ni Veiolive, ka vakakina ena dela ni wasawasa levu, io ena wasaliwa titobu sara, kei na yanuyanu ni veiwasawasa, kei na vanua ko Saioni.

21 Ka na vakarogoya na domona mai Saioni, ia ena vosa mai Jerusalemi, ka na rogoca na domona na tamata kecega;

22 Ia na domona sa vaka na domo ni wai levu, ka vaka na domo ni cava levu, ka na talaraka sobu na ulunivanua, ka na yali yani na veibuca.

23 Ena vakarota ko koya na wasaliwa titobu, ka na vakasavi lesu ki na veivanua ena vualiku, ka na yaco na veiyanuyanu me dua ga na vanua;

24 Ia na vanua ko Jerusalemi kei na vanua ko Saioni erau na vakasukai tale ki na vanua ga erau a tu kina, ia na vuravura ena vaka ga ena veisiga ni se bera ni wasei.

25 Ia na Turaga, io ko koya na iVakabula, ena tu ena kedra maliwa na nona tamata, ka na lewa na ka bula kecega.

26 Ia ko ira mai na veimatanitu ena vualiku ena nanumi ira na Turaga; ia na nodra parofita ena rogoca na domona, ka ra na sega tale ni tarovi ira rawa; era na yavita na vatu, ka na drodro mai vakayauyau ena kedra iserau na waicevata.

27 Ia ena qai tara cake ena maliwa ni dreke ni wasaliwa titobu na nodra salatu.

28 Era na rawai ira na nodra meca.

29 Ia ena vanua dravuisiga ena dave mai kina na tobu wai ni bula; ka na sega tale ni viagunu na vanua mamaca.

30 Ia era na kauta mai na nodra iyau talei vei ira na kawa i Ifireimi, ko ira na noqu tamata.

31 Kei na iyalayala ni veidelana e sega ni oti rawa era na sautaninini ena kedra iserau.

32 Ia mai kea era na qai cuva sobu ka vakaisalataki ena lagilagi, io mai Saioni, ena ligadra na tamata ni Turaga, io ko ira na kawa i Ifireimi.

33 Ka ra na vakasinaiti ena sere kei na reki e sega ni mudu.

34 Raica oqo na nona veivakalougatataki na Kalou sega ni mudu vei ira na yavusa i Isireli, kei na veivakalougatataki e vutuniyau cake e ului Ifireimi kei ira na nona itokani.

35 Ia ko ira tale ga na yavusa i Juta, ni ra sa vakararawataki oti, era na qai vakatabui ena mata ni Turaga, me ra tiko ga ena nona iserau ena siga kei na bogi, me sega ni mudu ka sega ni mudu.

36 Ia oqo, sa kaya vakadina na Turaga, mo dou kila na veika oqo, Oi kemudou na lewei vuravura, au sa tala yani na noqu agilosi sa vuka voli ena maliwa kei lomalagi, sa tu vua na kosipeli sega ni mudu, sa rairai o koya vei ira eso ka solia vei ira na tamata, o koya ena rairai vei ira e vuqa sa tiko e vuravura.

37 Ia ena vunautaki yani na kosipeli oqo ki na veimatanitu, veimataqali, duivosavosa kei ira na tamata.

38 Ia era na lako yani na italai ni Kalou, ka kaya ena domoilevu: Dou rerevaka na Kalou ka vakalagilagi koya, ni sa voleka ni yaco mai na auwa ni nona veilewai;

39 Dou qaravi koya sa bulia na lomalagi, kei na vuravura, kei na wasawasa kei na veimata ni wai—

40 Dou kaciva na yaca ni Turaga ena siga kei na bogi, ka kaya: Mo ni dresulaka mada na lomalagi, mo ni lako sobu mada, me drodro sobu mai e matamuni na veiulunivanua.

41 Ia ena saumi vakaidina e uludra; ni na vaka na bukawaqa sa vakawaicalataka na ka, kei na bukawaqa sa kere kina na wai.

42 Oi kemuni na Turaga, mo ni lako sobu mai ka vakarogoya na yacamuni vei ira na nomuni meca, ia era na sautaninini e matamuni na veimatanitu—

43 Ni kemuni sa cakava na veika rerevaki, na veika era a sega ni namaka;

44 Io, ni ko ni sa lako sobu mai, sa yavavala e matamuni na veiulunivanua, ko ni na tavaki koya na tamata sa marau ka cakava na ivalavala dodonu, kei koya sa nanumi kemuni ena nomuni sala.

45 Ia mai na ivakatekivu kei vuravura era sa sega ni rogoca se ciqoma e daligadra na tamata, ka sega talega na mata e kunea, ka vakavo ga koi kemuni na Kalou, na veika cecere ko ni sa vakarautaka vei koya sa waraki kemuni.

46 Ia ena qai tukuni: Ko cei oqo sa lako sobu mai vua na Kalou mai lomalagi ka sa vakaisulu boro damudamu tu mai; io, mai na veiyasana tawa kilai, ka daramaka na isulu vakaiukuuku, a sa lako mai ena cecere ni nona kaukauwa?

47 Ia ena qai kaya mai: Koi Au ka’u sa tukuna na ka dodonu, ka kaukauwa me’u ia na veivakabulai.

48 Ia ena damudamu na nona icurucuru na Turaga, ia na nona isulu sa vaka na nei koya sa sikaraka na ikeli ni waini.

49 Ka na cecere na kena lagilagi ni nona iserau ka sa vunitaka kina ena madua na matana na matanisiga, ka sa na bureitaka na kena rarama na vula, ka na kolotaki mai na kena itutu na kalokalo.

