Ɔfã 16
Nyikyerɛ a wɔnam Joseph Smith Nkɔnhyɛnyi no do dze maa Peter Whitmer Kakraba, wɔ Fayette, New York, Ɔbiradzi, 1829. (hwɛ dza wɔakyerɛw wɔ Ɔfã 14 n’etsifi no.) Ekyir no, Peter Whitmer Kakraba bɛyɛɛ Mormon Nwoma ho Adasegyefo Baawɔtwe no mu kor.
1–2, Ewuradze n’abasa kata asaase nyina do; 3–6, Ebɛka asɛmpa no na agye akra nkwa no nye adze a ɔsom bo kɛse.
1 aYɛ aso, m’akowaa Peter, na tsie Jesus Christ, w’Ewuradze na wo Pomfo no ne nsɛm.
2 Na, hwɛ, medze ndamyɛ nye tum kasa kyerɛ wo, osiandɛ m’abasa kata asaase nyina do.
3 Na mebɛkã nsɛm a nyimpa biara nnyim kã emi nye ɔwo nko ho akyerɛ wo—
4 Na mber pii na apɛ dɛ ibohu adze a ɔbɔsom wo bo kɛse efi mo hɔ,
5 Hwɛ nhyira akã wo wɔ dɛm adze yi ho, dɛ erekã me nsɛm a medze ama wo no, dɛ mbrɛ me mbrasɛm se.
6 Na afei, hwɛ, mese wo dɛ, adze a ɔbɔsom wo bo kɛse ama wo nye dɛ ebɔbɔ nnuho ho dawur dze akyerɛ nkorɔfo yi, ama aatwe akra abrɛ me, ama enye hɔn aahom wɔ m’Egya n’ahenman no mu. Amen.