Seksyon 130
Mga pagpanudlo nga ginhatag ni Joseph Smith nga Propeta parte sa nagkalain-lain nga mga topiko sa Ramus, Illinois sang ika-2 sang Abril 1843.
1–3, Ang Amay kag ang Anak mahimo magpakita sing personal sa mga tawo; 4–7, Ang mga anghel nagapuyo sa selestiyal nga kaharian; 8–9, Ang selestiyal nga duta mangin isa ka dako nga Urim kag Tumim; 10–11, Isa ka bato nga maputi ang ginahatag sa tanan nga magasulod sa selestiyal nga kalibutan; 12–17, Ang tion sang Ika-duha nga Pagkari gintago sa ihibalo sang Propeta; 18–19, Ang kaalam nga maangkon sa sining kabuhi magaupod sa aton sa Pagkabanhaw; 20–21, Tanan nga bugay nagaabot paagi sa pagtuman sang layi; 22–23, Ang Amay kag ang Anak may mga lawas nga unod kag mga tul-an.
1 Kon magpakita ang Manluluwas makita naton sia pareho nga sia gid. Makita naton nga isa sia ka tawo pareho sa aton.
2 Kag inang amo man nga pag-inupdanay nga nagaluntad sa aton diri magaluntad sa aton didto, apang pagaupdan ini sang wala’y katapusan nga himaya nga ang amo nga himaya wala pa naton subong ginaagom.
3 Juan 14:23—Ang pagpakita sang Amay kag sang Anak sa sina nga bersikulo personal nga pagpakita; kag ang ideya nga ang Amay kag ang Anak nagapuyo sa tagipusuon sang tawo sinauna nga ginapatihan sing iban nga sekta, kag sayop ini.
4 Bilang sabat sa pamangkot—Indi bala nga ang pag-isip sang tion sang Dios, tion sang anghel, tion sang propeta, kag tion sang tawo suno sa planeta nga ila ginapuy-an?
5 Ang akon sabat, Huo. Apang wala sang mga anghel nga nagaalagad sa sining duta luwas sinang nalakip subong ukon nalakip sadto anay diri.
6 Wala nagapuyo ang mga anghel sa planeta pareho sining kalibutan;
7 Apang nagapuyo sila sa presensya sang Dios, sa isa ka kaharian nga pareho sang dagat nga kristal kag kalayo kon sa diin ginapahayag ang tanan nga butang para sa ila himaya, sa nagligad, sa subong, kag sa palaabuton, kag nagapadayon sa atubang sang Ginuo.
8 Ang lugar kon sa diin ang Dios nagapuyo isa ka dako nga Urim kag Tumim.
9 Ini nga duta, sa iya sini natinloan kag wala’y kamatayon nga kahimtangan pagahimuon pareho sa kristal kag mangin isa ka Urim kag Tumim sa mga pumuluyo nga nagapuyo diri sa diin ang tanan nga tuhoy sa isa ka kubos nga ginharian ukon tanan nga ginharian nga mas manubo ang kahimtangan maathag nga makita sang sinang mga nagapuyo diri; kag ining duta mangin iya ni Cristo.
10 Dayon ang bato nga maputi nga ginsambit sa Bugna 2:17 mangin isa ka Urim kag Tumim sa tagsa ka tawo nga makabaton sini nga paagi diri ipahayag ang mga butang parte sa mga ginharian nga mas mataas ang kahimtangan;
11 Kag isa ka bato nga maputi ang ihatag sa tagsa sinang magasulod sa selestiyal nga ginharian sa diin isa ka bag-o nga ngalan ang nasulat, nga wala sing bisan sin-o ang makahibalo luwas sa iya nga magabaton sini. Ang bag-o nga ngalan ang yabi nga tinaga.
12 Nagapropesiya ako sa ngalan sang Ginuong Dios nga ang pagsugod sang mga kabudlayan nga mangin kabangdanan sing tuman nga pagpaagay sang dugo antes ang pagkari sang Anak sang Tawo matabo sa South Carolina.
13 Mahimo ini magluntad bangod sang problema sa pagpang-ulipon. Ini ginpahayag sing isa ka tingug sa akon samtang hugot ako nga nagapangamuyo parte sa topiko sang ika-25 sang Disyenbre 1832.
14 Nagapangamuyo ako sadto sing sinsero agud mahibaloan ang tion sang pagkari sang Anak sang Tawo sang mabatian ko ang isa ka tingug nga ginasulit ang masunod:
15 Joseph, anak ko, kon mabuhi ka tubtob nga mag ochenta’y-singko anyos ka, makita mo ang nawong sang Anak sang Tawo; gani dapat mangin tuman na ini sa imo, kag indi na ako paggamuha pa parte sining butang.
16 Ginbilin ako sa amo sadto nga kahimtangan, nga wala man lang napat-od kon ining pagkari nagatumod sa pagsugod sang milenyo ukon sa nagligad nga pagpakita, ukon kon mapatay ako kag gani makita ang iya nawong.
17 Nagapati ako nga ang pagkari sang Anak sang Tawo indi mangin mas temprano pa sangsa sina nga tion.
18 Kon ano man nga prinsipyo sang kaalam ang maangkon naton sa sining kabuhi magaupod sa aton sa pagkabanhaw.
19 Kag kon ang isa ka tawo makaangkon sing mas madamo nga ihibalo kag kaalam sa sining kabuhi paagi sa iya katutum kag pagkamatinumanon sangsa isa, magaangkon sia sing nagakaigo nga bentaha sa kalibutan nga magaabot.
20 May layi, indi mabawi nga mando sa langit antes pa gintuga ining kalibutan kon sa diin ang tanan nga bugay napasad—
21 Kag kon makabaton kita sing bisan ano nga bugay halin sa Dios, ini bangod sa pagtuman sinang layi kon sa diin ini napasad.
22 Ang Amay may lawas nga unod kag mga tul-an nga matandog pareho sang iya sang tawo; ang Anak amo man; apang ang Balaan nga Espiritu wala sang lawas nga unod kag mga tul-an kundi isa ka persona sang Espiritu. Kon indi amo sini, indi makapuyo ang Balaan nga Espiritu sa aton.
23 Ang isa ka tawo mahimo makabaton sang Balaan nga Espiritu, kag mahimo ini magpanaog sa iya kag indi magpabilin sa iya.