Seksyon 72
Rebelasyon nga ginhatag paagi kay Joseph Smith nga Propeta sa Kirtland, Ohio sang ika-4 sang Disyembre 1831. Nagtipon ang pila ka mga elder kag mga miyembro agud mahibaloan ang ila mga tulumanon kag maathagan pa gid sa mga panudlo sang Simbahan. Ini nga seksyon amo ang tinipon nga tatlo ka rebelasyon nga nabaton sa amo man nga adlaw. Ginapahibalo sa mga bersikulo 1 tubtob 8 ang tulumanon ni Newel K. Whitney bilang obispo. Dayon gintawag sia kag gin-ordinan pagkatapos nga nabaton ang mga bersikulo 9 tubtob 23 nga nagahatag sing dugang nga impormasyon parte sa mga tulumanon sang obispo. Pagkatapos sini, ginpahayag ang mga bersikulo 24 tubtob 26 nga nagahatag sang mga instruksyon parte sa pagtipon sa Sion.
1–8, Ang mga elder dapat maghatag sang pagsaysay sang ila pagkatulugyanan sa obispo; 9–15, Ang obispo magadumala sang balay-talagoan kag magatatap sang mga imol kag mga nagakinahanglan; 16–26, Ang mga obispo dapat magpamatuod sang pagkaangay sang mga elder.
1 Dungga, kag pamatii ang tingug sang Ginuo, O kamo nga mga mataas nga pari sang akon simbahan nga nagtipon sang inyo mga kaugalingon, kon kay sin-o ginhatag ang ginharian kag gahum.
2 Kay sa pagkamatuod ini ang siling sang Ginuo, nagakaigo para sa akon nga magpili sing isa ka obispo para sa inyo ukon halin sa inyo para sa simbahan sa sining bahin sang ulubasan sang Ginuo.
3 Kag sa pagkamatuod nangin maalam kamo sa sining butang kay ginapangayo sang Ginuo sa kamot sang tagsa ka tulugyanan nga maghatag sang pagsaysay sang iya pagkatulugyanan sa katuigan kag wala’y katapusan.
4 Kay sia nga tampad kag mainandamon sa sini nga kabuhi ginakabig nga nagakaangay sa pagpanubli sang mga mansyon nga ginhanda sang akon Amay para sa iya.
5 Sa pagkamatuod ginasiling ko sa inyo, ang mga elder sang simbahan sa sining bahin sang akon ulubasan magahatag sang pagsaysay sang ila pagkatulugyanan sa obispo nga pagapilion ko sa sining bahin sang akon ulubasan.
6 Ining mga butang dapat nga nasulat, para ihatag sa obispo sa Sion.
7 Kag igapahibalo ang tulumanon sang obispo paagi sa mga kasugoan nga nahatag, kag sa boto sang mga nagatambong sa komperensya.
8 Kag karon, sa pagkamatuod ginasiling ko sa inyo, ang akon alagad nga si Newel K. Whitney amo ang tawo nga pagapilion kag pagaordinan sa sining gahum. Ini ang pagbuot sang Ginuo nga inyo Dios, inyo Manunubos. Kag gani amo sini. Amen.
9 Ang pulong sang Ginuo nga dugang sa ginhatag nga layi nga nagapahibalo sang tulumanon sang gin-ordinan nga obispo sa simbahan sa sining bahin sang ulubasan, sa pagkamatuod amo ini—
10 Ang magdumala sang balay-talagoan sang Ginuo; ang magbaton sang mga pundo sang simbahan sa sining bahin sang ulubasan;
11 Ang magbaton sang pagsaysay sang pagkatulugyanan sang mga elder suno sa ginsugo antes; kag magbulig sa ila mga kinahanglanon, nga amo ang magabayad sinang ila mabaton sa malab-otan sang ila inugbayad;
12 Agud makonsagrar man ini sa kaayohan sang simbahan, para sa mga imol kag mga nagakinahanglan.
13 Kag sia nga wala sang inugbayad, pagahimuon ang pagsaysay kag ihatag sa obispo sang Sion nga magabayad sang utang halin sinang igabutang sang Ginuo sa iya mga kamot.
14 Kag ang mga pinangabudlayan sang mga tampad nga nagapangabudlay sa mga butang nga espirituhanon, sa pagpalapnag sang ebanghelyo kag sang mga butang sang ginharian para sa simbahan, kag para sa kalibutan, mangin kabayaran sang utang sa obispo sa Sion;
15 Gani, magahalin ini sa simbahan kay suno sa layi ang tagsa ka tawo nga nagakadto sa Sion kinahanglan magtugyan sang tanan nga butang sa atubang sang obispo sa Sion.
16 Kag karon, sa pagkamatuod ginasiling ko sa inyo nga bangod ang tagsa ka elder sa sining bahin sang ulubasan kinahanglan nga maghatag sang pagsaysay sang iya pagkatulugyanan sa obispo sa sining bahin sang ulubasan—
17 Isa ka sertipiko halin sa hukom ukon obispo sa sining bahin sang ulubasan, pakadto sa obispo sa Sion, ang magapakita sa tagsa ka tawo nga nagakaangay, kag nagatuman sang tanan nga kinahanglanon para sa panublion, kag agud nga mabaton sia bilang isa ka maalam nga tulugyanan kag bilang isa ka tampad nga manugpangabudlay;
18 Indi gani indi sia pagbatonon sang obispo sang Sion.
19 Kag karon, sa pagkamatuod ginasiling ko sa inyo, dapat irekomendar sang simbahan ukon mga simbahan sa diin sia nagapangabudlay ang tagsa ka elder nga maghatag sang pagsaysay sa obispo sang simbahan sa sining bahin sang ulubasan agud nga sia sa iya kaugalingon kag ang iya mga pagsaysay mabaton sa tanan nga butang.
20 Kag sa liwat, ang akon mga alagad nga ginpili bilang mga tulugyanan sa mga butang parte sa mga sinulatan tuhoy sa akon simbahan may kinamatarong sa pagpangayo sang bulig sa obispo ukon mga obispo sa tanan nga butang—
21 Agud mabantala ang mga rebelasyon, kag mapalab-ot tubtob sa mga punta sang kalibutan; agud nga makakuha man sila sang mga pundo nga makabenepisyo sa simbahan sa tanan nga butang;
22 Agud sila man sa ila mga kaugalingon mabaton sa tanan nga butang, kag makabig bilang maalam nga mga tulugyanan.
23 Kag karon, tan-awa, mangin sulundan ini para sa tanan nga nagkalain-lain nga sanga sang akon simbahan sa diin man nga duta ang mga ini mapahamtang. Kag karon ginatapos ko ang akon mga ginapanghambal. Amen.
24 Pila ka pulong nga dugang sa mga layi sang ginharian parte sa mga miyembro sang simbahan—sila nga ginpili paagi sa Balaan nga Espiritu nga magkadto sa Sion, kag sila nga may oportunidad nga magkadto sa Sion—
25 Padal-a sila sa obispo sing isa ka sertipiko halin sa tatlo ka elder sang simbahan, ukon isa ka sertipiko halin sa obispo;
26 Indi gani sia nga magakadto sa duta sang Sion indi pagkabigon bilang maalam nga tulugyanan. Isa man ini ka sulundan. Amen.