Ɔfã 61
Nyikyerɛ a wɔnam Joseph Smith Nkɔnhyɛnyi no do dze mae, wɔ Missouri nsu n’egya, McIlwaine’s Bend, Dzifuu 12, 1831. Ber a Nkɔnhyɛnyi no na elderfo du resan hɔn ekyir akɔ Kirtland no, wɔdze hɛmba twaa Missouri Esutsen no. Da a otsĩa ebiasa wɔ hɔn akwantu mu no, wohyiaa mbusu pii. Elder William W. Phelps nyaa enyido-adzehu ewiaber, ohun ɔsɛɛfo no dɛ ɔdze tum nam esu n’enyi.
1–12, Ewuradze ahyɛ mom dɛ adzesɛɛ pii bɛba esu no do; 13–22, John dom esu no, na ɔsɛɛfo no nam nsu no do; 23–29, Binom wɔ tum a wɔdze kasa kyerɛ esu no; 30–35, Elderfo no wɔdɛ wotu kwan beenu beenu na wɔkã asɛmpa no; 36–39, Ɔwɔ dɛ wosiesie hɔnho dze ma Nyimpa Ba no ne mbae.
1 Hom nhwɛ, na hom ntsie nyia ɔwɔ atum nyinara no ne ndze, nyia ɔwɔ hɔ fi daapem kesi daapem, bAlpha na Omega, ahyɛse na ewiei no mpo.
2 Hom nhwɛ, nokwar, dɛm na Ewuradze se hom, O hom a hom yɛ m’asɔr mu elderfo, hom a hom ehyia mu wɔ bea yi do, hom a wɔdze hom bɔn aakyɛ hom, na Emi, Ewuradze, na medze bɔn kyɛ, meyɛ bmbɔbɔrhufo ma hɔn a wɔdze akoma a abotow ckã hɔn bɔn;
3 Mbom nokwar, mese hom dɛ, onnhia dɛ hom, me elderfo kuw nyina, botwa nsu yi ɔhardo, wɔ ber a dɔm a wɔtsetse esu yi n’afã na n’afã nyina rehera wɔ ekyingye mu.
4 Naaso, me ma ho kwan ama hom aagye ho dase; hwɛ mbusu pii wɔ esu yi do, na ne kɛse wɔ ekyir;
5 Na Emi, Ewuradze, mahyɛ mom wɔ m’ebufuw mu dɛ ɔsɛɛ pii mbra esu no do; nyew, nkanka wɔ esu yinom no do.
6 Naaso, honam nyinara wɔ me nsamu, na nyia odzi nokwar wɔ hom mu no rennhera wɔ esu no do.
7 Dɛm ntsi, ohia dɛ m’akowaa Sidney Gilbert nye m’akowaa aWilliam W. Phelps bɛyɛ ntsɛm akɔ hɔn soma na wɔakɛyɛ hɔn nyamedwuma no.
8 Mbom mennkɛpɛ dɛ hom befi ha akɔ gyedɛ awɔatsẽa hom wɔ hom bɔn nyina ho, ama hom aayɛ kor, na hom annhera wɔ bemumuyɛdze mu.
9 Mbom seseiara, nokwar, mese, oye ma me dɛ hom bɛpaapaa mu. Dɛm ntsi, wɔmma mo nkowaa Sidney Gilbert nye William W. Phelps mfa hɔn dɔm dadaw no, na wontu hɔn kwan wɔ ɔhardo ama woeetum ayɛ hɔn nyamedwuma no nyina, na wɔnam gyedzi do bedzi konyim.
10 Na mber dodow a wobedzi nokwar no, wɔbɔkora hɔn do, na emi, Ewuradze mebɛkã hɔn ho.
11 Na wɔmma hɔn a wɔaka no mfa hɔn adzefuradze a wohia.
12 Wɔmma m’akowaa Sidney Gilbert mfa dza wonnhia no so nkɔ, dɛ mbrɛ hom adwen besi pi wɔ ho.
13 Na afei, hwɛ, hom ayieyɛ ntsi na medze bmbrasɛm a ɔfa ndzɛmba yinom ho ma hom; na Emi, Ewuradze, menye hom beyi atsɛn dɛ mbrɛ menye tsetseberdomba yɛe no.
14 Hwɛ, Emi Ewuradze, mihyiraa aesu no ahyɛse no; na mbom nda a odzi ekyir no, muduaa m’akowaa John n’anomusɛm do dze bndom kãa esu no.
15 Dɛm ntsi, nda bi bɛba a honam biara a ɔbɛfa nsu no do no, ɔnnkɛyɛ dwodwoodwo ama no.
16 Na nda bi bɛba a wɔbɛkã dɛ obiara nnkotum afa esu no do dze akɔ Zion, gyedɛ nyia n’akoma mu tsen.
17 Na dɛ mbrɛ emi, Ewuradze ahyɛse no medze andom kãa asaase no, dɛmara so na nda a odzi ekyir no mehyira do wɔ n’aber do dze ama m’ahotseweefo, ama woeedzi no do seradze.
