1 O Nyankopɔn, ewɔ hen? Hen na wo ntamadan a ɔkata wo ^asumabew do no wɔ?

2 Ibesianka wo nsa ^aekodu dabɛn; na w’enyi, nyew, w’enyi buroburo no, ebɔtweɔn ekodu dabɛn na efi onnyiewiei ɔsorsor no mu ahwɛ bɔn a wɔdze reyɛ wo nkorɔfo nye wo nkowaa, na ama hɔn sufrɛ ehwira w’asomu?

3 Nyew, O Ewuradze, wobohu dɛm amandze yi na wɔasɔw dɛm atseetsee a ɔmmfa mbra kwan mu yi ^aekodu dabɛn ansaana ayamuhyehye ahyɛ w’abadaa mu wɔ hɔnho?

4 O Ewuradze Nyankopɔn ^aTumfo, sor nye asaase, nye po, nye dza ɔwɔ mu nyina yɛfo, ɔwo na ewɔ tum na ehyɛ abɔnsam nye sheol sum kebii do—tsen wo nsa; ma w’enyi nhwira; ma wonyi wo ntamadan no mfi hɔ; fi wo ^bsumabew do pue; kyea w’aso, ma w’akoma ngow, na ma ayamuhyehye nhyɛ w’abadaa mu wɔ hɛn ho.

5 Ma w’ebufuhyew ndzɛw ntsia hɛn atamfo; na w’akomahyew mu no, fa wo nkrantsee ^adzi hɛn atamfo wer wɔ bɔn a wɔdze reyɛ hɛn ho.

6 Kaa w’ahotseweefo a woruhu amandze yi, O hɛn Nyankopɔn; na wo nkowaa bedzi dɛw wɔ wo dzin mu afebɔɔ.

7 Me ba, asomdwee nkã wo kra; ^aw’akotorka na w’amandzehu no, ɔnnkɛkyɛr;

8 Na afei, sɛ ^aesɔw no yie a, Nyankopɔn bɛma wo do wɔ sor; na ibedzi konyim wɔ w’atamfo nyina do.

9 ^aW’anyɛnkofo gyina w’afã, na wɔdze enyigye akoma na ɔdɔ nsa bohuhor wo bio.

10 Innyae nnyɛɛ dɛ ^aJob; w’anyɛnkofo nnkasa nntsia wo, nna wɔnnkã so dɛ wo mbrato so ntsi a, dɛ mbrɛ wɔdze yɛɛ Job no.

11 Na hɔn a wɔse dɛ osian wo mbrato ntsi no, hɔn enyidado bɛpa na dza woesusu no bɛnan dɛ ma ewia orupue no ne kan a ɔredzɛw no renan ^aesukwankyɛba no;

12 Na Nyankopɔn so ama ne nsa do esi no pi resesã ^amber na hyɛber, na oefura hɔn adwen, amma woeenntum anntse n’anwanwadze ase; ama ɔaasɔ hɔn ahwɛ so, na ne nsa aakã hɔn wɔ hɔnankasa hɔn nyansaa na ndaadaa kwan do;

13 Na osiandɛ hɔn akoma aporɔw ntsi, ndzɛmba a wɔpɛ dɛ ɔba binom do, na wɔdɔ dɛ binom hu amandze no, bɛba ^ahɔnankasa hɔn do pɛpɛɛpɛ.

14 Ama hɔn sẽ aafem so, na hɔn enyidado so aapa.

15 Na ɔnnkɛkyɛr biara na woedwuw hɔn asefo nyina efi wi ase ha, Nyankopɔn na ɔse, na hɔn mu kor mpo rennka a ɔtse ase.

16 Ndom nkã hɔn a wɔbɛma hɔn anantsir do etsia nyia ^amasera no ngo, Ewuradze na ɔse, na wosũ dɛ ^bwɔayɛ bɔn, ber a wɔnnyɛɛ bɔn biara wɔ m’enyim, Ewuradze na ɔse, mbom wɔayɛ dza ɔtsen wɔ m’enyim, nye dza mehyɛɛ hɔn no.

