Ɔfã 12
Yikyerɛ a wɔnam Joseph Smith Nkɔnhyɛnyi no do dze maa Joseph Knight Panyin, wɔ Harmony, Pennsylvania, Esusow Aketseaba, 1829. Joseph Knight gyee dza Joseph Smith kãe a ɔfa Mormon Nwoma mprɛtse no a ɔwɔ no hɔ no nye nkyerɛase dwuma a nna wogu do reyɛ ase no dzii na mber pii na ɔdze ndzɛmba boaa Joseph Smith na ne kyerɛwfo, ma wotumii kɔr do kyerɛɛ nwoma no ase. wɔ Joseph Knight n’ebisadze ho ntsi, Nkɔnhyɛnyi no bisaa Ewuradze ma onyaa ho nyikyerɛ.
1–6, Edwumayɛfo a wɔwɔ wenyin ture no mu benya nkwagye; 7–9, Hɔn a wɔpɛ nyinara na wɔfata no botum aboa Ewuradze n’edwuma.
1 aDwumadzi a ɔsõ na ɔyɛ ahobow bi rubopue adasamba mu.
2 Hwɛ, meyɛ Nyame; hom ntsie m’asɛm a nkwa na tum wɔ mu no, ɔyɛ ndam sen nkrantsee anofanu, na ohwira mu kodu dɛ ɔpaapaa akwaa nye ehuon nyina mu; dɛm ntsi hom ntsie m’asɛm.
3 Hwɛ, haban no ahoa na twaber no asõ, dɛm ntsi obiara a ɔpɛ dɛ otwa no wɔmma, ɔmfa n’ahoɔdzen ntow ne kantankrankye na ontwa wɔ ber a adzekyee wɔ do yi, ama ɔakora nkwagye a ɔwɔ hɔ daapem dze ama ne kra wɔ Nyame n’ahenman no mu.
4 Nyew, obiara a ɔbɔtow ne kantankrankye na oetwa no, ɔnoara na Nyame afrɛ no.
5 Dɛm ntsi, sɛ ibisa a wo nsa bɛkã, sɛ ebɔ mu a wobobue ama wo.
6 Afei, ber a hom ebisa yi, hwɛ, mese hom dɛ, hom ndzi me mbrasɛm do, na hom mper dɛ hom bɛkyekyer Zion.
7 Na, hwɛ, mekasa kyerɛ ɔwo nye hɔn a wɔwɔ pɛ dɛ wɔbɔboa ma dwumadzi yi epue guado no na woetsim yie;
8 Na obiara nnkotum aboa dwumadzi yi, gyedɛ nyia aɔbrɛ noho adze na bɔdɔ ahyɛ no mã, ɔwɔ cgyedzi, denyidado, na ɔyɛ eayamuyie, na ɔyɛ ntoboase wɔ ndzɛmba nyinara mu, ɔfa no biribiara a wɔdze bɛhyɛ ne nsa no.
9 Hwɛ, emi nye kan nye wiadze nkwa, na merekã dɛm nsɛm yi, dɛm ntsi fa w’ahom tsie, na nkyii wɔbɛfrɛ wo. Amen.