18 Na afei medze mbrasɛm yi ma hom dɛ dza mekã kyerɛ kor no, mekã kyerɛ hom nyina dɛ hom ndzi kan mbɔ hom nuanom kɔkɔ wɔ esu yi ho, dɛ mma wonntu kwan mmfa do, amma hɔn gyedzi ammpa na mfir ammpa hɔn;
19 Emi, Ewuradze, mahyɛ mom, na ɔsɛɛfo no nam esu n’enyi, na mekantse ɔmom no.
20 Emi, Ewuradze, mo bo fuuw hom ndeda, na mbom ndɛ m’ebufuw no kɔ.
21 Dɛm ntsi, wɔmma hɔn a makã yi fa hɔn ho no nyɛ ntsɛm ntu hɔn kwan no—bio, mese hom dɛ, wɔmma wontu hɔn kwan no ntsɛm.
22 Na ɔmmfa mo ho koraa, dɛ mber kakra botwa mu, na ɔba no dɛ wɔyɛ hɔn nyamedwuma wie a, dɛ wɔbɛfa nsu do anaa asaase do no, wɔnyɛ dza wobodua hɔn adwendwen mu ada no edzi.
23 Na afei, ɔfa mo nkowaa Sidney Rigdon, Joseph Smith, Kakraba, nye Oliver Cowdery no, mma wɔmmfa esu no do bio, gyedɛ wɔfa nsuka no do dze kɔ hɔn efiefi; mekyerɛ dɛ mma wonntu kwan mmfa esu no do, na mbom wɔmmfa nsuka no do.
24 Hwɛ, emi, Ewuradze, makyerɛ kwan a m’ahotseweefo mfa do ntu hɔn kwan no, na hwɛ, kwan no nye yi—sɛ wotwa nsuka no wie a wɔmfa asaase do, mber dodow biara a wɔbɛhyɛ hɔn dɛ wontu kwan no, na wɔnkɔ Zion asaase do;
25 Na wɔnyɛ no dɛ mbrɛ Israelmba yɛe no, awosisii hɔn nseraban wɔ kwan no do.
26 Na hwɛ, mbrasɛm yi na hom mfa mma hom enuanom nyina.
27 Na nyia wɔama no atum dɛ ɔnkasa nkyerɛ esu no, ɔnoara na Sunsum no bɛma oehu n’akwan nyinara so;
28 Dɛm ntsi, hom mma onyia no nyɛ dza Nyame tseasefo no Sunsum ahyɛ no dɛ ɔnyɛ no, wɔ asaase anaa esu no do, dɛ mbrɛ ɔwɔ mo hɔ a ɔwɔ dɛ mebɛyɛ no ekyir yi.
29 Na wɔakyerɛ hom kwan no, anaadɛ mbrɛ ahotseweefo a wɔwɔ Ewuradze ne nseraban mu no nyɛ ntu hɔn kwan no.
30 Na bio, nokwar mese hom, mo nkowaa Sidney Rigdon, Joseph Smith, Kakraba, nye Oliver Cowdery, dɛ mma hom mmbue hom ano wɔ mboanofo emumuyɛfo no mu kɛpem dɛ wobodu Cincinnati;
31 Na dɛm bea no do na wɔmma hɔn ndze do nkasa nkyerɛ Nyame, mfa ntsia dɛm nkorɔfo no, nyew, nyia n’ebufuw adzɛw wɔ hɔn emumuyɛ ho do, nkorɔfo a awoenyin ama ɔsɛɛ no.
32 Na ɔno ekyir wɔnsɔw hɔn akwantu no do nkɔ hɔn nuanom mboanofo no nkyɛn, osiandɛ hɔn na ohia kɛse dɛ wokedzi dwuma wɔ hɔn mu sen mboanofo emumuyɛfo no hɔn mu.
33 Na afei, ɔfa hɔn a wɔaaka ho no, wɔmma awɔnkɔbɔ asɛm no dawur wɔ mboanofo emumuyɛfo no mu, susuampaara dɛ wɔdze ama no.
34 Na mber dodow a wɔbɛyɛ dɛm no, awɔbɔhor hɔn ntar, na nkekãa biara remmba hɔnho wɔ m’enyim.
35 Na wɔmma wɔmbɔ mu ntu kwan no, anaadɛ wɔnkɔ no abeenu beenu, dɛ mbrɛ wɔhwɛ a obeye ama hɔn, na mbom hom mma m’akowaa Reynolds Cahoon na m’akowaa Samuel H. Smith a m’enyi gye hɔn ho no nko mbɔ mu nnantsew, mma wɔnntsetsew hɔn mu kɛpem dɛ wɔbɛsan akɔ hɔn efiefi; na osian nyansa a ɔwɔ mo mu no ntsi na mereyɛ iyi.
36 Na afei, nokwar, mese hom dɛ, dza mekã kyerɛ kor no, mekã kyerɛ hom nyinara, me ambofra nkakraba, hom mma hom enyi ngye; osiandɛ mowɔ hom bfinimfin, na cmommpoow hom;
37 Na susuampaara dɛ hom abrɛ homho adze wɔ m’enyim yi, aahenman ne nhyira yɛ homdze.
38 Hom mbɔ hom asen do, na hom anweɔn na hom nya enyida hɔ, na hom nhwɛ Nyimpa Ba no ne mbae no kwan, osiandɛ ɔbɛba wɔ dɔn ber a hom enyi nnda.
39 Hom mbɔ ampaa aber nyina amma hom annkɔ bnsɔhwɛ mu, ama hom eetum egyina ne mbae da no mu, wɔ nkwa anaa owu mu. Ɔnyɛ hɔ dɛm. Amen.