Enyido-adzehu a wɔdze maa Joseph Smith Nkɔnhyɛnyi no na Sidney Rigdon, wɔ Hiram, Ohio, Kwakwar 16, 1832. Dza Joseph Smith n’abakɔsɛm kã dze yɛɛ dɛm enyido-adzehu no ne nyienyim nye dɛ: “Aber a mifii Amherst ehyiadzi ase bae no, mehyɛɛ ase dɛ merekyerɛ kyerɛwsɛm no ase. Sɛ yɛhwɛ nyikyerɛ dodow no a, ɔda edzi pefee dɛ woeyiyi nsɛm pii a ɔfa nyimpa no nkwagye ho no, efi Bible no mu, anaadɛ ɔyewee ansaana wɔrebɛkã aboa ano. Nokwar, dza ɔakã no da noho edzi pefee dɛ, sɛ Nyankopɔn botua ankorankor biara kaw dɛ mbrɛ no ndwuma a ɔyɛe wɔ ber a ɔtse ase no tse dze a, nna ‘Sor’ no a wɔkyerɛ dɛ ɔyɛ Ahotseweefo hɔn onnyiewiei fie no bɛyɛ ahenman pii na nnyɛ kor. Dɛm ntsi, … ber a emi na Elder Rigdon yegu do rekyerɛ Ɔhotseweenyi John n’Asɛmpa no ase no, yehun enyido-adzehu a ɔtoa do yi.” Ber a wɔdze enyido-adzehu yi mae no, nna Nkɔnhyɛnyi no rekyerɛ John 5:29 no ase.