1 E tiko ena lotu e rua na matabete, na yacadrau na Melikiseteki kei na Eroni, ka okati kina ko ira na Matabete i Livai.

2 Na cava e vakatokai kina na imatai me Matabete i Melikiseteki baleta ni o Melikiseteki e dua na bete levu cecere vakaoqori.

3 Ni se bera na nona gauna a dau vakatokai tu me Matabete Tabu me vaka na iVakarau ni Luve ni Kalou.

4 Ia ena vuku ni kena rokovi se vakarokorokotaki na yacai Koya sa Cecere Sara, me levei na kena dau cavuti wasoma na yacana, era sa mani vakatokayacataka kina na lewenilotu ena gauna makawa na matabete, vei Melikiseteki, se na Matabete i Melikiseteki.

5 Na vakaitutu se na vakailesilesi kece sara ena lotu era sema ga ki na matabete oqo.

6 Ia sa rua na iwasewase se iwasewase lelevu—e dua na Matabete i Melikiseteki, kei na kena ikarua na Eroni se na Matabete i Livai.

7 Na itutu vaka italatala qase e tiki ni matabete i Melikiseteki.

8 Na Matabete i Melikiseteki e koto kina na dodonu ni mataveiliutaki, ka tiko kina na kaukauwa kei na dodonu ni veiliutaki ena veitutu kece sara ena lotu ena veitabagauna kecega e vuravura; me qarava na veika vakayalo.

9 Sa tu na dodonu vei iratou na Mataveiliutaki ni Matabete Levu, ena kena ivakarau vei Melikiseteki me ra veiqaravi ena veitutu kece sara ena lotu.

10 Ko ira na bete levu, ena ivakarau ni Matabete i Melikiseteki sa tu vei ira na dodonu me ra veiqaravi ga ena nodra ilesilesi, ena ruku ni vakatulewa ni mataveiliutaki, ena qaravi ni veika vakayalo, ka vakatalega kina ena itutu vakaitalatala qase, bete (ena kena ivakarau vei Livai), ivakavuvuli, dikoni, kei na lewenilotu.

11 Sa tu na dodonu vua e dua na italatala qase me veiqaravi ena vukuna na bete levu ni sega ni tiko.

12 Na bete levu kei na italatala qase me rau qarava na cakacaka vakayalo, ka duavata kei na veiyalayalati ka vakakina na ivakaro ni lotu; ka sa tu vei rau na dodonu me rau veiqaravi ena veitutu kece oqo ena lotu ni sega ni tiko e dua na vakaitutu e levu cake.

13 Na ikarua ni matabete sa vakatokai na Matabete i Eroni, ni a soli vei Eroni kei ira na nona kawa ena nodra veitabatamata kecega.

14 Na vuna e vakatokai kina me matabete e ra, ni sa semati ga ki na matabete cecere, se na Matabete i Melikiseteki, ka tu kina na kaukauwa ena kena qaravi na veicakacaka vakalotu e laurai rawa.

15 Na matabisopi e mataveiliutaki ni matabete oqo, ka tu kina na kena idola se na kena dodonu.

16 E sega ni dua na tamata e tu vua na dodonu vakalawa ki na itutu oqo, me taura na idola ni matabete oqo, vakavo kevaka e coke dina sara ka ulumatua ena kawa i Eroni.

17 Ia na bete levu ena Matabete i Melikiseteki e tu vua na dodonu me veiqaravi ena veitutu lalai kece sara, ena rawa ni veiqaravi ena itutu vakabisopi kevaka sa sega ni dua na kawa dina i Eroni e kune, ia me kacivi, vakatikori, ka tabaki ki na kaukauwa oqori ena ligadratou na Mataveiliutaki ni Matabete i Melikiseteki.

18 Na kaukauwa kei na dodonu ni matabete cecere, se Matabete i Melikiseteki, sai koya me taura tu na idola ni veivakalougatataki kece sara vakayalo ni lotu—

19 Me tu vua na dodonu me ciqoma na veika vuni ni matanitu vakalomalagi, me tadolavi vei ira ko lomalagi, ka ra na veimaliwai kei ira ena soqoni raraba kei na nona lotu na Ulumatua, io era na marautaka na nodra veimaliwai ka tiko ena iserau ni Kalou ko Tamada kei Jisu na dauveivakaduavatataki ni veiyalayalati vou.

