Ɔfã 55
Nyikyerɛ a wɔnam Joseph Smith Nkɔnhyɛnyi no do dze maa William W. Phelps, wɔ Kirtland, Ohio, Obiradzi 14, 1831. Nna mbrɛana William W. Phelps a, ɔyɛ obi a otsintsim nwoma, nye n’ebusua ebodu Kirtland, na Nkɔnhyɛnyi no bɔɔ mpaa bisaa no ho nsɛm fii Ewuradze hɔ.
1–3, Wɔfrɛ William W. Phelps na wɔasan mu eyi no dɛ wonnuma no, na wɔnhyɛ no elder, na ɔnkã asɛmpa no; 4, Ɔwɔ dɛ ɔkyerɛw nwoma so dze ma mbofra a, wɔwɔ Asɔr no skuul mu no; 5–6, Ɔwɔ dɛ otu kwan kɔ Missouri, hɔ nye bea a ɔbɛyɛ n’edwuma.
1 Hwɛ, dɛm na Ewuradze se wo, m’akowaa William, nyew, aasaase nyina Ewuradze no, mafrɛ wo na masan mu eyi wo ber a bwonumaa wo wɔ nsu mu ekyir no, a sɛ edze enyiwa kor yɛ biribiara dze hyɛ me enyimnyam a, ibenya bɔnfakyɛ, nye cnsa a wɔdze gu do ma nsa kã Sunsum Krɔnkrɔn no;
2 Na m’akowaa Joseph Smith, Kakraba ne nsa na ɔbɛhyɛ wo elder wɔ asɔr yi mu, na akã nnuho nye abɔnfakyɛ ho asɛm, na enuma wɔ Jesus Christ, Nyame tseasefo no ne Ba ne dzin mu.
3 Na hɔn a edze wo nsa bogu hɔn do no, sɛ hɔn akoma botow wɔ m’enyim a, ibenya tum dze Sunsum Krɔnkrɔn no ama hɔn.
4 Na bio, wɔbɛhyɛ wo sɔfo ma aaboa m’akowaa Oliver Cowdery wɔ askuul a ɔwɔ asɔr no mu nwoma ne ntsintsimii na ne nyiyimu, na ne nkyerɛwee edwuma, ama mbofra nkakraba so enya nkyerɛkyerɛ wɔ m’enyim dɛ mbrɛ ɔsɔ m’enyi.
5 Na bio, nokwar, mese wo dɛ, ɔnam iyi ntsi, enye mo nkowaa Joseph Smith, Kakraba, na Sidney Rigdon botu kwan ama hom aetsim wɔ hom egyapadze asaase do ayɛ edwuma yi.
6 Na bio, ma m’akowaa Joseph Coe so nye hɔn ntu kwan no. Na dza ɔaka ekyir no nyina wɔbɛda no edzi ekyir yi dɛ mbrɛ me pɛ tse. Amen.