Asɔr Dawurbɔ 1
Bible na Mormon Nwoma no kyerɛkyerɛ dɛ awarfo beenu nko ntamu awar nye Nyame ne gyinapɛn ma awar gyedɛ Ɔnoara kyerɛ adze fofor.(Hwɛ 2 Samuel 12:7–8 na Jacob 2:27, 30). Nyikyerɛ a wɔdze maa Joseph Smith ekyir do no, Ɔhyehyɛɛ awar pii ne nyɛe wɔ Asɔrmba abɔasefo mu afe 1840 ahyɛse no mu (hwɛ ɔfã 132). Fitsi afe 1860 ber kesi 1880 ber mu no, United States aban hyɛɛ mbra a ɔmaa nyamesom nyɛe yi betsĩaa mbra. Ewiei no U.S. Asɛndzibea a Ɔkrɔn no gyee mbra yinom too mu. Onyaa nyikyerɛ ekyir no, President Wilford Woodruff dze Mpaamukã a odzi do yi too gua, a Asɔr no gyee too mu dɛ tum wɔ mu na ɔkyekyer hɔn wɔ Ɔbɛsɛ 6, 1890. Iyi ma wogyaa awar pii ne nyɛe wɔ Asɔr no mu.
Dze Ma Nyia Ɔfa No ho:
Dawurbɔ krataa mu nsɛm a ofi Salt Lake City, a wɔdze apetse guado a ɔwɔ amansɛm botae a ɔfa Utah Commission ne amandzɛɛbɔ bi a ɔnnkyɛree yi ɔdze kɛmaa Ɔsoafo a ɔhwɛ Ɔman mu nsɛm do no kyerɛ dɛ, wɔda ho ma kwan ma wɔwar pii, na dɛ, Obiradzi a ɔabɛsen kɔ, anaadɛ afe a oetwa mu kɔ no, nyimpa eduanan na no mboree awar wɔ dɛm kwan no do wɔ Utah; na dɛ Asɔr no ne banodzifo no hɔn baguado nsɛm mu no wɔakyerɛkyerɛ a ɔfa awar pii ho na wɔhyɛ nkorɔfo nkuran so dɛ wɔnkɔ do wɔ ho—
Dɛm ntsi, emi a meyɛ President wɔ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo No mu, kã to gua dɛ dɛm nsɛm a wɔakã ato hɛn do nyina yɛ atorsɛm. Yɛnnkyerɛkyerɛ awar dodow anaa awar pii ho asɛm, na yɛmma kwan so dɛ nyimpa biara nwar pii, na mekã so dɛ ɔnnyɛ nokwar dɛ yɛama wɔayɛ awar pii ho som wɔ hɛn Temple no mu biara anaadɛ wɔ hɛn Ɔman yi mu beebiara.
Wɔbɛkãa kyerɛɛ hɛn dɛ nyimpa kor bi awar dɛm wɔ Endowment Fi mu, wɔ Salt Lake City mu wɔ Fefɛwber, 1889, mbom munntumii nnhun nyia ɔyɛɛ dɛm som no, na minnyim biribiara a wɔyɛe wɔ hɔ no ho hwee. Ɔnam dɛm nsɛm yi ara ntsi, mahyɛ ma woebubu Endowment Fi no egu famu ntsɛmara.
Susuampaara dɛ wɔayɛ mbra wɔ Mbrahyɛ Baguabea dze etsia awar pii a wɔdze ato gua ma ɔabɛyɛ mbra a asɛndzibea a ɔkrɔn tsitsir a wɔapen do akã amambusɛm ho no, mekã to gua dɛ mibedzi dɛm mbra no do, na medze tum a mowɔ no wɔ Asɔr no do dɛ emi na meyɛ banodzinyi no mobɔhwɛ ma asɔrmba no mu biara so eedzi do dɛmara.
Biribiara nnyi me nkyerɛkyerɛ mu anaa hɔn a wɔkã mo ho hɔn nkyerɛkyerɛ mu a ɔfa awar ho a yɛdze maa Asɔr no wɔ mber a wɔkyerɛe no mu, dza wosusuu dɛ yɛdze hyɛɛ hɔn adwen mu wɔ awar pii ho, anaadɛ yɛhyɛɛ hɔn nkuran wɔ ho, na sɛ Asɔr no mu Elder bi akã kasa bi a ɔkyerɛ dɛm nkyerɛkyerɛ no a, wɔakã n’enyim ntsɛmara wɔ ho. Na afei mobɔ no dawur kyerɛ ɔmamfo dɛ, m’afotu a medze ma Nda a Odzi Ekyir Ahotseweefo nye dɛ, mma wɔnnwar awar biara a mbra a ɔwɔ asaase no do no tsia.
Wilford Woodruff
Jesus Christ N’Asɔr a ɔwɔ hɔ ma
Nda a Odzi Ekyir Ahotseweefo No ne President.
