Seksyon 77
Rebelasyon nga ginhatag kay Joseph Smith nga Propeta sa Hiram, Ohio mga Marso 1832. Ang kasaysayan ni Joseph Smith nagasiling, “Parte sa paglubad sang Balaan nga mga Kasulatan, nabaton ko ang masunod nga pagpaathag sa Bugna ni San Juan.”
1–4, Ang mga kasapatan may yara sang espiritu kag magapuyo sa wala’y katapusan nga kalipayan; 5–7, Ining duta may kadugayon nga 7,000 ka tuig; 8–10, Nagkalain-lain nga mga anghel ang nagapanumbalik sang ebanghelyo kag nagaalagad sa kalibutan; 11, Ang pagpat-in sang 144,000; 12–14, Magakari si Cristo sa pagsugod sang ika-pito ka libo ka tuig; 15, Duha ka propeta ang pagabangonon sa nasyon sang mga Judio.
1 Pamangkot—Ano ang dagat nga kristal nga ginhambal ni Juan sa ika-4 nga kapitulo, kag ika-6 nga bersikulo sang Bugna?Sabat—Ini ang duta sa iya sini balaan, wala’y kamatayon, kag wala’y katapusan nga kahimtangan.
2 P. Ano ang aton dapat hangpon parte sa apat ka sapat nga ginhambal sa amo man nga bersikulo?S. Mga pulong sang paanggid ang mga ini nga gingamit sang Manugpahayag sang Rebelasyon, nga si Juan, sa paglaragway sang langit, sang paraiso sang Dios, sang kalipayan sang tawo, kag sang mga kasapatan, kag sang nagakamang nga mga sapat, kag sang mga kapispisan sang kahanginan; nga inang espirituhanon kaanggid sa sinang dutan-on; kag inang dutan-on kaanggid sa sinang espirituhanon; ang espiritu sang tawo pareho sa iya dagway, kag amo man ang espiritu sang mga kasapatan, kag sang tanan nga iban pa nga tinuga nga ginhimo sang Dios.
3 P. Nagarepresentar lamang bala ang apat ka sapat sang pat-od nga mga sapat ukon nagarepresentar bala ang mga ini sang mga klase ukon mga sahi?A. Nagarepresentar ang mga ini sang apat ka pat-od nga mga sapat, nga ginpakita kay Juan, agud magrepresentar sang himaya sang mga klase sang mga tinuga sa ila natalana nga sahi ukon kaharian sang pagtuga, sa pag-agom sang ila wala’y katapusan nga kalipayan.
4 P. Ano ang aton dapat hangpon parte sa mga mata kag pakpak nga may yara ang mga sapat?S. Ang ila mga mata nagarepresentar sang kasanag kag ihibalo, gani, puno sila sang ihibalo; kag ang ila mga pakpak nagarepresentar sang gahum nga maghulag, maghimo, kag iban pa.
5 P. Ano ang aton dapat hangpon parte sa apat kag beynte ka elder nga ginhambal ni Juan?S. Aton dapat hangpon nga ining mga elder nga nakita ni Juan mga elder nga nangin matutum sa buluhaton sang pag-alagad kag mga patay na; nga nangin miyembro sang pito ka sanga sang simbahan, kag yara na sa paraiso sang Dios.
6 P. Ano ang aton dapat hangpon parte sa libro nga nakita ni Juan, nga napat-inan sa likod sang pito ka selyo?S. Aton dapat hangpon nga nagaunod ini sang ginpahayag nga pagbuot, mga misteryo, kag mga buluhaton sang Dios; ang tinago nga mga butang sang iya pagdumala parte sining kalibutan sa sulod sang pito ka libo ka tuig sang pagpadayon sini, ukon sang dutan-on nga kadugayon sini.
7 P. Ano ang aton dapat hangpon parte sa pito ka selyo nga amo ang ginpat-in diri?S. Aton dapat hangpon nga ang una nga selyo nagaunod sang mga butang sang una nga isa ka libo ka tuig, kag ang ika-duha man sang ika-duha ka libo ka tuig, kag dalayon tubtob sa ika-pito.
8 P. Ano ang aton dapat hangpon parte sa apat ka anghel nga ginhambal sa ika-7 nga kapitulo kag ika-1 nga bersikulo sang Bugna?S. Aton dapat hangpon nga sila apat ka anghel nga ginpadala halin sa Dios, nga ginhatagan sang gahum sa apat ka bahin sang kalibutan, sa pagluwas sang kabuhi kag sa pagpatay; sila ining may wala’y katubtuban nga ebanghelyo nga igatugyan sa tagsa ka nasyon, kaliwat, lengguahe, kag katawhan; nga may gahum nga takpan ang kalangitan, nga magpain sa kabuhi, ukon magdap-ong sa mga lugar sang kadulom.