20 Na kaukauwa kei na dodonu ni matabete lailai, se Matabete i Eroni, sai koya me taura na idola ni nodra veiqaravi na agilosi, ka qarava na veicakacaka vakalotu e laurai rawa, na kosipeli volai, na nodra papitaiso na veivutuni me bokoci kina na ivalavala ca, me vaka sa virikotori ena veiyalayalati kei na ivakaro.

21 Ia sa kilikili me ra tu na peresitedi, se na vakailesilesi ni vakatulewa ka vu mai kina, se lesi mai kina se mai vei ira era tabaki ki na veitutu ena matabete e rua oqo.

22 Eratou na digitaki mai na Matabete i Melikiseteki, e tolu na Bete Levu Vakatulewa, eratou na digitaki mai vei ira na lewe ni matabete, lesi ka tabaki ki na itutu ko ya, eratou na qai tokoni ena nodra veivakabauti, nodra yalodina, kei na nodra masumasu na lewenilotu; eratou na lewe ni kuoramu ni Mataveiliutaki ni Lotu.

23 Eratou sa kacivi na lewe ni matabose e tinikarua dauveisiko me iApositolo Le Tinikarua, se ivakadinadina digitaki ni yacai Karisito ki vuravura raraba—a ka oqo eratou sa duidui kina mai vei ira na vakailesilesi tale eso ni lotu ena nodratou itavi.

24 Ka ratou lewena e dua na kuoramu, ka sa tautauvata ga na kena kaukauwa kei na lewa kei iratou na peresitedi e lewe tolu ka tukuni e cake.

25 Era sa kacivi talega na Le Vitusagavulu me ra vunautaka yani na kosipeli, ka me ra ivakadinadina digitaki vei ira na Matanitu Tani kei vuravura taucoko—a ka oqo era sa duidui kina mai vei ira na vakailesilesi tale eso ni lotu ena nodratou itavi.

26 Ka ratou na lewena e dua na kuoramu, ka tautauvata na kena dodonu kei na Tinikarua na ivakadinadina digitaki se iApositolo sa cavuti oti.

27 Ia na lewa kece e tau ena dua vei iratou na kuoramu oqo, e dodonu me ra domovata kece na lewena; io me ra vakadonuya kece na lewe ni kuoramu yadua na lewa e tau mai kina, me rawa ni tautauvata kina na kaukauwa kei na mana ni nodra lewa—

28 Ia kevaka era sa sega ni rawa ni tiko kece na lewe ni dua na kuoramu, sa na okati ga me kuoramu kevaka era lewe levu era sa tiko rawa—

29 Kevaka e sega ni vakakina, na lewa era tauca ena sega ni vakarokorokotaki sara me vaka na nodratou lewa na kuoramu ni peresitedi e lewe tolu ena gauna e liu, ka ratou a tabaki ena ivakarau vaka-Melikiseteki, ka ratou a tamata dodonu ka savasava.

30 Ia na ka sa lewai ena kuoramu kece oqo, se dua ga vei ira, sa kilikili me ia ena yalododonu, ena yalosavasava, na yalo lokumi, na yalomalua kei na vosota vakadede, io ena vakabauta kei na ivalavala savasava, na vuku, kei na ivalavala malua, na vosota, kei na ivalavala vakalou, io me ia ena veilomani vakaveitacini kei na loloma uasivi;

31 Baleta ni sa yalataki tu, kevaka sa tiko vei ira na veika kece oqo, ena tubu cake tiko ga na nodra kila na Turaga.

32 Ia kevaka ena mani yaco me tau e dua na lewa sega ni dodonu mai na kuoramu oqo, me na qai kau cake me rogoci ena nodra soqoni raraba na veikuoramu, io ko ira na vakaitutu vakayalo ena lotu; ia kevaka e sega, sa na tudei ga na nodratou lewa.

