Ɔfã 108
Nyikyerɛ a wɔnam Joseph Smith Nkɔnhyɛnyi no do dze mae, wɔ Kirtland, Ohio, Mumu 26, 1835. Lyman Sherman a nna wɔayɛ no eduosuon no mu baako no baa Nkɔnhyɛnyi no hɔ bɛsee no dɛ, ɔpɛ dɛ ohu dwuma a ɔsɛ dɛ odzi, na aber no na nsa kãa nyikyerɛ yi.
1–3, Wɔdze Lyman Sherman no bɔn akyɛ no; 4–5, Wɔbɛkan no akã elderfo a wɔyɛ Asɔr no mu banodzifo no ho; 6–8, Wɔfrɛ no dɛ ɔnkã asɛmpa no na ɔnhyɛ n’enuanom no dzen.
1 Nokwar, dɛm na Ewuradze se wo, m’akowaa Lyman; wɔdze wo bɔn akyɛ wo, osiandɛ etsie me ndze na aba ha anapa yi dɛ erebɛgye afotu efi nyia meyi no esi hɔ no hɔ.
2 Dɛm ntsi, ma w’akoma antɔ wo yamu, ɔfa no wo gyinabew wɔ sunsum mu ho, na mma mmpow dɛ ibetsie me ndze bio.
3 Na soɛr gyina, na ofi ndɛ kɔ no hwɛ yie dɛ ibedzi wo bɔhyɛ a abɔ nye dza ebɔ no do, na wɔdze nhyira a ɔsõ behyira wo.
4 Tweɔn abotar mu kesi dɛ me nkowaa bɛfrɛ anhyiamu krɔnkrɔn no, na wɔbɛkaa wo akã me elderfo a wodzi kan no ho na wɔnye wo akã me elderfo nkaa a masan mu eyi hɔn ma wɔanam asɔfohyɛ mu enya kyɛfa.
5 Hwɛ, sɛ ekɔ do dzi nokwar a, iyi nye aEgya no n’anohoba a ɔdze abɔ wo.
6 Na ɔbɛyɛ hɔ ama wo wɔ dɛm da no mu dɛ ibenya kwan aakã asɛmpa no, ofi dɛm da no kɔ wɔ beebiara a mobɔsoma wo ma akɔ.
7 Dɛm ntsi, ahyɛ wo nuanom dzen wɔ wo nkɔmbɔtwetwe nyina mu, wɔ wo mpaabɔ nyina mu, wɔ wo afotu nyina mu nye wo ndzeyɛɛ nyina mu.
8 Na hwɛ, na hu dɛ, menye wo wɔ hɔ, na mibehyira wo na amagye wo afebɔɔ. Amen.