9 P. Ano ang aton dapat hangpon parte sa anghel nga nagsaka halin sa este, sa Bugna ika-7 nga kapitulo kag ika-2 nga bersikulo?S. Aton dapat hangpon nga ang anghel nga nagasaka halin sa este amo sia ang ginhatagan sang selyo sang buhi nga Dios sa dose ka tribo sang Israel; gani, nagasinggit sia sa apat ka anghel nga may yara sang wala’y katubtuban nga ebanghelyo nga nagasiling: Indi ninyo paghalitan ang duta, ni ang dagat, ukon mga kahoy tubtob nga mapat-inan naton ang mga alagad sang aton Dios sa ila mga agtang. Kag kon batonon ninyo ini, ini amo si Elias nga magaabot agud nga tiponon ang mga tribo sang Israel kag ipanumbalik ang tanan nga butang.
10 P. Sa ano nga panahon pagatumanon ang mga butang nga ginhambal sa sining kapitulo?S. Pagatumanon ang mga ini sa ika-anum ka libo ka tuig, ukon sa pagbukas sang ika-anum nga selyo.
11 P. Ano ang aton dapat hangpon parte sa pat-in sing isa ka gatos kag kwarenta’y kwatro ka libo halin sa tanan nga tribo sang Israel—dose ka libo halin sa tagsa ka tribo?S. Aton dapat hangpon nga inang mga napat-inan mga mataas nga pari nga gin-ordinan sa balaan nga paagi sang Dios, nga magdumala sang wala’y katubtuban nga ebanghelyo; kay sila inang mga gin-ordinan halin sa tagsa ka nasyon, kaliwat, lengguahe, kag katawhan paagi sa mga anghel nga ginhatagan sang gahum sa mga nasyon sa duta nga magdala sang tanan nga luyag magkari sa simbahan sang Panganay.
12 P. Ano ang aton dapat hangpon parte sa pagtunog sang mga trumpeta nga ginsambit sa ika-8 nga kapitulo sang Bugna?S. Aton dapat hangpon nga pareho nga ginhimo sang Dios ang kalibutan sa sulod sing anum ka adlaw, kag sa ika-pito nga adlaw gintapos niya ang iya buluhaton, kag ginapakabalaan ini, kag gintuga man ang tawo halin sa yab-ok sang duta, sa amo man, sa pagsugod sang ika-pito ka libo ka tuig pakabalaanon sang Ginuong Dios ang duta, kag humanon ang kaluwasan sang tawo, kag hukman ang tanan nga butang, kag tuboson ang tanan nga butang luwas sinang wala niya ginbutang sa idalom sang iya gahum, kon iya napat-inan ang tanan nga butang, tubtob sa katapusan sang tanan nga butang; kag ang pagtunog sang mga trumpeta sang pito ka anghel amo ang paghanda kag pagtapos sang iya buluhaton, sa pagsugod sang ika-pito ka libo ka tuig—ang paghanda sang alagyan antes ang tion sang iya pagkari.
13 P. San-o pagatumanon ang mga butang nga nasulat sa ika-9 nga kapitulo sang Bugna?S. Pagatumanon ang mga ini pagkatapos sang pagbukas sang ika-pito nga selyo antes sang pagkari ni Cristo.
14 P. Ano ang aton dapat hangpon parte sa gamay nga libro nga ginkaon ni Juan nga ginsambit sa ika-10 nga kapitulo sang Bugna?S. Aton dapat hangpon nga misyon ini, kag ordinansa para sa iya nga tiponon ang mga tribo sang Israel; tan-awa, ini si Elias nga pareho sa nasulat, magaabot kag magapanumbalik sang tanan nga butang.
15 P. Ano ang aton dapat hangpon parte sa duha ka saksi sa ika-onse nga kapitulo sang Bugna?S. Sila ang duha ka propeta nga pagabangonon sa nasyon sang mga Judio sa ulihing mga adlaw, sa panahon sang pagpanumbalik sang ebanghelyo, kag magapropesiya sa mga Judio pagkatapos nga matipon sila kag matukod ang siyudad sang Jerusalem sa duta sang ila mga amay.