Kasa a President Lorenzo Snow dze too gua:
“Mekekã moho dɛ Wilford Woodruff na ɔyɛ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo No ne President, na ɔno nkotoo nye nyimpa a ɔwɔ asaase do seseiara a okura nsaafee a wɔdze sɔw ayɛdze ano, yɛgye to mu ampa dɛ ɔnam no tum a ɔwɔ ntsi, ɔfa kwan mu dɛ ɔdze Manifesto (Mpaamukã) no a wɔkyerɛɛw no Fankwa 24, 1890 a wɔakenkan wɔ Asɔr ne Wiadze Mfɛndzanan Ehyiadzi yi ase no to gua. Yɛgye dza ɔakã ato gua a ɔfa awar pii ho no to mu dɛ ɔyɛ nsɛm a tum wɔ mu na ɔkyekyer hɛn.”
Salt Lake City, Utah, Ɔbɛsɛ 6, 1890.
President Wilford Woodruff
Ne Nsɛm Ebiasa A Ɔkãe No Mu Nyiyi Mu Bi
Dza Ɔfa Mpaamukã No Ho
Ewuradze nnkɛma emi anaa nyimpa biara a ogyina hɔ dɛ Asɔr yi ne President no kwan mma onngya hom nnkɔ mfom mu. Iyi nnyi nhyehyɛɛ no mu. Ɔnnyɛ Nyankopɔn ne pɛ. Sɛ ɔba m’adwen mu dɛ mebɛyɛ dɛm a, Ewuradze beyi me efi me gyinabew no do, na dɛmara na Ɔdze bɛyɛ nyimpa biara so a ɔbɛyɛ n’adwen dɛ ɔbotwe adasamba efi Nyankopɔn ne nyia ɔda adasa hɔn ndaamba edzi kyerɛ no nye hɔn dwumadzi ho. (Asɔr no ne Wiadze Mfɛndzanan Ehyiadzi a wɔyɛ no mprɛnu wɔ afe mu no no mu dza ɔtɔ do Eduosia-biako, Dwowda, Ɔbɛsɛ 6, 1890, Salt Lake City, Utah. Wɔdze baa Deseret Evening News mu Ɔbɛsɛ 11, 1890, krataafã 2.)
Ɔmmfa ho dɛ obi tse ase anaa owu, anaa obi a wɔafrɛ no dɛ ɔnhwɛ Asɔr yi do, wɔwɔ dɛ wɔdze Otumfo Nyankopɔn ne nkenyan hwɛ do. Sɛ wɔannyɛ no wɔ dɛm kwan yi do a, wonnkotun ayɛ koraa. …
Menyaa nyikyerɛ bi a ɔnnkyeree, a no ho hia me papaapa, na mebɛkã dza Ewuradze akã akyerɛ me no akyerɛ hom. Hom mma montwe hom adwen mbra dza wɔfrɛ no mpaamukã no do. …
Ewuradze ase me dɛ mimbisa Nda a Odzi Ekyir Ahotseweefo no asɛm, na Ɔkãa kyerɛɛ mo so dɛ, sɛ wobetsie dza makã akyerɛ hɔn no a, wɔnam Nyame no Sunsum na no tum no do a, hom bɛma mbuae kor, na hɔn nyinara benya gyedzi kor wɔ dɛm asɛm yi ho.
Asɛmbisa no nye yi: Akwan no no mu mmuana na ɔwɔ dɛ Nda a Odzi Ekyir Ahotseweefo fa do—dɛ wɔbɔkɔ do awar pii, dza otsia ɔman no ne mbra na dɛm ntsi nyimpa ɔpepe eduesia kasa tsia, na wɔdze nsa bɔto Temple nyina do, na wɔnam do ayew ne nyinara, na woegyaa ayɛdze nyina a wɔyɛ wɔ mu no yɛ, dza wɔyɛ ma atseasefo na ewufo nyina, na wɔdze President a Odzi Kan na n’Apamfo, na Duebien no, na ebusua ebusua a wɔwɔ Asɔr no mu no hɔn etsir bɔkɔ akɔto efiadze, na wɔdze nsa ato nkorɔfo hɔn egyapadze do (iyinom nyina bɛma woegyaa dɛ wɔbɔwar pii); anaadɛ, ɔnam hɛn nokwardzi a yɛwɔ no wɔ fapem yi ho ntsi, yɛayɛ iyinom na yehu amandze ekyir no, dɛ yebegyaa dɛm adze yi yɛ, na yedzi ɔman no ne mbra do, dza ɔbɛma woegyaa Nkɔnhyɛfo, Asomafo na egyanom wɔ fie, ama woeetum akyerɛkyerɛ nkorɔfo no na woeetum ayɛ Asɔr no mu edwuma, na Ahotseweefo no hɔn nsa akã Temple no nyinara so, ama woeetum ayɛ Asɛmpa no ho ayɛdze no dze aama atseasefo na ewufo nyina no a?