33 Ia ko iratou na Le Tinikarua, eratou sa lewe ni Matabose e Cake ni Vakatulewa ka Dauveisiko, eratou sa veiqaravi ena yaca ni Turaga, ena nodratou vakatulewa na Mataveiliutaki ni Lotu, ka veitaudonui kei na lewa vakalomalagi; me ratou tara cake na lotu, ka vakataulewa ena kena cakacaka ena veimatanitu kecega; me liu vei ira na kai Matanitu Tani, ka qai tarava ko ira na Jiu.

34 Me ratou cakacaka na Vitusagavulu ena yaca ni Turaga, ena nodratou vakatulewa na Le Tinikarua se lewe ni matabose e cake dauveisiko, ena kena tarai cake na lotu ka vakataulewa ena kena cakacaka ena veimatanitu kecega; me liu vei ira na kai Matanitu Tani, qai muri vei ira na Jiu—

35 Ni ratou sa talai yani na Le Tinikarua, ka tu vei iratou na idola, me ratou dolava na katuba ni kena vunautaki na kosipeli i Jisu Karisito, ka me liu vei ira na kai Matanitu Tani, qai muri vei ira na Jiu—

36 Ko ira na matabose e cake, ena veiteki kei Saioni, era na lewena e dua na kuoramu ka tautauvata na dodonu e tu kina ena kena cicivaki na lotu, ena lewa kece sara era vakatauca, ki na kuoramu ni mataveiliutaki, se na matabose e cake dauveisiko.

37 Na matabose e cake mai Saioni era lewena e dua na kuoramu ka tautauvata na dodonu e tu kina ena kena cicivaki na lotu, ena lewa kece sara era vakatauca ki na veimatabose ni Tinikarua ena veiteki kei Saioni.

38 Sa itavi ni matabose e cake dauveisiko me kere veivuke ki na Vitusagavulu, ena gauna era gadreva kina, me ra vakatawana na ilesilesi eso me baleta na kena vunautaki ka cakacakataki na kosipeli, ka me kua ni dua tale.

39 Sa itavi ni Le Tinikarua, ena veitabana lelevu kece ena lotu, me ra tabaki ira na italatala dauvunau, me vaka ena lesi vei ira ena ivakatakila—

40 Raica sa vakataudeitaki tu na kaukauwa ni ivakarau vakamatabete oqo me vakadewataka sobu mai ko tama vua na luvena, io na ivakarau oqo e nodra o ira era coke dina ni kawa digitaki, ka a caka vei ira na yalayala.

41 Na kaukauwa oqo a tauyavutaki ena gauna i Atama, ka qai vakadewataki sobu tiko mai ena veitabatamata me vakaoqo:

42 Mai vei Atama ki vei Seci, ko koya a tabaki mai vei Atama ni sa yabaki onosagavulu kaciwa, ka vakalougatataki koya ni vo e tolu na yabaki me qai mate ko koya (Atama), ka taura kina na yalayala ni Kalou mai vei Tamana, ni nona kawa ena digitaki mai vua na Turaga, ka ni ra na maroroi tu me yacova na ivakataotioti kei vuravura;

43 Me vaka ni sa tamata uasivi sara ko koya (Seci), sa ucui tamana vinaka sara ena kena irairai, ka sa vaka kina me ucui tamana ena ka kecega, ka na kilai ga na kedrau duidui mai na nodrau yabaki ni bula.

44 A tabaki ko Inosi ena gauna sa yabaki dua na drau tolusagavulu kava ka vula va kina, mai na ligai Atama.

45 Sa kacivi Keinana mai na loma ni lekutu na Kalou ena ikavasagavulu ni nona yabaki; ka sa sotavi Atama ena nona ilakolako ki na vanua ko Setolamaka. Ia a sa yabaki walusagavulu kavitu ena gauna a tabaki kina.

46 Sa yabaki va na drau ciwasagavulu kaono ka siga vitu ko Meelelieli ena gauna a tabaki kina mai na ligai Atama, ka vakalougatataki koya talega kina.

