1 Ɔbɛsɛ ne da a otsĩa ebiasa, wɔ afe apem ahaakron eduawɔtwe, metsena me dan mu ^arodwendwen kyerɛwsɛm no ho;

2 Nna morodwendwen ^awerdam kɛse no a Nyame ne Ba no bɔe dze ^bpoon wiadze;

3 Nye ^aɔdɔ kɛse na ɔdɔ nwanwa a Egya na Ɔba no kyerɛe wɔ ^bPomfo no no wiadze mbae mu.

4 Dɛ ɔnam no ^awerdambɔ no do, nna sɛ yɛyɛ ^bsetsie ma asɛmpa ne nkyerɛkyerɛ no a, adasamba benya nkwagye.

5 Ber a mugu do rodwendwen dɛm no, m’adwen twee kesii Ɔsomafo Peter ne kyerɛwsɛm no, nye ^atsetse ahotseweefo no a wɔbɔɔ hɔn petsẽe ^bPontus, Galatia, Cappadocia, na Asia mbea bi so do no do, hɔ na ber a wɔbɔɔ Ewuradze mbeamudua mu ekyir no wɔkãa asɛmpa no.

6 Mubuee Bible no na mekenkaan Peter nwoma a odzi kan no tsir ebiasa na anan, na ber a mekenkanee no asɛm a odzi do yi tɔɔ mo do ara yie, seen dza da biara mekenkan a ɔyɛ me no:

7 “Osiandɛ Christ so hun bɔn ho amandze prɛko, nyia ɔtsen hunii maa hɔn a wɔnntsen, ama ɔdze hɛn aakɔ Nyankopɔn nkyɛn; wokum no honam mu, na wɔmaa onyaa nkwa wɔ sunsum mu;

8 Ɔno mu so na ɔnam kɔree kɛkãa asɛm kyerɛɛ esunsum a wɔwɔ ^aefiadze a,

9 Tsetseber no wɔyɛɛ asoɔdzen, wɔ ber a Nyame ne penkyɛr tweɔnee no, wɔ Noah nda no a wɔrepam hɛn no mu, no mu na, akra kakra, mekyerɛ baawɔtwe, nyaa nkwa wɔ nsu no mu” (1 Peter 3:18–20).

10 “Na iyi ntsi na asɛmpa no wɔkãa kyerɛɛ ewufo no so, ama woeebu hɔn atsɛn dɛ nyimpa a wɔwɔ honam mu, na wɔaatsena ase dɛ mbrɛ Nyame tse wɔ sunsum mu.” (1 Peter 4:6).

11 Na ber a morodwendwen dɛm ndzɛmba yinom a ^awɔakyerɛw ho no, wobuee me ^bntseasee enyiwa, na Ewuradze no Sunsum ^cbesii mo do, na muhun ^dewufodɔm, nkakraba nye akɛse.

12 Na hɔn esunsum a wodzii ^apɛrpɛr dɔmtutuw a obi nntum nnkan hɔn; hɔn a wodzii Jesus no ho dase ^bnokwar mu ber a nna wɔtse atseneneefo mu no aboa hɔn ano wɔ fakor;

13 Na hɔn na wɔbɔɔ ^aafɔr wɔ Nyankopɔn ne Ba n’afɔrbɔ kɛse no ne saso do, na ^bwɔsɔɔw abɛbrɛsɛ wɔ hɔn Pomfo ne dzin mu.

14 Woyinom nyina efi ɔnnkyebo asetsena mu, na wɔnam Nyame ^aEgya na ne ^bBa a Wɔwoo no Kortoo no no hɔn ^cadom do nyaa ^denyidado a osi pi wɔ enyimnyam ^ewusoɛr no mu.

15 Muhun dɛ ^aenyigye dɛw na ahyɛ hɔn mã, na wɔabɔ mu ridzi ehurusi osiandɛ hɔn ɔgye da no abɛn.

16 Woehyia mu rotweɔn Nyame ne Ba no ne mbae a, ɔreba ^asunsum wiadze abɛda no edzi akyerɛ hɔn dɛ ɔapon hɔn efi owu ne ^bnkyehoma mu no.

17 Wɔdze bɛma hɔn huntuma a wɔadeda no ^aasan aba no bɔbea a odzi mu no mu, na ^bmbiew besi mbiew enyim, na ntsin na honam aaba ho, na ^csunsum na nyimpadua bɔbɔ mu, na hɔn mu nnkɛtsetsew bio, ama woetum enya ^denyigye ne mãhyɛ.

