1 Hom ntsie Jesus Christ, hom Pomfo no ndze, Okokroko Emi Mara no, nyia n’ehumbɔbɔr abasa abɔ werdam dze etua hom bɔn no;

2 Ɔno na ɔbɔboaboa no nkorɔfo ano mpo tse dɛ mbrɛ akokɔ baatan boaboa ne mba ano hyɛ ne ntsaban ase, dodowara a wobetsie me ndze na wɔabrɛ hɔnho adze wɔ m’enyim, na wɔafrɛ me wɔ mpaabɔ dzendzen mu no.

3 Hwɛ, nokwar, nokwar, mese hom dɛ, wɔdze hom bɔn akyɛ hom wɔ aber yi mu, dɛm ntsi na hom nsa akã dɛm ndzɛmba yinom; na mbom hom nkaa, amma hom annyɛ bɔn bio, mma mbusu ammba hom do.

4 Nokwar, mese hom dɛ wɔasan mu eyi hom efi wiadze mu dɛ hom mfa enyigye ndze a ɔtse dɛ totorobɛnto ndze mbɔ m’asɛmpa no dawur.

5 Hom mma hom akoma do na hom enyi ngye, osiandɛ mowɔ hom finimfin, na emi nye hom dzimafo wɔ Egya no enyim; na ɔyɛ ne pɛ pa dɛ ɔdze ahenman no ma hom.

6 Na dɛ mbrɛ wɔakyerɛw no—Biribiara a hom bebisa wɔ gyedzi mu no, hom yɛ kor wɔ mpaabɔ mu dɛ mbrɛ mahyɛ hom no a, hom nsa bɛkã.

7 Na wɔafrɛ hom dɛ hom mboaboa m’apamufo ano; osiandɛ m’apamufo tsie me ndze na wommpirim hɔn akoma;

8 Dɛm ntsi, ɔmom no fi Egya no hɔ aba dɛ wɔbɔboaboa hɔn ano wɔ bea kor do wɔ asaase yi enyi do, ama woeesiesie hɔn akoma na woeesiesie hɔnho wɔ adze nyinara mu dze atweɔn da no a wɔdze abɛbrɛsɛ nye amamfoyɛ bɛba emumuyɛfo do no.

9 Na dɔn no abɛn, na da no rosõ ber a asaase ne twaber edu; na hɔn a wɔyɛ ahantan nye emumuyɛfo nyinara bɛyɛ dɛ mburonan; na mebɛhyew hɔn, Dɔm Ewuradze na ɔse; amma emumuyɛ annka asaase yi do;

10 Na dɔn no asõ, na dza m’asomafo kãe no wɔ dɛ ɔhyɛ mã; na dza wɔkãe no dɛmara so na ɔbɛba.

11 Na medze tum nye enyimnyam kɛse bɛda moho edzi efi sor, na menye sor dɔm-tutuw a wɔwɔ hɔ nyina, na yɛnye nyimpa abɛtsena asaase do wɔ tsenenee mu mfe apem, na emumuyɛfo nnkotum egyina ano.

12 Na bio, nokwar, nokwar, mese hom dɛ, ɔnam Egya ne pɛ do, na ɔmom ne pi si do no, dɛ m’asomafo, Duebien no a wɔkã moho wɔ me ɔsomdwuma mu wɔ Jerusalem no, begyina m’enyimfa wɔ ogya fadum mu wɔ da a mebɛba no mu, wɔahyehyɛ hɔn tsenenee ntar, wɔdze ahenkyɛw ahyehyɛ hɔn tsir, wɔ enyimnyam mu dɛ mara so mpo, na woebobu Israel fifo nyina atsɛn, dodowara mpo a wɔdɔɔ me na wodzii me mbrasɛm do no, na obiara nnkã ho bio.

13 Na wɔbɛhɛn totorobɛnto dzendzenndzen akyɛr, tse dɛ Bepɔw Sinai do mpo, na asaase nyina bɔwosow, na wɔaba kan—nyew, hɔn a wowui wɔ mo mu no benya tsenenee ahenkyɛw, na wɔahyɛ hɔn ntar dɛ mara so mpo, na wɔabɛkã moho, ama yaayɛ kor.

14 Mbom, hwɛ, mese hom dɛ ansaana dɛm da kɛse yi bɔsõ no, ewia bɛdan sum, na bosoom adan bɔgya, na nworaba befi sor atotɔ, na nsɛnkyerɛdze akɛse besisi wɔ sorsor no sor nye asaase n’ase;

15 Na sũ nye nkekamu besi nyimpa dɔm mu;

16 Na wɔbɛma ɔsor-bo abɛsɛɛ asaase do ndɔbaa.

17 Na ɔbɛba dɛ, osian wiadze n’emumuyɛdze ntsi, mibedzi emumuyɛfo hɔn wer, osiandɛ worunnu hɔnho; na m’ebufuw kɔɔpow no ayɛ mã; na hwɛ, sɛ woenntsie me a, mo bɔgyaa no renntsew hɔn ho.