50 Ka na rogo mai na domona: Au sa sikaraka taudua ga na ikeli ni waini, ka kauta mai na veilewai ki na tamata kecega; ka sega e dua me tiko vata kei au.

51 Ia au sa buturaki ira ena noqu cudru, ka sikaraki ira ena noqu cudru katakata, ka’u sa kuretaka na nodra dra ena noqu isulu, ka lomoca kina na noqu itutuvi; ni sai koya oqo na siga ni veisausaumi ka’u sa nakita e lomaqu.

52 Ia sa qai yaco na nodra yabaki na tamata ka’u sa vakabula; raica era na tukuna na yalololoma levu ni nodra Turaga, kei na veika kece sa solia vei ira me vaka na nona vinaka, ka vakakina na kena levu ni nona loloma, me sega ni mudu ka sega ni mudu.

53 Raica na nodra rarawa kecega sa rarawa kina ko koya. Ia na agilosi sa tiko e matana sa dau vakabulai ira; ia ena nona loloma, kei na nona lomalomani ira, sa vakabulai ira kina, ka keveti ira, ka kauti ira ena veisiga kece e liu;

54 Io, kei Inoki talega, kei ira era a tiko vata kaya; ko ira na parofita era a liu vua; kei Noa talega, kei ira era a liu vua, kei Mosese talega, kei ira era a liu vua;

55 Io mai vei Mosese ki vei Ilaija, mai vei Ilaija ki vei Joni, ko koya ka a tiko vata kei Karisito ena nona tucake tale, kei ira na iapositolo yalosavasava, vata kei Eparaama, Aisake, kei Jekope, era na tiko ena nona iserau na Lami.

56 Ia ena qai tadola na kedra ibulubulu na yalododonu; era na tucake mai ka tiko ena ligana imatau na Lami, ni sa tucake tu ko koya ena Ulunivanua ko Saioni, io ena koro tabu tale ga ko Jerusalemi Vou; era na lagata na sere ni Lami, ena siga kei na bogi me sega ni mudu ka sega ni mudu.

57 Ia ena inaki oqo, me rawa ni vakaivotavota na tamata ena lagilagi ka na qai vakatakilai mai, sa tala yani kina na Turaga na taucoko ni nona kosipeli, na nona veiyalayalati tawamudu, ka tukuna vakamatata ka rawarawa—

58 Me vakarautaki ira era sa malumalumu ki na veika ena yaco mai ki vuravura, kei na cakacaka ni Turaga ena siga ena vakamaduataki ira kina na vuku na veika malumalumu, ia ko koya sa lailai ena yaco me matanitu kaukauwa ka na vakasava e tini na udolu e lewe rua.

59 Raica ena veika malumalumu e vuravura, ena wasewasea kina na Turaga na veimatanitu, ena kaukauwa ni nona Yalo Tabu.

60 Ia ena vuku ni veika oqo sa soli kina na ivakaro oqo; a vakaroti me kakua mada ni tukuni ki vuravura ena siga a vakatakilai mai kina, ia oqo me sa kau yani ki na veika bula kecega—

61 Ia oqo me vaka na nona nanuma kei na nona inaki na Turaga, ko koya sa lewa na veika bula kecega.

62 Ia ko koya sa veivutuni ka vakatabui koya ena mata ni Turaga, ena soli vua na bula tawamudu.

63 Ia vei ira sa sega ni muria na domo ni Turaga, ena vakayacori vei ira na veika a vola ko Mosese na parofita, ni ra na muduki tani mai na kedra maliwa na tamata.

64 Ka vakatalega kina na veika a vola na Parofita ko Malakai: Ia raica, sa yaco mai na siga ena waqa me vaka na lovo, ia ko ira era sa qaciqacia, io, kei ira era dau caka ca, era na vaka na vu ni co; ia na siga sa roro mai ena vakamai ira, sa kaya na Turaga ni lewevuqa, ka na sega ni vakavoca vei ira na wakana se na tabana.

65 Ia, ena vakaoqo na kena isau ena sauma vei ira na Turaga:

66 Ena siga ko ya ni’u a lako mai vei ira na kai noqu, a sega ni dua vei kemudou e ciqomi au, ia dou sa vakasavi tani kina

67 Ni’u sa kaci tale, sa sega e dua me rogo mai; ia sa sega ni vakalekalekataki na ligaqu me’u sega kina ni rawa ni veivueti, se na noqu kaukauwa me’u veisereki.

68 Raica, ena noqu veivunauci au sa vakadiva kina na wasawasa. Au sa vukica na uciwai me lekutu; a sa bona na kena ika, ka mate sara ena viagunu.

69 Au sa vakaisulutaka na lomalagi ena butobuto, ka ubia ena isulu taga.

70 Ia dou na rawata na ka oqo mai na ligaqu—dou na koto sobu ga ena rarawa.

71 Raica, ka rogoca, sa sega e dua me sereki kemudou; ni dou a sega ni muria na domoqu ni’u sa kacivi kemudou mai lomalagi; dou a sega ni vakabauti ira na noqu tamata, ia ni ra sa talai yani vei kemudou dou a sega ni ciqomi ira.

72 O koya, era sa dregata kina na ivakadinadina ka vauca vata na lawa ka dou sa soli yani ki na butobuto.

73 Ko ira oqo era na lako ki na butobuto e tautuba, na vanua ni tagi, kei na tagiyaso, kei na vakasequruquru bati.

74 Raica sa tukuna na veika oqo na Turaga na nomu Kalou. Emeni.