Ewuradze nam enyido-adzehu na nyikyerɛ do daa dza sɛ yenngyaa dɛm awar pii no a obesi edzi kyerɛɛ me. Sɛ … yenngyaa dɛm adze yi yɛ a, nkorɔfo a wɔwɔ Logan temple yi mu no hɔn mu biara noho nnkɛba mfaso ama hɛn; osiandɛ wobegyaa ayɛdze nyinara yɛ wɔ Zion asaase nyinara do. Basabasayɛ bɛba Israelman nyinara mu, na wɔdze mbarimba pii bogu efiadze. Dɛm amandzehu yi bɛba Asɔr no nyinara do na wɔahyɛ hɛn ma yeegyaa dɛm adze yi yɛ. Seseiara asɛmbisa a ɔwɔ hɔ nye dɛ, ɔwɔ dɛ wodua dɛm kwan yi do gyaa dɛm adze yi yɛ anaa wodua kwan a Ewuradze ada no edzi akyerɛ hɛn no do, dɛ mbrɛ ɔbɛyɛ a hɛn nkɔnhyɛfo na Asomafo na egyanom benya fahodzi, na temple no nyinara aka nkorɔfo no nsamu, ma woeetum apon ewufo. Nyimpa pii na dɛm nkorɔfo yi agye hɔn dada efi efiadze wɔ sunsum wiadze no mu, ana wɔnkɔ do ndzi dɛm dwuma yi anaa wongyaa dzi? Iyi nye asɛmbisa a medze to Nda a Odzi Ekyir Ahotseweefo no enyim. Ɔwɔ dɛ homankasa hom bua ma hom ho. Mepɛ dɛ homankasa hom nyi ano mma hom ho. Mirinnyi ano mbom mese hom dɛ, nkyɛ mbrɛ asɔrmba nyinara hɛn gyinabew bɛyɛ pefee nye no, sɛ yɛammfa kwan a yɛfaa do no do.
Muhun dza sɛ wɔannyɛ ho biribi a nkyɛ obesi pefee wɔ enyido-adzehu mu. Dɛm sunsum yi bɛhyɛɛ mo do akyɛr. Mbom mepɛ dɛ mekã iyi: Sɛ ɔsorsor Nyankopɔn annhyɛ me dɛ menyɛ dza meyɛe no a, nkyɛ memaa temple no nyina fii hɛn nsa, nkyɛ mankasa mokɔr efiadze, na memaa nyimpa biara so kɔr hɔ bi, na ber no sõo dɛ ɔwɔ dɛ meyɛ dza wɔhyɛɛ me no, biribiara daa edzi pefee maa me. Mokɔr Ewuradze enyim, na mekyerɛɛw dza Ewuradze see me dɛ menkyerɛw no. …
Medze iyi to hom enyim ama hom aadwendwen na hom esusu ho. Ewuradze ridzi dwuma wɔ hɛn mu. (Cache Stake Ehyiadzi, Logan, Utah, Kwesida Ɔberɛfɛw 1, 1891. Wɔdze baa Deseret Weekly mu, Ɔberɛfɛw 14, 1891.)
Afei mebɛkã dza wɔdaa no edzi kyerɛɛ me na dza Nyame ne Ba no yɛɛ wɔ dɛm adze yi mu no akyerɛ hom. … Dɛ Otumfo Nyankopɔn tse ase yi, sɛ wɔannda dɛm ndzɛmba a ɔwɔ mpaamukã no mu no edzi a, nkyɛ ɔbɛba mu. Dɛm ntsi, osian dza ɔwɔ Nyame ne Ba no nankasa n’adwen mu ntsi, ɔyɛɛ ne pɛ dɛ wɔda dɛm ndzɛmba yinom edzi kyerɛ Asɔr no na wiadze. Ewuradze ahyɛ Zion ne nkyekyeree ho ɔmom. Ɔahyɛ ɔmom wɔ temple no nwiei ho. Ɔahyɛ ɔmom dɛ wɔnyɛ nkwagye ayɛdze bi mfa mma atseasefo na ewufo wɔ mbepɔw yinom hɔn mbɔnsa no mu. Na Otumfo Nyankopɔn hyɛɛ ɔmom dɛ mma Abɔnsam nnsiw ho kwan. Sɛ hom botum atse dɛm adze no ase a, ɔno nye ne saafee. (Ɔsom horow a wɔyɛɛ wɔ ber a worutu Salt Lake Temple no ahyɛ Nyankopɔn nsa no dza ɔtɔ do esia no no mu nsɛm, Ebɔbira, 1893. Tu Hyɛ Nyame Nsa Som mu Nsɛm a wɔdze akyerew-fir tsintsimii, Abakɔsɛmsie Bea, Asɔr Abakɔsɛm Asoɛe, Salt Lake City, Utah.)