18 Dɛm ntsi, emi Ewuradze Nyankopɔn mobɔsoma nwansema ma wɔaba asaase enyi do, na wɔbɔfɔr hɔn a wɔwɔ do nyina, na wobedzi hɔn honam, na wɔama wɔadɔr nsaamaa;

19 Na hɔn tɛkyerɛma bɛfam ma worunntum nnkasa nntsia me; na hɔn honam bodwuruw efi hɔn mbiew ho egu, na hɔn enyiwamba botutu efi hɔn enyiwa mu;

20 Na ɔbɛba dɛ haban mu mbowa nye wimu ntumbowa bɔwe hɔn.

21 Na ogyatanaa bɛhyew mbusu asɔr kɛse no, a ɔyɛ asaase nyina do edwaman no, egu famu, dɛ mbrɛ Ezekiel nkɔnhyɛnyi no dze n’ano kãe no, ɔno na ɔkãa dɛm ndzɛmba yi a ɔmmbaa mu yi, na mbom dɛ metse ase yi, otwar dɛ ɔba mu, osiandɛ dza ɔyɛ mbusu nnkotum edzi hen.

22 Na bio, nokwar, nokwar, mese hom dɛ, sɛ mfe apem no ba ewiei a, na nyimpa hyɛ ase bio pow hɔn Nyame a, mibegyaa asaase bɛyɛ mber kakra;

23 Na ewiei no bɛba, na sor nye asaase bɛhyew na woetwa mu akɔ, na sor fofor nye asaase fofor bɛba.

24 Na ndzɛmba dadaw nyinara botwa mu akɔ, na ndzɛmba nyinara abɛyɛ fofor, sor nye asaase mpo, nye ne mãhyɛ a ɔwɔ hɔ nyinara, nyimpa nye mbowa nyinara, wimu ntumbowa, nye po mu nam nyinara;

25 Na tsinhwi kor, anaa duaba rennyew, osiandɛ ɔyɛ me nsaano edwindze.

26 Mbom, hwɛ, nokwar, mese hom dɛ, ansaana asaase botwa mu akɔ no, Michael a ɔyɛ mo ɔbɔfopanyin no bɛhɛn no totorobɛnto, na nkyii ewufo nyinara bɔsoɛr, osiandɛ obobuebue hɔn owumaa, na wobefifi mu epue—nyew, hɔn nyinara mpo.

27 Na wɔbɔboaboa atseneneefo no ano wɔ me nsa enyimfa dze hɔn akɔ onnyiewiei nkwa mu; na ɔbɛyɛ me enyimguase dɛ mebɛfa emumuyɛfo no a wɔwɔ me nsa bankum no ayɛ medze wɔ Egya n’enyim;

28 Dɛm ntsi, mebɛse hɔn dɛ—Hom mfi me nkyɛn nkɔ, hom a ndom akã hom, hom nkɔ ogya a ɔwɔ hɔ daapem a woesiesie ama abɔnsam nye n’abɔfoe no mu.

29 Na afei, hwɛ, mese hom dɛ mimmfii m’ano nnkãa no pɛn dɛ wɔbɛsan hɔn ekyir aba, osiandɛ bea a mowɔ no, wonnkotum aba hɔ, osiandɛ wonnyi ho tum biara.

30 Na mbom hom nkaa dɛ wɔmmfaa m’atsɛmbu nyina mmaa adasa; na dɛ mbrɛ nsɛm no efi m’anomu epue no, ɔbɛba mu dɛmara so, na dɛ edzikamfo bedzi ekyir, na edziekyirfo so ebedzi kan wɔ biribiara a menam mo tum asɛm a ɔyɛ mo Sunsum no tum do bɔe no mu.

31 Na menam mo Sunsum no tum do bɔɔ hɔn; nyew sunsum nye honam mu ndzɛmba nyina—

32 Odzi kan, sunsum mu, ɔtɔ do ebien, honam mu, dza a ɔyɛ m’edwuma ahyɛse; na bio, odzi kan, honam mu, na ɔtɔ do ebien, sunsum mu, dza ɔyɛ m’edwuma a odzi ewiei—

33 Merekasa dɛm kyerɛ hom ama hom aatse ase dɛmara; na mbom mara dze minyim dɛ mo ndwuma nnyi ewiei, na onnyi ahyɛse; mbom wɔdze ama hom ama hom aatse ase, osiandɛ hom ayɛ kor ebisa me ho asɛm.

34 Dɛm ntsi, nokwar mese hom dɛ ndzɛmba nyinara yɛ sunsum ma me, na aber biara nnyi hɔ a medze honam mu mbra ama hom; nna me mmaa nyimpa biara, anaa adasamba; anaa Adam, hom egya no a mobɔɔ no no.