47 Sa yabaki rua na drau ko Jereti ena gauna a tabaki kina mai na ligai Atama, ka vakalougatataki koya talega kina.

48 Sa yabaki ruasagavulu kalima ko Inoki ena gauna a tabaki kina mai na ligai Atama, ka sa yabaki onosagavulu kalima a qai vakalougatataki koya ko Atama.

49 Ka sa raica na Turaga ko koya, ka rau sa lako vata voli, Ka sa tikotiko ga e matana; ka sa lako vata voli kei na Kalou ena tolu na drau onosagavulu kalima na yabaki, ka sa yabaki va na drau tolusagavulu ena gauna e qai kau cake bulabula kina.

50 Sa yabaki dua na drau ko Mecusela ena gauna e qai tabaki kina mai na ligai Atama.

51 Sa yabaki tolusagavulu karua ko Lemeki ena gauna a tabaki kina mai na ligai Seci.

52 Sa yabaki tini ko Noa ena gauna a tabaki kina mai na ligai Mecusela.

53 A sa vo tiko e tolu na yabaki me mate ko Atama, sa qai kacivi iratou yani ko Seci, Inosi, Keinana, Meelelieli, Jereti, Inoki kei Mecusela, ko ira kece na bete levu, kei ira vata kaya na vo ni nona kawa era sa yalododonu, ki na buca ko Atama-onitai-Amani, a sa tauca vei ira mai kea na iotioti ni nona veivakalougatataki.

54 A sa rairai vei ira na Turaga, a ra sa duri cake ka vakacaucautaki Atama, a ra sa vakatokai koya ko Maikeli na turaga levu, io na agilosi liu.

55 A sa vakalougatataki Atama ena vakacegu na Turaga, ka kaya vua: Au sa lesi iko mo kena ivakatekivu; ena tubu mai vei iko na veimatanitu e vuqa; ia ko sa nodra turaga me sega ni mudu.

56 A sa tucake ko Atama ena kedra maliwa na ivavakoso; ka dina ga ni sa vakalairoro ena levu ni nona yabaki, ni sa vakasinaiti ena Yalo Tabu, sa parofisaitaka na veika ena yacovi ira na nona kawa me yacova na iotioti ni itabatamata.

57 Sa volai tu na veika kece oqori ena ivola i Inoki, ka na qai vakadinadinataki ena kena gauna.

58 Raica sa nodra itavi tale ga na Le Tinikarua, me ra tabaki ira ka vakataudeitaki ira kece na vakailesilesi ena lotu, me duavata kei na ivakatakila ka kaya vakaoqo:

59 Ki na isoqosoqo lotu i Karisito ena vanua ko Saioni, me ikuri ni lawa ni lotu me baleta na cakacaka ni lotu—

60 Au sa kaya vakaidina vei kemudou, sa kaya na Turaga ni Lewevuqa, sa dodonu me ra tu na italatala qase vakatulewa me ra vakataulewa vei ira ena itutu vakaitalatala qase;

61 Ka vakakina ko ira na bete, me ra vakatulewa vei ira ena itutu vakabete;

62 Ka vakakina ko ira na ivakavuvuli me ra vakatulewa vei ira ena itutu vakaivakavuvuli, ena ivalavala vata, ka vakakina ena dikoni—

63 Ia, mai na dikoni ki na ivakavuvuli, mai na ivakavuvuli ki na bete, mai na bete ki na italatala qase, ena nodra ilesilesi yadua, me vaka na veiyalayalati kei na ivakaro ni lotu.

64 Sa qai tiko na Matabete Levu, sa cecere duadua vei ira kece.

65 O koya, sa dodonu kina me lesi e dua mai na Matabete Levu me vakatulewa ena vukudra na matabete, ka me vakatokai ko koya me Peresitedi ni Matabete Levu ni Lotu;

66 Se, ena dua tale na yacana na Bete Levu Vakatulewa ena Matabete Levu ni Lotu.

67 Sa tu vua na kaukauwa kei na lewa kece me vakayacori kina na cakacaka vakalotu kei na veivakalougatataki ena lotu, ena veitabaki ni liga.