18 Ber a dɔmtutuw no rotweɔn na woridzi nkɔmbɔ, woridzi ehurusi wɔ dɔn a wɔbɛgye hɔn efi owu no mpokyerɛ mu no, Nyame ne Ba no puee hɔ, ɔbɔɔ ^aahotɔ ho dawur kyerɛɛ, ndɔmmumfo a wodzii nokwar no;

19 ^aƆkãa ^basɛmpa a ɔwɔ hɔ daapem no kyerɛɛ hɔn, owusoɛr ho nkyerɛkyerɛ no nye adasa hɔn ^casehwe ho mponee, na mponee efi ankorankor biara no bɔn ho wɔ ^dnnuhu ngyinado ho.

20 Mbom ɔannkɔ ^aemumuyɛfo hɔ, nna hɔn a wɔannsom Nyame nye hɔn a woennu hɔnho na hɔn a ^bwoguu hɔnho fĩ wɔ ber a wɔwɔ honam mu no, wɔamma ne ndze do wɔ hɔn mu;

21 Nna etuatsewfo no a wɔpoow tsetseberdo nkɔnhyɛfo no hɔn dasegye na kɔkɔbɔ no ennhu no, nna eso wɔannhwɛ n’enyim.

22 Bea a woyinom wɔ no, ^asum ahyɛ hɔ mã, na atseneneefo no mu dze, ^basomdwee ara nko;

23 Na ahotseweefo no dzii dɛw wɔ hɔn ^apon no ho, nna wobuu ^bntwɛr na wɔgyee too mu dɛ Nyame ne Ba no yɛ hɔn Pomfo na Ɔgyefo fi owu na hɛl ^cnkɔnsɔnkɔnsɔn mu.

24 Hɔn enyim hyerɛnee, na Ewuradze n’enyim ^akan no tɔɔ hɔn do, na ^bwɔtoow ayɛyi ndwom maa ne dzin krɔnkrɔn no.

25 Mo ho boow me, osiandɛ metsee dɛ Agyenkwa no yɛɛ ne ɔsomdwuma bɛyɛ mfe ebiasa wɔ Jewfo nye hɔn a wɔyɛ Israelfifo no mu, ɔbɔɔ mbɔdzen kyerɛkyerɛɛ hɔn asɛmpa a ɔwɔ hɔ daapem no na ɔato nsa afrɛ hɔn akɔ nnuho mu;

26 Naaso, no ndwuma akɛse, nye anwanwadze, nye ^atum na tumdzi a ɔyɛe dze bɔɔ nokwar no ho dawur nyina ekyir no, mbom nyimpa kumaabi na wotsie ne ndze, na wodzii dɛw wɔ n’enyim, na wonyaa nkwagye wɔ ne nsamu.

27 Mbom ɔdze ^amber kumaabi yɛɛ no ɔsomdwuma no wɔ ewufo mu, fitsi mbeamuduamubɔ no do dze kesi no wusoɛr no;

28 Na Peter ne nsɛm a ɔkãe no yɛɛ me ahobow—dza ɔsee dɛ Nyame ne Ba kɔree kɛkãa nyamesɛm kyerɛɛ esunsum a wogu efiadze, hɔn a mber bi wɔyɛɛ asoɔdzen, wɔ mber bi no a Nyankopɔn ne penkyɛr tweɔnee wɔ Noah n’aber do—na mbrɛ osii kãa asɛmpa no kyerɛɛ dɛm esunsum no, na odzii dwuma a no ho hia wɔ hɔn mu dɛm mber tsiabaa no.

29 Na me ahobow mu no, m’enyiwa buei, na me ntseasee nyaa ^ankenyan, na muhun dɛ Ewuradze nankasa ɔannkɔ emumuyɛfo na asokyewfo no a wɔpoow nokwar no hɔn mu, dɛ ɔrekɛkyerɛkyerɛ hɔn;

30 Mbom hwɛ, oyii binom fii atseneneefo no mu, ɔboaboaa no dɔm ano na oyii asomafo, na ɔdze ^atum na tumdzi, ɔmaa hɔn tum dɛ wɔmfa asɛmpa ne kan no nkɛma hɔn a wɔwɔ ^bsum no mu, ^cnyimpa esunsum nyina mpo; na dɛm kwan no do na wɔnam dze kãa asɛmpa no kyerɛɛ ewufo no.

31 Na asomafo a wɔasan mu eyi hɔn no kɔree kɛdaa Ewuradze ^an’enyisɔ da no edzi na wɔbɔɔ ^bahotɔ ho dawur kyerɛɛ ndɔmmumfo a wɔakyekyer hɔn no, nye hɔn so a wobonu hɔnho na wɔagye asɛmpa no mpo.