35 Hwɛ, memaa no ho kwan dɛ ɔnyɛ dza noara pɛ; na memaa no mbrasɛm, na mbom nnyɛ honam mu mbrasɛm na medze maa no, osiandɛ me mbrasɛm yɛ sunsum mu dze; na wɔnnyɛ asaase do dze anaa honam mu dze, nna wɔnnyɛ honam su dze, anaa akɔndɔdze.

36 Na ɔbaa dɛ abɔnsam sɔɔ Adam hwɛe—na, hwɛ, abɔnsam wɔ hɔ ansaana Adam reba, osiandɛ ɔtseew mo do etua, see dɛ, fa w’enyimnyam ma me, a ɔyɛ mo tum no; na osian hɔn pɛ ntsi, sor dɔmtutuw no mu nkyɛmu ebiasa mu kor fii me nkyɛn kɔr n’afã;

37 Na wɔtoow hɔn kyeen famu, na dɛm na ɔmaa abɔnsam na n’abɔfoe bae;

38 Na, hwɛ, woesiesie beebi ama hɔn fi ahyɛse no, na bea no nye hɛl.

39 Na ɔwɔ dɛ abɔnsam sɔ adasamba hwɛ, sɛ ɔnntse dɛm a, nna nnyɛ hɔnara wɔdze hɔn pɛ; osiandɛ sɛ woennya dza ɔyɛ wen a, wonnkohu dza ɔyɛ dɛw—

40 Dɛm ntsi, ɔbaa dɛ Abɔnsam sɔɔ Adam hwɛɛ, na odzii eduaba no a wɔabra no ntsi ɔtõo mbrasɛm no, na ɔmaa ɔbɛhyɛɛ abɔnsam ne pɛ ase, osiandɛ ogyaa noho mu maa nsɔhwɛ.

41 Dɛm ntsi, emi, Ewuradze Nyankopɔn, memaa kwan ma wɔpaam no fii Eden Ture no mu, dze fii m’enyim, osian ne mbrato ntsi, ɔno mu na ɔmaa owuu sunsum mu, dza ɔyɛ owu a odzi kan no, na dɛm owu kor yi ara so mpo nye owu a odzi ewiei no, dza ɔyɛ sunsum mu owu, a mebɛkã egu emumuyɛfo do ber a mebɛse dɛ: Hom mfi ha, hom a ndom akã hom.

42 Mbom, hwɛ, mese hom dɛ, emi, Ewuradze Nyankopɔn mehyɛɛ Adam nye n’asefo dɛ mma wonnwu honam mu owu, kesi dɛ emi, Ewuradze Nyankopɔn mobɔsoma abɔfo dɛ wɔmbɛkã nnuho nye ɔpon, a ɔnam gyedzi wɔ me Ba a Wɔwoo no Kortoo no ne dzin mu no ho nsɛm nkyerɛ hɔn.

43 Na dɛm na emi, Ewuradze Nyankopɔn mehyehyɛe maa nyimpa wɔ ne nsɔhwɛber mu—dɛ sɛ owu honam mu a, woeenyan no wɔ bɛkyebo mu dze no akɔ onnyiewiei nkwa mu, na iyi wɔ hɔ ma dodowara a wɔbɛgye edzi;

44 Na hɔn a wɔnngye nndzi no, bɔkɔ onnyiewiei afɔbu mu; osiandɛ wonnkotum apon hɔn efi bɔn sunsum asehwe mu, osiandɛ woennu hɔnho;

45 Na wɔdɔ sum sen kan, na hɔn ndwuma yɛ bɔn, na wonya hɔn akatua fi nyia wɔpɛ dɛ wotsie no no hɔ.

46 Mbom hwɛ, mese hom dɛ, mbofra nkakraba no dze, wɔnam nyia me Woo no Kortoo no no do apon hɔn fi wiadze ne fapem;

47 Dɛm ntsi, wonnkotum ayɛ bɔn, osiandɛ wɔmmaa Satan tum dɛ ɔnsɔ mbofra nkakraba nhwɛ, kesi dɛ wobodu ber a wobotum ebu hɔnho nkontaa wɔ m’enyim;

48 Na wɔdze ama hɔn dɛ ma mepɛ mpo tse, sɛ mankasa mepɛ a, mimbisa dɛm ndzɛmba akɛse no mfi hɔn egyanom nsamu.

49 Na, bio, mese hom dɛ, ana mennhyɛɛ obiara a ɔwɔ nyimdzee dɛ onnu noho?

50 Na nyia onnyi ntseasee no, ɔyɛ m’ahyɛdze dɛ meyɛ dza wɔakyerɛw no. Na afei, merennkã hwee nnkyerɛ hom bio ber yi mu. Amen.