17 Mbom hɔn a wosũ mbrato ho no yɛ dɛm osiandɛ wɔyɛ bɔn no nkowaa, na hɔnankasa so wɔyɛ ^aasokyew mba.

18 Hɔn na wɔkã ator ntam tsia mo nkowaa, ama woeetum dze hɔn aba ndɔmmum ase na owu mu—

19 Wondue, osiandɛ ^awɔafom mo mbɔdomaba ntsi wɔnnkɛma hɔn kwan ma hɔn nsa akã ^bayɛdze wɔ me fi mu.

20 Hɔn ^ankɛntsɛn rennyɛ mã, hɔn efi na hɔn asan bɛsɛɛ, na hɔn a wɔdaadaa hɔn no bobu hɔn enyimtsia.

21 Worinnya ^aasɔfodzi mu kyɛfa, hɔn nye hɔn asefo fi ebusuasantsen kesi ebusuasantsen.

22 Nkyɛ ^aobeye ama hɔn dɛ wɔdze ewuyambo bɛsɛn hɔn kɔn mu na wɔatow hɔn akyen po no bun mu.

23 Wondue, hɔn a wɔhaw mo nkorɔfo, na wɔpam hɔn na wokum hɔn, na wɔgye dase tsia hɔn, Dɔm Ewuradze na ɔse, ^aehurutsia ebusuasantsen no rimmfi hɛl afɔbu no mu.

24 Hwɛ, m’enyi ^ahu na minyim hɔn ndwuma nyina, na mowɔ ^batsɛmbu ɔbɛba ntsɛmara a medze esie ama hɔn nyina wɔ ne hyɛber mu;

25 Na woeetu ^amber bi esi hɔ ama nyimpa biara, dɛ mbrɛ no ^bndwuma tse no.

26 Nyankopɔn nam no ^aSunsum Krɔnkrɔn do bɛma hom ^bnyimdzee, nyew, ^cSunsum Krɔnkrɔn n’akyɛdze a onnyi kabea no do, dza wonnyii nnkyerɛe fi ber a wɔbɔɔ wiadze dze besi sesei no;

27 Dza hɛn egyanom aper atweɔn mber tsentsen dɛ wɔbɛda no edzi akyerɛ wɔ mber a odzi ekyir no mu, dza abɔfo twee hɔn adwen gyinaa do no, dɛ wɔdze esie ama hɔn enyimnyam ne mãhyɛ no;

28 Mber bi bɛba a wɔremmfa ^abiribiara nnsuma, sɛ Nyame kor anaa ^benyame pii na wɔwɔ hɔ a, wɔbɛda no edzi akyerɛ.

29 Ahengua na ahenman, mpanyindzi na etum nyina ^awɔbɛda no edzi ama hɔn a wogyinaa akokodur mu dze maa Jesus Christ n’asɛmpa no.

30 Na sɛ wɔdze ^apampi so esisi sor anaa po, anaa asaase kɛsɛɛ, anaa ewia anaa bosoom, anaa nworaba ano a—

31 Hɔn mber a wɔdze kyin hɔnho nyina, nda nyina a wɔdze esi hɔ, abosoom, mfe nyina ne nhyehyɛɛ nye nda nyina hɔn nda, abosoom, na mfe na hɔn nda mu nda nyina, abosoom na mfe, na hɔn enyimnyam nyina, mbra, na mber a wɔahyehyɛ ato hɔ nyina, wɔbɛda no edzi wɔ ^amberano nda ne mãhyɛ mu—

32 Dɛ mbrɛ wɔhyɛɛ no wɔ Onnyiewiei ^aNyankopɔn ^bAbaguafo a wɔbɔ enyame nyina do hɔn finimfin no ansaana wɔrobɔ wiadze yi no, dɛ wɔdze besie ekesi dɛ ɔrokɔ n’ewiei nye ewiei ber a nyimpa biara bɛhɛn ^cn’onnyiewiei enyim na ɔbɛhɛn ne bɛkyebo ^dahomgye mu no.

33 Nsu a ɔrepem bɛda ho afon ekesi aber bɛn? Ebɛn tum na obotum esanka sor? Dɛ sɛ nyimpa botum atsen n’abasa a ɔyɛ mberɛw dze esianka Esutsen Missouri wɔ no kwan a ɔpem mu no, anaa wɔadan no ma wɔapem akɔ etsifi afamu mu mpo a, onnkotum esiw Otumfo kwan dɛ mma onnhue ^anyimdzee mmfi sor nngu Nda a Odzi Ekyir Ahotseweefo hɔn tsir do.

