Kyerɛwsɛm
Nkyerɛkyerɛ na Ahyɛmudzi 123


Ɔfã 123

Ahotseweefo no hɔn ndwuma a ɔfa hɔn a wɔtseetsee hɔn no ho, dɛ mbrɛ Joseph Smith Nkɔnhyɛnyi no kyerɛwee wɔ ber a ɔyɛ daduanyi wɔ Liberty efiadze, Missouri. Ɔfã yi yɛ nwoma a wɔdze maa Asɔr no no mu bi wɔ Ebɔw 20, 1839 (hwɛ ɔfã 121 etsifi nsɛm).

1–6, Ahotseweefo no wɔ dɛ wɔboaboa ano na wɔkyerɛw hɔn amandzehu nye atseetsee ho nsɛm na wotsintsim dze pue guado; 7–10, Dɛm sunsum kor no ara a ɔdze atorsɛm bae no, ɔnoara so na ɔma wɔtseetsee Ahotseweefo no; 11–17, Asɔrasɔr mu nkorɔfo dodowara hɔn nsa bɛkã nokwar no.

1 Na bio, yɛrebosusu ho akyerɛ ama hom ahwɛ hia a ohia dɛ ahotseweefo no nyina boaboa nokwar nyimdzee nyina ano na ɔhaw na ndzeyɛbɔn nyina a nkorɔfo a wɔwɔ dɛm ɔman yi mu dze ayɛ hɔn;

2 Na hɔn egyapadze nyina so, na ɔsɛɛ dodow a wɔaba hɔn do ɔfa hɔn edzin ho na pira a wopirapiraa ankorankor, na wɔsɛɛ n’egyapadze ankasa so;

3 Na hɔn so a wɔkã ho ma wɔtseetsee hɔn no edzin, dɛ mbrɛ wobotum na nsa akã no wɔnhwehwɛ hɔn.

4 Anaadɛ wobotum eyi abaguafo binom esi hɔ ma wɔaahwehwɛ ndzɛmba yinom mu, na wɔaakyerɛw hɔn anomu nsɛm na nsew; nye hɔnho nsɛm so a ɔnnyɛ nokwar a woetsintsim wɔ nkrataa do dze ato gua na wɔaboaboa ne nyina so ano;

5 Na dza ɔwɔ dawurbɔ nkrataa nye nwoma tsitsir ahorow nyina mu, nye hɔn abakɔsɛm a ɔnnyɛ nokwar nyina so a wɔakyerɛw dze ato gua, nye dza wogu do rekyerɛw, nye hɔn a wɔrekyerɛw no edzin, na atseetsee nye ewudzi, na ndzɛmba a ɔmmfata nyina a wɔayɛ etsia dɛm nkorɔfo yi, na wɔdze nsɛmansɛma nyina ato gua—

6 Nnyɛ dɛ yɛdze bɔto gua ma wiadzemba nyina ehu nko, na mbom yɛdze bi so bɔkɔ akɛma aban ne mpanyimfo so ma woeehu sum mu na mbɔnsamdze a wɔayɛ dze etsia hɛn, na iyi bɛyɛ adze a odzi ewiei koraa a hɛn Sor Egya ama kwan ma ɔaba hɛn do ansaana yeetum hɛn nsa akã dɛm anohoba no a ɔbɛma wɔatwe no efi no asumabew hɔ no; amma aman nyina so enntum ennyi hɔnho emmfi afɔdzi mu ansaana ɔatsen no tum abasa no mu.

7 Ɔyɛ hɛn dwumason a ɔwɔ dɛ yedzi ma Nyankopɔn, sor abɔfo, hɔn na wɔnye hɛn bɛba ebegyina hɔ, nye hɛnankasa so hɛnho, hɛn yernom nye hɛn mba, a wɔasɔw yaw, na awerɛhow wɔ ewudzifo, etsirmɔdzenfo, na epoobɔfo nsa, hɔn a hɔn boafo nye dɛm sunsum no a ɔdze egyanom hɔn atorsɛm etsim, hɔn a woegya hɔn ator, na wɔdze ahyɛ mbofra hɔn akoma mu, na wɔdze adwensɛɛ ahyɛ wiadze mu mã, na worinyin ahoɔdzen mu kesi ahoɔdzen mu, na seseiara hɔn mu na ndabraba, nsisi, nye ndzeprɔwee nyina ne farba, na awiadze nyina si nkrum wɔ n’emumuyɛ no dur ase.

8 Ɔyɛ dadze akɔndua, ɔyɛ ntampehoma; wɔyɛ aponsa, nye nkɔnsɔnkɔnsɔn nye aban nkaba nye hɛl ankasa no mpokyerɛ.

9 Dɛm ntsi ɔyɛ hɛn dwumason a ɔsɛ dɛ yedzi, a yerinndzi mmfa mma hɛn yernom na mba nko na mbom yedzi ma ekunafo na ngyanka a hɔn kunnom na hɔn egyanom a awoekum hɔn wɔ dɛm etsirmɔdzensɛm yi nsa;

10 Dza no sum mu ndwuma yɛ kebii araa ma hɛl ankasa mpo dze suro popo, na ogyina hɔ ahobow mu nye bɔmm, na abɔnsam ankasa mpo ne nsa him na ɔdwedwe.

11 Nna ɔyɛ dwumason so a ɔsɛ dɛ yedzi dze ma ebusuasantsen a wɔreba, nye hɔn a hɔn akoma mu tsew nyina.

12 Osiandɛ dodowara da ho wɔ asɔrasɔr, ekuw horow, na som horow mu wɔ asaase do a, nyimpa a wɔyɛ ndabrabafo nam hɔn ndaadaa kwan do aefura hɔn enyi, na wɔayɛ krado dɛ wɔbɛdaadaa nkorɔfo na wɔdze nokwar no ehuntsa hɔn osiandɛ bwonnyim bea a wobohu efi—

13 Dɛm ntsi, ɔsɛ dɛ yɛsɛɛ hɛn mber na yɛhwer hɛn nkwa dze twe ndzɛmba a aosuma sum mu nyina ba kan mu, na yenyim hɔn; na wofi sor ada no edzi pefee akyerɛ hɛn—

14 Na ɔsɛ dɛ wɔdze enyimpi dzi iyinom ho dwuma.

15 Mma nyimpa biara mmbu dɛm ndzɛmba yinom tootooba; osiandɛ dza obesi ndaamba no dɔɔ sõ, dza ɔfa ahotseweefo no ho a ogyina dɛm ndzɛmba yinom do no.

16 Hom nyim, enuanom, dɛ wusihɛn kakraka no, adze ketseketse bi na aɔboa no ma sɛ ehum rutu a otum fa mframa na asorɔkye mu kɔ tɔɔtsee.

17 Dɛm ntsi, enuanom adɔfo, hom mma yɛmfa aenyigye nyɛ ndzɛmba nyina a hɛn ahom botum; na nkyii yeetum egyina pintsinn dze enyidado mapã ahwɛ Nyame no bnkwagye, nye n’abasa a ɔbɛda no edzi akyerɛ no.