Ɔfã 119
Nyikyerɛ a wɔnam Joseph Smith Nkɔnhyɛnyi no do dze mae, wɔ Far West, Missouri, Ayɛwoho 8, 1838 ɔyɛ mbuae a wonyae wɔ hɔn ebisadze: “O Ewuradze! Kyerɛ wo nkowaa ahodze dodow a Epɛ dɛ wɔdze tua hɔn ebupɛn du.” Wɔammfa ebupɛn du mbra dɛ mbrɛ yɛtse ase ndɛ da yi amma Asɔr no dada ansaana nyikyerɛ yi reba. Dɛm Kasafua ebupɛn du yi a ɔwɔ mpaabɔ a wɔaserɛ akã sesei nye dza ɔwɔ nyikyerɛ a nsa akã dada (64:23; 85:3; 97:11) no mu no nnkyerɛ nkyɛmu du no mu kor ara, na mbom ɔkyerɛ afɔrbɔdze nyinara a ofi akoma mu, anaadɛ tow a yetua dze to Asɔr no foto mu. Ahotseweefo no enya sikasɛm ho ɔhaw kɛse wɔ Missouri na Ohio osian Kirtland Temple ne nsii; atseetsee wɔ Jackson County, Missouri; na ɔman mu no nyina sikasɛm ho esian ekyir no, nna nyikyerɛ yi bae. Nna ahotseweefo no rokɔ do rekyekyeer sɔn ahorow wɔ Missouri.
1–5, Ɔwɔ dɛ Ahotseweefo no dze hɔn ahodze a ɔabor do no ma, na nkyii mfaso a wobenya wɔ hɔn dwuma a wobedzi wɔ afe no mu no, wɔkyɛ mu du, na wɔdze kor etua hɔn ebupɛn du; 6–7, Dɛm nyɛe yi bɛtsew Zion asaase ho.
1 Nokwar, dɛm na Ewuradze se, mepɛ dɛ hom dze hom ahodze a abor hom do nyina hyɛ bishop a ɔwɔ m’asɔr mu wɔ Zion ne nsa,
2 Ma wɔdze si me fi, na wɔdze atow Zion ne fapem na wɔdze ama asɔfodzi no, na wɔdze etua President a Odzi Kan na n’Apamfo a wɔwɔ m’asɔr mu no hɔn akaw.
3 Na iyi bɛyɛ mo nkorɔfo hɔn ebupɛn du n’ahyɛse.
4 Na iyi ekyir no, hɔn a woetua ebupɛn du no botua hɔn mfaso no mu nkyɛmu du no mu kor afrenhyia biara; na iyi bɛyɛ mbra a ɔbɔwɔ hɔ ama hɔn afebɔɔ, dze ama m’asɔfodzi krɔnkrɔn no, Ewuradze na ɔse.
5 Nokwar, mese hom dɛ, ɔbɛba dɛ hɔn a wɔaboa ano wɔ Zion asaase do nyinara dze dza abor hɔn ahodze do no bɛyɛ hɔn ebupɛn du etua, na ɔwɔ dɛ wodzi dɛm mbra yi do, ɔnntse dɛm a, wonndzi mu a ɔsɛ dɛ wɔtsena hom mu.
6 Na mese hom dɛ, sɛ mo nkorɔfo enndzi dɛm mbra yi do, na woennsie no krɔnkrɔn, na woenndua dɛm mbra yi do ammfa anntsew Zion asaase ho amma me, ama me nhyehyɛɛ na m’atsɛmbu enntsim, aama hɔ ayɛ krɔnkrɔn mapã, hwɛ, nokwar, mese hom dɛ ɔrennyɛ Zion asaase mma hom.
7 Na iyi bɛyɛ mfatoho ama stake a wɔwɔ Zion nyinara. Ɔnyɛ hɔ dɛm. Amen.