1 Susuampaara dɛ Ewuradze eyi akyerɛ me dɛ m’atamfo a wɔwɔ Missouri nye ɔman yi mu nyina da ho kã mo do; na susuampaara dɛ ^amennyɛɛ biribiara na wɔkã mo do bio, na wɔkã mo do gyan, na wonnyi biribiara a ɔsɛ anaa ɔbɛn pɛrpɛrdzi anaa nokwar wɔ hɔn afa a wɔkã dze tsia me no; na susuampaara dɛ hɔn ndzeyɛɛ nyina nye dza wɔkã tõ mo do nyina yɛ akɔhwisɛm a obir tuum no, madwen ho dɛ, osian mankasã mo nkwa nye dɛm nkorɔfo yi hɔn nkwa ho ntsi, ɔsɛ dɛ mifi bea yi do hyɛber kakra. Mepɛ dɛ mekã kyerɛ hɔn a menye hɔn wɔ dwumadzi biara no dɛ, medze biribiara ahyɛ m’ananmusifo nye me nkrakyefo no nsa, hɔn na wɔbɔhwɛ ekyir ama me, na wobedzi dwuma nyina ntsɛmara na pɛpɛɛpɛr dɛ mbrɛ ɔsɛ, na wɔbɔhwɛ etua m’akaw nyina wɔ ne ber mu, na dwuma biara a obehia dɛ wodzi no wobedzi dɛ mbrɛ ɔfata. Sɛ metse dɛ ehum no a etu no abɔ adze a, mebɛsan aba hom nkyɛn bio.

2 Na ^aesian a wɔafrɛ me dɛ mundua mu no yɛ m’enyi do biribi ketseketse bi, osiandɛ nyimpa ho ^bɔtan na ebufuw yɛ adze a osi daa wɔ m’abrabɔ mu; na ne siantsir no yɛ esumasɛm ma me, gyedɛ ɔyɛ biribi a ^cwɔahyehyɛ ato hɔ ama me ansaana wɔrobɔtow wiadze ne fapem, na dɛ ɔyɛ biribi papa anaa bɔn bi ntsi, dɛ mbrɛ hom bɛfa no biara no. Homankasa hom mbu ho atsɛn nhwɛ. Nyame nyim ndzɛmba yinom nyina, dɛ oye anaa omuo. Naaso, nsu a ɔdɔ na ɔyɛ me kyɛfa a ɔwɔ dɛ mobor wɔ mu. Ne nyinara abɛyɛ me nyimpa su a ɔtɔdo ebien; na metse nkã bi, tse dɛ Paul, mehyɛ moho enyimnyam wɔ ^dabɛbrɛsɛ mu; na ndɛ da yi na m’egyanom hɔn Nyankopɔn no eyi me efi ne nyina mu, na obeyi me efi mu ofi ndɛ kɔ, na hwɛ, mibedzi m’atamfo do konyim, osiandɛ Ewuradze Nyankopɔn na ɔakã.

3 Dɛm ntsi; hom mma ahotseweefo nyina ndzi dɛw, na hɔn enyi ngye kɛse; na Israel ne ^aNyankopɔn no nye hɔn Nyankopɔn, na obosusu akatua a ɔsɛ dze egu hɔn ahyɛdofo nyina tsir do.

4 Na bio, nokwar, dɛm na Ewuradze se: Hom mma me ^atemple ho dwumadzi no, nye ndwuma a medze ama hom dɛ hom nyɛ no nkɔ do, na mma hom nngyaa mu nngu hɔ; na hom mma hom ^bmbɔdzembɔ, nye aperdzi, na abotar, nye hom ndwuma nyɛ mbɔho ebien, na hom akatua nnkɔbɔ hom. Dɔm Ewuradze na ɔse. Na sɛ ^cwɔtseetsee hom a, dɛmara so na wɔtseetsee nkɔnhyɛfo nye atseneneefo a wodzii hom enyim no. Na iyi nyina ho akatua wɔ sor.

5 Na bio, mekã hom asɛm bi a ɔfa hom ^aewufo hɔn ^benuma ho.

6 Nokwar, dɛm na Ewuradze se hom a ɔfa hom ewufo ho: Sɛ hom mu biara gyina ma ^awonuma no dze ma hom ewufo a, ɔwɔ dɛ hom ma ^bɔkyerɛwfo wɔ hɔ, hom mma nankasa mfa n’enyi ngye hom enuma no ho dase; na hom mma nankasa mfa n’aso ntsie, ama oeetum agye dase nokwar mu, Ewuradze na ɔse;

7 Ama dza hom bɛkyerɛw nyina no woeetum ^aakyerɛw wɔ sor; biribiara a hom bɛkyekyer wɔ asaase do no ^bwɔbɛkyekyer wɔ sor; biribiara a hom bɛsan wɔ asaase do no, wɔbɛsan wɔ sor;

8 Na nkyɛ medze ndzɛmba pii ^aresan aba asaase do, dza ɔfa ^basɔfodzi ho, Dɔm Ewuradze na ɔse.

9 Na bio, hom mma wɔnhyehyɛ dza ^awɔakyerɛw nyina esiado esiado, ama wɔdze eesie wɔ me temple krɔnkrɔn no mu, na wɔakaa no afebɔɔ fi ebusuasantsen kesi ebusuasantsen do, Dɔm Ewuradze na ɔse.

10 Mese ahotseweefo nyina dɛ, medze ɔpɛ kɛse pɛɛ dɛ migyina hɔ kã biribi a ɔfa ewufo enuma ho Kwesida a ɔreba yi fi bea a wogyina kasa no. Na mbom susuampaara dɛ onnyi mo tum mu dɛ mebɛyɛ dɛm ntsi, mebɛkyerɛw Ewuradze ne nsɛm ofi ber to ber, wɔ dɛm asɛm no ho, na medze abrɛ hom, nye ndzɛmba pii binom so.

11 Na seseiara medze mo nwoma a merekyerɛw no aba ewiei, osiandɛ minnyi mber pii; osiandɛ ɔtamfo no ayɛ krado, na dɛ mbrɛ Agyenkwa kãe no, ^aɔhenba a ɔwɔ dɛm wiadze yi mu no reba, na mbom onnyi biribiara wɔ mo mu.

12 Hwɛ, me mpaa a mobɔ ma Nyame nye dɛ wɔngye hom nyina nkwa. Na medze moho ama hom dɛ hom ɔsomfo wɔ Ewuradze mu, nkɔnhyɛnyi na ^aadzehunyi wɔ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo No mu.