32 Dɛm na wɔnam kãa asɛmpa no kyerɛɛ hɔn a woennya no ho ^anyimdzee na ^bwowui wɔ hɔn bɔn mu, anaadɛ hɔn a wɔpoow nkɔnhyɛfo no na wowui wɔ hɔn mbrato mu no.

33 Woyinom na wɔkyerɛkyerɛɛ hɔn ^agyedzi wɔ Nyame mu, bɔn ho nnuho, hɔn a ^bwonuma hɔn ma ewufo dze kɔ ^cbɔnfakyɛ mu, ^dnsa a wɔdze gu tsir do dze nya Sunsum Krɔnkrɔn n’akyɛdze no,

34 Nye asɛmpa ne fapem nyina so a no ho hia a ɔsɛ dɛ wohu ana wɔafata ma ^awoeebu hɔn atsɛn dɛ nyimpa a wɔwɔ honam mu, ma wɔaatsena ase dɛ mbrɛ Nyame ne pɛ tse wɔ sunsum mu.

35 Na dɛm na wɔdaa no edzi wɔ ewufo mu, nkakraba na akɛse nyina, hɔn a wɔnntsen nye agyedzifo nyina, dɛ ɔpon nam Nyame ne Ba ^an’afɔr a ɔbɔe wɔ ^bmbeamudua no do no aba.

36 Dɛm na wɔmaa muhunii dɛ Ɔpomfo no ne mber a odzii wɔ esunsum wiadze hɔ no ɔdze kyerɛkyerɛe na osiesiee ^ankɔnhyɛfo agyedzifo a wɔgyee no ho dase wɔ honam mu no esunsum;

37 Aama wɔdze ɔpon ho nsɛm no aakɛma ewufo nyina, hɔn a osian hɔn ^aetuatsew na mbrato no ntsi nankasa enntum annkɔ hɔn nkyɛn no, ama ɔnam no nkowaa hɔn ɔsomdwuma no do hɔn so wɔaatse ne nsɛm no.

38 Etsitsir na ekunyim a wohyiaa mu no hɔn mu kor nye Egya ^aAdam, nyia ne Nda fir Tsetse no na adasa nyina egya no,

39 Nye hɛn Nã ^aEve onyimnyamfo no, nye ne mbabaa agyedzifo piinara a wɔtsenaa ase mfe pii na wɔsoom Nyame tseasefo nokwafo no.

40 ^aAbel, ^bmogyadasefo a odzi kan no, nye ne nuabanyin ^cSeth; a ɔyɛ ekunyinfo no mu kor, a ^dɔsɛ n’egya Adam papaapa no.

41 ^aNoah, nyia ɔbɔɔ nsuyirii ho kɔkɔ no; ^bShem, ^cɔsɔfopanyin kɛse no; ^dAbraham, agyedzifo hɔn egya no; ^eIsaac, ^fJacob na ^gMoses, Israel hɔn mbramafo kɛse no;

42 Nye ^aIsaiah, nyia ɔdaa no edzi dɛ wɔasera Ɔpomfo no ngo na ɔmbɔ ahotɔ ho dawur nkyerɛ ^bndɔmmumfo, no na ombue hɔn a wɔakyekyer hɔn egu ^cefiadze no hɔn mbobow no so wɔ hɔ bi.

43 Na ^aEzekiel, nyia onyaa enyido-adzehu na ohun bɔnsa bi a ^bmbiew a no ho akokwa gu mu a wɔdze honam bɛkata ho a, owusoɛr ber no ^cwɔbɔsoɛr bio, dɛ akra atseasefo no;

44 ^aDaniel a odzii kan hunii na ɔkãa dɛ wɔbɛkyekyer ^bNyankopɔn n’ahenman wɔ nda a odzi ekyir no mu no, na wɔnnkɛsɛɛ no bio, eso wɔnnkɛfa ama nyimpa biara no;

45 ^aElias, nyia nna ɔnye Moses wɔ ^bNɔsakyeree Bepɔw do no;

46 Nye ^aMalachi, nkɔnhyɛnyi no a ɔkãa dɛ ^bElijah bɛba no—nyia Moroni so kãa no ho asɛm kyerɛɛ Joseph Smith no, daa no edzi dɛ ɔbɛba ansaana Ewuradze ne ^cda kɛse huhuuhu no aba no—hɔn so wɔ hɔ bi.

