Seksyon 78
Rebelasyon nga ginhatag paagi kay Joseph Smith nga Propeta sa Kirtland, Ohio sang ika-1 sang Marso 1832. Sang sina nga adlaw, nagtipon ang Propeta kag iban pa nga mga lideres agud hambalan ang mga buluhaton sa Simbahan. Ini nga rebelasyon una nga nagsugo sa Propeta, kay Sidney Rigdon kag Newel K. Whitney nga maglakat sa Missouri kag mag-organisar sang mga hilikoton sang Simbahan sa negosyo kag publikasyon paagi sa pagtukod sing isa ka “firm” nga magadumala sang mga ini nga magatipon sang pundo para sa pagpahamtang sang Sion kag para sa benepisyo sang mga imol. Ini nga firm, nga ginkilala bilang ang United Firm, gin-organisar sang Abril 1832 kag gin-untat sang 1834 (tan-awa sa seksyon 82). Sang ulihi pagkatapos sang pag-untat sini, sa idalom sang direksyon ni Joseph Smith, ang pulong nga “ang mga butang parte sa balay-talagoan para sa mga imol” nagbulos sa “mga establisamento sang negosyo kag publikasyon” sa rebelasyon, kag ang tinaga nga “order” nagbulos sa tinaga nga “firm.”
1–4, Ang mga Santos dapat magtukod kag magpahamtang sang balay-talagoan; 5–12, Ang maalam nga paggamit sang ila mga pagkabutang magapadulong sa kaluwasan; 13–14, Ang Simbahan dapat mangin hilway sa dutan-on nga mga gahum; 15–16, Si Miguel (Adan) nagaalagad sa idalom sang direksyon sang Balaan (Cristo); 17–22, Bulahan ang mga tampad kay magapanubli sila sang tanan nga butang.
1 Ang Ginuo naghambal kay Joseph Smith Jr. nga nagasiling: Dungga ako, siling sang Ginuo nga inyo Dios, kamo nga gin-ordinan sa mataas nga pagkapari sang akon simbahan nga nagtipon sang inyo mga kaugalingon;
2 Kag magpamati sa laygay niya nga nag-ordin sa inyo halin sa kahitaasan, nga magahambal sa inyo mga dulunggan sang mga pulong sang kaalam agud nga ang kaluwasan mangin inyo parte sa butang nga inyo ginpresentar sa akon atubang, siling sang Ginuong Dios.
3 Kay sa pagkamatuod ginasiling ko sa inyo, ang tion nag-abot na, kag malapit na; kag tan-awa, kag yari karon, kinahanglanon nga may yara sang pag-ulolupod sang akon katawhan para sa pag-organisar kag pagpahamtang sang mga butang parte sa balay-talagoan para sa mga imol sang akon katawhan, sa sining lugar pati sa duta sang Sion—
4 Para sa isa ka permanente kag wala’y katubtuban nga pagpahamtang kag kahusayan sang akon simbahan agud isulong ang kawsa nga inyo gintinguhaan para sa kaluwasan sang tawo, kag sa himaya sang inyo Amay nga yara sa langit;
5 Agud nga mangin palareho kamo sa mga kasugtanan sang mga butang nga langitnon, huo, kag mga butang man nga dutan-on para sa pag-angkon sang mga butang nga langitnon.
6 Kay kon indi kamo palareho sa mga butang nga dutan-on indi kamo mangin palareho sa pag-angkon sang mga butang nga langitnon;
7 Kay kon luyag ninyo nga hatagan ko kamo sing isa ka lugar sa selestiyal nga kalibutan, kinahanglan ninyo ihanda ang inyo mga kaugalingon sa paghimo sang mga butang nga ginasugo ko sa inyo kag ginapangayo sa inyo.
8 Kag karon, sa pagkamatuod ini ang siling sang Ginuo, nagakaigo nga himuon ang tanan nga butang para sa akon himaya paagi sa inyo nga nag-isa sa sining united order;
9 Ukon, sa iban nga pulong, dapat magpungko sa konseho ang akon alagad nga si Newel K. Whitney kag akon alagad nga si Joseph Smith Jr., kag akon alagad nga si Sidney Rigdon upod sang mga santos nga yara sa Sion;
10 Indi gani tinguhaan ni Satanas nga ipalayo ang ila mga tagipusuon sa kamatuoran, agud nga mangin bulag sila kag indi makahangop sang mga butang nga ginhanda para sa ila.
11 Gani, isa ka kasugoan ang ginahatag ko sa inyo nga ihanda kag i-organisar ang inyo mga kaugalingon paagi sa isa ka promisa ukon wala’y katubtuban nga kasugtanan nga indi maguba.
12 Kag sia nga magabale-wala sini pagakakason sa iya palangakoan kag pagkamiyembro sa simbahan, kag itugyan sa mga pagpamintas ni Satanas tubtob sa adlaw sang pagtubos.
13 Tan-awa, ini ang pagpanghanda nga sa diin ginahanda ko kamo, kag ang pundasyon, kag ang sulundan nga akon ginahatag sa inyo nga paagi sini matuman ninyo ang mga kasugoan nga ginahatag sa inyo;
14 Agud nga paagi sa akon pagtatap, sa pihak sang pag-antos nga magatupa sa inyo, ang simbahan makatindog nga wala nagadepende sa tanan nga iban pa nga mga tinuga sa idalom sang selestiyal nga kalibutan;
15 Agud nga malab-ot ninyo ang korona nga ginhanda para sa inyo, kag himuon nga mga tagdumala sing madamo nga ginharian, siling sang Ginuong Dios, ang Balaan sang Sion, nga nagpahamtang sang mga pundasyon sang Adan-ondi-Aman;
16 Nga nagpili kay Miguel nga inyo prinsipe, kag nagpalig-on sang iya mga tiil, kag nagpahamtang sa iya sa kahitaasan, kag naghatag sa iya sang mga yabi sang kaluwasan sa idalom sang laygay kag direksyon sang Balaan nga wala sang ginsuguran sang mga adlaw ukon katapusan sang kabuhi.
17 Sa pagkamatuod, sa pagkamatuod, ginasiling ko sa inyo, magagmay kamo nga kabataan, kag indi pa ninyo mahangpan kon ano kadako ang mga bugay nga may yara ang Amay sa iya kaugalingon nga mga kamot kag ginhanda para sa inyo;
18 Kag indi ninyo mabatas ang tanan nga butang subong; apang, magkalipay kamo, kay giyahan ko kamo. Sa inyo ang ginharian kag sa inyo ang mga bugay sini, kag sa inyo ang mga manggad sang wala’y katapusan.
19 Kag sia nga nagabaton sang tanan nga butang nga may pagpasalamat pagahimuon nga mahimayaon; kag igadugang sa iya ang mga butang sining duta, bisan pa isa ka gatos ka pilo, huo, masobra pa.
20 Gani, himoa ang mga butang nga akon ginsugo sa inyo, siling sang inyo Manunubos, ang Anak nga si Aman, nga magahanda sang tanan nga butang antes niya kamo kuhaon;
21 Kay kamo ang simbahan sang Panganay, kag sabniton niya kamo sing tingob paibabaw sa panganod, kag ihatag sa tagsa ka tawo ang iya bahin.
22 Kag sia nga tampad kag mainandamon nga tulugyanan magapanubli sang tanan nga butang. Amen.