68 Ia, sa sega ni tautauvata kaya na ilesilesi vakabisopi; raica na bisopi sa ilesilesi me qarava na veika vakayago;

69 Ia me na digitaki e dua na bisopi mai na Matabete Levu, vakavo kevaka e coke dina sara ni kawa i Eroni;

70 Ia kevaka e sega ni coke dina sara ni kawa i Eroni ena sega ni rawa ni soli vua na idola ni matabete ko ya.

71 Ia, sa rawa me vakatikori e dua na bete levu, ena kena ivakarau vaka-Melikiseteki, me baleta na kena qaravi na veika vakayago, ia ena vakatakila vua na nona itavi na Yalo, na vu ni ka dina;

72 Ka me turaganilewa tale ga e Isireli, me qarava na cakacaka ni lotu, me lewai ira sa dau talaidredre ena ivakadinadina sa soli yani vua me vaka na lawa, me rau vukei koya na nona daunivakasala sa digitaka ko koya se ena qai digitaka mai vei ira na italatala qase ni lotu.

73 Oqo na nona itavi e dua na bisopi ka sega ni coke dina sara ni kawa i Eroni, ia sa tabaki ki na Matabete Levu ena kena ivakarau vaka-Melikiseteki.

74 Raica sa turaganilewa tale ga ko koya, io sa nodra turaganilewa na lewei Saioni, se ena iteki kei Saioni, se ena dua na taba ni lotu ka na vakatikori kina ena veiqaravi oqo, me yacova ni sa vakarabailevutaki na iyalayala kei Saioni ka sa yaco me ganita me ra tu eso tale na bisopi se turaganilewa e Saioni se ena so tale na vanua.

75 Ia ko ira kece ga sa lesi ki na itutu vakabisopi, era na vakayacora tale ga na itavi oqo.

76 Ia sa tu vua e dua na coke dina ni kawa i Eroni na dodonu vakalawa ki na mataveiliutaki ni matabete oqo, ki na idola ni veiqaravi oqo, me cakacaka vakataki koya ena itutu vakabisopi, ka sega na nona daunivakasala, vakavo ena dua na kisi ka lewai kina e dua na Peresitedi ni Matabete Levu, ena kena ivakarau vaka-Melikiseteki, me dabe kina me vaka ni turaganilewa e Isireli.

77 Ia na lewa ka vakatauca e dua vei rau na matabose oqo, me duavata kei na ivakaro ka kaya vakaoqo:

78 Au sa kaya vakaidina tale vei kemudou, sa kilikili sara me kau cake ki na matabose ni lotu, vei iratou na Mataveiliutaki ni Matabete Levu, na veicakacaka bibi, kei na kisi dredre kece ni lotu, kevaka e sega soti ni dodonu na ka sa lewa kina na bisopi se ko ira na turaganilewa.

79 Ia sa tu vei iratou na Mataveiliutaki ni matabose ni Matabete Levu na kaukauwa me ratou kacivi ira na bete levu tale eso, o ira sara mada ga na tinikarua, me ra veivuke vakadaunivakasala; ia sa tu na kaukauwa vei iratou na Mataveiliutaki ni Matabete Levu kei ira na nodratou ivukevuke, me ratou vakatauca na lewa ena vuku ni vakadinadina me vaka na lawa ni lotu.

80 Ia ni sa tau oti na lewa oqo sa na sega tale ni nanuma na Turaga; ni sai koya oqo na matabose cecere duadua ni lotu ni Kalou, ia sa na vakabau ga na lewa e vakatauca ena duidui ni vakasama, me baleta na veika vakayalo.

81 Na tamata kecega sa lewe ni lotu, sa vauci ena lewa ni matabose ni lotu oqo.

82 Ia kevaka sa talaidredre e dua na Peresitedi ni Matabete Levu, sa na lewai tale ga ena matabose levu ena lotu, io eratou na veivuke kina e tinikarua na daunivakasala mai na Matabete Levu;

83 Ia sa na vakabau ga na lewa eratou sa tauca ki uluna, ena duidui eso me baleti koya.

84 Sa macala e keri ni sa vauci na tamata kecega ena lewa dodonu kei na lawa ni Kalou, raica sa kilikili me vakayacori na ka kecega ena kena ivakarau dodonu, kei na vakarokoroko, me vaka na dina kei na dodonu.