47 Nkɔnhyɛnyi Elijah na ɔdze anohoba a wɔbɔe kyerɛɛ egyanom no bɛhyɛ mba hɔn ^aakoma mu,

48 Ɔkyerɛ ^adwuma kɛse a ndaamba wobedzi wɔ Ewuradze ne ^btemple horow no mu wɔ ^cmberano ne mãhyɛ mu, dze apon ewufo nkwa, na wɔdze ^dasɔw mba ano ama hɔn awofo amma wɔaammfa ndom annsɛɛ wiadze nyina wɔ ne mbae no mu.

49 Woyinom nyina nye dodowara so, nye ^ankɔnhyɛfo so mpo a, wɔtsenaa Nephifo mu na wɔgyee dase wɔ Nyame ne Ba ne mbae ho no, hɔn nyina fora dɔmtutuw no a, nna woehyia mu na wɔrotweɔn hɔn ɔgye da no.

50 Osiandɛ ewufo no ahwɛ kwan akyɛr, ofi ber a hɔn ^aesunsum twee hɔnho fii hɔn honandua mu dɛ wɔwɔ ^bnkowaasom mu.

51 Woyinom na Ewuradze kyerɛkyerɛɛ hɔn, na ɔmaa hɔn ^atum ma no wusoɛr ekyir no, wonyanee fii ewufo mu, na wɔkɛhɛɛn n’Egya n’ahenman mu no, hɔ na wɔdze ^bbɛkyebo ahenkyɛw na ^connyiewiei nkwa bɛma hɔn.

52 Na ofi dɛm mber dze kɔ no, wɔbɔsɔw hɔn dwumadzi no do dɛ mbrɛ Ewuradze bɔɔ ho anohoba no, na woeenya kyɛfa wɔ ^anhyira nyina a woesiesie ato hɔ ama hɔn a wɔdɔ no no.

53 Nkɔnhyɛnyi Joseph Smith nye m’egya, Hyrum Smith, Brigham Young, John Taylor, Wilford Woodruff, nye esunsum binom so a wɔasan mu eyi hɔn a ^awoesiesie hɔn esie dɛ wɔbɛba wɔ ne mberano mu ebosuo mu ma wɔaatow dwuma a wobedzi wɔ da kɛse a odzi ekyir mu ne ^bfapem,

54 A temple ne nsisii, na ayɛdze ne nyɛe wɔ mu dze apon ^aewufo nkwa no, hɔn so wɔ sunsum wiadze no mu kã ho.

55 Muhun dɛ hɔn so wɔfora ^aakɛsefo na etsitsir no a ^bwɔsaan mu yii hɔn ahyɛse no dɛ wɔmbɛyɛ Nyankopɔn N’Asɔr no do ahwɛfo no.

56 Ansaana wɔrobɔwo hɔn no mpo, nna hɔn nye binom so, nsa akã hɔn adzesuadze a odzi kan no wɔ esunsum wiadze na ^awosiesiee hɔn dɛ wɔbɛba wɔ Ewuradze ne ^bmber a wɔahyehyɛ ato hɔ no mu abɛyɛ edwuma wɔ no ^cwenyin ture mu dze ama akra eenya nkwagye.

57 Muhun dɛ ^aelderfo agyedzifo a wɔwɔ mberano yi no mu no, sɛ wofi asetsena a ɔnnkye bo no mu a, wɔnam Nyame ne Ba a Wɔwoo no Kortoo no no werdambɔ no do sɔw hɔn edwuma do kã asɛmpa no a ɔfa nnuho na ɔpon ho no wɔ hɔn a wɔwɔ ^bsum mu na wɔhyɛ bɔn nkowaasom ase wɔ ewufo esunsum wiadze kɛse no mu.

58 Ewufo a wonu hɔnho no, wɔnam Nyankopɔn ne fie mu ^ayɛdze ho setsie do ^bwɔbɔpon hɔn.

59 Na sɛ wotua hɔn mbrato ho kaw no wie, na ^awɔhohor hɔn ma hɔn ho tsew a, hɔn nsa bɛkã hɔn akatua dɛ mbrɛ hɔn ^bndwuma tse, osiandɛ wɔyɛ nkwagye mu adzedzifo.

60 Dɛm na woyii enyido-adzehu a ɔfa ewufo hɔn ɔpon ho no kyerɛɛ me, na megye dase, na minyim dɛ dɛm dasegye yi yɛ ^anokwar, ɔnam hɛn Ewuradze na Agyenkwa, Jesus Christ ne nhyira do, ɔnyɛ dɛm so. Amen.