34 Hwɛ, ^awɔbɛfrɛ dodowara, na mbom kumaabi na ^bwɔbɛsan mu eyi hɔn. Na ebɛnadze ntsi na wɔrennsan mu nnyi hɔn?

35 Osiandɛ hɔn akoma dzi ^awiadze ndzɛmba ekyir, na wɔper hwehwɛ ^bnyimpa hɔ enyinyam ntsi, wonnsũa dɛm adzesũa kor yi—

36 Dɛ ^akyɛfa a ɔwɔ asɔfodzi no mu no nye ^bsor tum no fam ho, na wonnkotum ahyɛ ɔsor tum do anaa wɔdze edzi dwuma gyedɛ wɔnam ^ctsenenee fapem kwan do.

37 Dɛ wɔdze bɛma hɛn no dze, ɔyɛ nokwar; na mbom sɛ yɛyɛ dɛ ^ayɛkata hɛn ^bbɔn do, anaadɛ yɛma hɛn ^cahantanyɛ, nye hɛn nsusui hun ho kwan, anaadɛ yɛhwɛ anaa yedzi hɔn do tum dze haw adasamba hɔn akra wɔ akwan biara a ɔnntsen do a, hwɛ, ɔsorsor ^dtwe hɔnho; Ewuradze no Sunsum dzi yaw; na sɛ ɔtwe noho a, Amen nkã dɛm nyimpa no n’asɔfodzi anaa ne tumdzi no.

38 Hwɛ, afei n’enyi bɛba no ho no, nna woegyaa ne bra ahyɛ nankasa ne nsamu, dɛ ^aɔbɔwɔ dadzepoma ano ntsia, ^bɔatseetsee ahotseweefo, na ɔakõ etsia Nyankopɔn.

39 Ntɔhunii yaayaw a yeehu kyerɛ dɛ, ɔyɛ nyimpa dodowara hɔn ^aawoo su na bɔbew dɛ, sɛ wonya tumdzi kakra bi a, dɛ mbrɛ wɔdwen no a, wɔhyehyɛ hɔnho ntsɛmara, dɛ wɔreyɛ dza ɔnntsen dze atseetsee hɔn a wɔhwɛ hɔn do no.

40 Dɛm iyi ntsi wɔafrɛ dodowara, mbom wɔbɛsan mu eyi kumaabi.

41 Tum anaa nhyɛdo biara nnyi hɔ a ɔwɔ dɛ osian asɔfodzi no ntsi wɔgye to mu, gyedɛ wɔnam ^andzɛfɛdzɛfɛw, nye ^bpenkyɛr, nye botooyɛ, nye ɔdwe mu, nye ɔdɔ mapã kwan do nhwɛ hɔn do;

42 Ɔnam ayamuyie, na nyimdzee mapã do a ɔbɛma ɔkra enyin a ^aenyidosomkyerɛ nye ^bndabraba biara mmbata ho—

43 Sɛ Sunsum Krɔnkrɔn no kenyan wo a, fa ndamyɛ ^akã enyim mber pa mu, na ekyir no nya ^bɔdɔ kɛse ma nyia akã n’enyim no, amma ɔaanndwen dɛ eyɛ ne tamfo;

44 Ama oeehu dɛ wo nokwar dzi mu yɛ dzen sen owu ntampehoma.

45 Ma ayamuyie nhyɛ w’abadaa mu mã, a onngyaa da mfa mma nyimpa nyina, nye gyedzi fifo no, na ma ^aɔbrapa nsiesie ^bw’adwen mu a onngyaa da, nkyii w’awerɛhyɛmu wɔ Nyame enyim bɛhyɛ dzen; na asɔfodzi ho nkyerɛkyerɛ mu ndzepa no bɔsosɔ wo kra do tse dɛ ^cbɔw a ofi sor.

46 Na ibenya ^aSunsum Krɔnkrɔn no n’anyɛnkoyɛ no aber nyina, na ^bw’ahempoma bɛyɛ ahempoma a ɔnnsakyer wɔ tsenenee na nokwar mu; na w’ahendzi bɛyɛ ahendzi a ɔwɔ hɔ daapem na ɔbɛpem egu wo do efi afebɔɔ kesi afebɔɔ a ɔnnam nhyɛ kwan biara do.