85 Kei na dua tale, au sa kaya vakaidina vei kemudou, na itavi ni peresitedi ena itutu ni dikoni sai koya me na vakatulewa vei iratou na dikoni e le tinikarua, me bose vata kei ira, ka vakavulici ira ena nodratou itavi, ka ra veivakatataki cake vakataki ira, me vaka sa virikotori ena veiyalayalati.

86 Ka sa vakatalega kina na nona itavi na peresitedi ena itutu ni ivakavuvuli sai koya me vakatulewa vei iratou na ivakavuvuli e le ruasagavulu kava, me bose vata kei ira, ka vakavulica vei ira na itavi ni nodra itutu me vaka sa virikotori ena veiyalayalati.

87 Sa itavi talega ni peresitedi ena Matabete i Eroni, me vakatulewa vei iratou na bete e le vasagavulu kawalu; me bose vata kei ira, ka vakavulica vei ira na itavi ni nodra itutu me vaka sa virikotori ena veiyalayalati—

88 Ia sa dodonu me bisopi ko koya na peresitedi oqo; ni oqo e dua na itavi ni matabete ko ya.

89 Sa nona itavi na peresitedi ena itutu vaka italatala qase, me vakatulewa vei iratou na italatala qase e le ciwasagavulu kaono, me bose vata kei ira, ka vakavulici ira me vaka sa virikotori ena veiyalayalati.

90 Na mataveiliutaki oqo e duatani mai na kena ena vitusagavulu, ka nakiti na ilesilesi oqo vei ira era sega ni la’ki vunau yani ki na veivanua e vuravura.

91 Kei na dua tale, na itavi ni Peresitedi ni itutu ni Matabete Levu sai koya me vakatulewa me baleta na lotu taucoko, ka me vakataki Mosese—

92 Raica, oqo na yalomatua; io, me daurairai, dauvakatakila, dauvakavakadewa, ka parofita, ka tu vua na isolisoli kece ni Kalou ka solia vua na iliuliu ni lotu.

93 Ia me vaka na raivotu sa vakatakilai kina na ivakarau ena Vitusagavulu, sa dodonu me vitu na peresitedi me ra vakatulewa vei ira, me ra digitaki mai vei ira na lewe vitusagavulu;

94 Ia me dua vei iratou na lewe vitu na peresitedi oqori, me vakatulewa tiko vei iratou na lewe ono;

95 Ia ko iratou yadua na peresitedi e vitu oqori, me ratou digitaka e le vitusagavulu tale, ka me ratou dui kena iliuliu;

96 Kei na so tale na vitusagavulu me yacova yani ni sa vitu na le vitusagavulu, kevaka e gadrevi vakakina ena vuku ni cakacaka e tu me caka ena were ni vaini.

97 Ia me ratou lako yani na le vitusagavulu oqo ka vunau voli, io me liu vei ira na Matanitu Tani, qai muri vei ira na Jiu.

98 Ia ko ira na vo ni vakailesilesi ena lotu, ka ra sega ni Le Tinikarua, se na Vitusagavulu, e sega ni nodra itavi me ra lako yani vei ira na veimatanitu, ia me ra na lako yani kevaka ena gadrevi vakakina, e dina ga ni ra na taura tu beka e so na ilesilesi torocake sara ena lotu.

99 Ia, sa kilikili ki na tamata yadua me vulica na nona itavi, io me vakayacora ena yalodina na itavi ni itutu sa lesi kina.

100 Ia ko koya sa vucesa, sa sega ni dodonu me vakaitutu, io ko koya tale ga sa sega ni vulica me kila na nona itavi, ka sega ni vakadinadinataki ena nona cakacaka ni ganiti koya, sa sega tale ga ni kilikili me vakaitutu. A sa vakakina. Emeni.