Sang ika-30 sang Septyembre 1978, sa ika-148 nga Makaduha-sa-Tuig nga Pangkabilogan nga Komperensya sang Ang Simbahan ni Jesucristo sang mga Santos sa Ulihing mga Adlaw, ang masunod ginpresentar ni Pangulong N. Eldon Tanner, Unang Manuglaygay sa Unang Pangulohan sang Simbahan:

Sang una nga bahin sang Hunyo sini nga tuig, ang Unang Pangulohan nag-anunsyo nga ang isa ka rebelasyon nabaton ni Pangulong Spencer W. Kimball nga nagahatag sang mga pagpakamaayo sang pagkapari kag templo sa tanan nga nagakaangay nga lalaki nga mga miyembro sang Simbahan. Si Pangulong Kimball nagpangabay nga pahibal-on ko ang komperensya nga pagkatapos nga nabaton niya ining rebelasyon nga nag-abot sa iya pagkatapos sang malawig nga pagpamalandong kag pangamuyo sa sagrado nga mga kwarto sang balaan nga templo, ginpresentar niya ini sa iya mga manuglaygay nga nagbaton kag nag-aprobar sini. Dayon ginpresentar ini sa Korum sang Dose ka Apostoles nga lubos nga nag-ugyon sa pag-aprobar sini, kag dayon ginpresentar sa tanan nga Pangkabilogan nga Awtoridad nga lubos man nga nag-ugyon sa pag-aprobar sini.

Si Pangulong Kimball nagpangabay nga basahon ko na ining sulat:

Samtang nasaksihan naton ang pagsangkad sang buluhaton sang Ginuo sa bug-os nga duta, nagapasalamat kita nga ang katawhan sang madamo nga nasyon nagbaton sang mensahe sang ginpanumbalik nga ebanghelyo, kag nagbuylog sa Simbahan nga padayon nga nagadako. Bilang resulta, nag-inspirar ini sa aton upod ang kaluyag nga ipatigayon sa tagsa ka nagakaangay nga miyembro sang Simbahan ang tanan nga pribilihiyo kag mga bugay nga ginahatag sang ebanghelyo.

Bangod nakahibalo kita sang mga promisa nga ginhimo sang mga propeta kag mga pangulo sang Simbahan nga nauna sa amon nga maabot ang tion, sa wala’y katapusan nga plano sang Dios, nga tanan sang aton kauturan nga nagakaangay mahimo magbaton sang pagkapari, kag sa pagkakita namon sang katampad sinang gindumilian sang pagkapari, nagpakitluoy kami sing malawig kag sing hugot para sa ila, ang aton tampad nga mga kauturan, nga nagahinguyang sing madamo nga oras sa Naibabaw nga Kwarto sang Templo sa pagpakitluoy sa Ginuo para sa diosnon nga giya.

Ginpamatian niya ang amon mga pangamuyo, kag ginkompirma paagi sa rebelasyon nga nag-abot na ang madugay-na-ginpromisa nga adlaw nga ang tagsa ka tampad, nagakaangay nga lalaki sa Simbahan makabaton sang balaan nga pagkapari nga may gahum sa paggamit sang iya sini diosnon nga awtoridad, kag magkalipay upod sang iya mga pinalangga sa tagsa ka bugay nga nagailig halin diri lakip na ang mga bugay sang templo. Gani, tanan nga nagakaangay nga lalaki nga mga miyembro sang Simbahan mahimo ordinan sa pagkapari bisan ano pa ang rasa ukon kolor. Ginatudloan ang mga lider sang pagkapari nga sundon sing maayo ang proseso sang pag-interbyu sang tanan nga kandidato para sa ordinasyon sa Pagkapari ni Aaron ukon Melquisedec agud sigurohon nga nagatuman sila sang napahamtang nga mga pagsulundan sa pagkaangay.

Ginapahayag namon sing may kaligdong nga ang Ginuo nagpahibalo na sang iya kabubut-on para sa pagbugay sang tanan niya nga mga anak sa bilog nga kalibutan nga magapamati sa tingug sang iya awtorisado nga mga alagad, kag magahanda sang ila mga kaugalingon sa pagbaton sang tagsa ka bugay sang ebanghelyo.

Bangod ginakilala naton si Spencer W. Kimball bilang propeta, manugpanan-aw, kag manugpahayag sang rebelasyon, kag pangulo sang Ang Simbahan ni Jesucristo sang mga Santos sa Ulihing mga Adlaw, ginaproponer ko nga kita bilang isa ka kongregasyon magbaton sining rebelasyon bilang pulong kag pagbuot sang Ginuo. Ang tanan nga pabor palihog ipakita paagi sa pagbayaw sang inyo tuo nga kamot. Ang nagapamatok ipakita sa amo man nga tanda.

Ang boto agud batonon ang nasambit nga proposisyon ginpaboran sang tanan.