Seksyon 69
Rebelasyon nga ginhatag paagi kay Joseph Smith nga Propeta sa Hiram, Ohio sang ika-11 sang Nobyembre 1831. Ang pagtipon sang mga rebelasyon nga gintuyo para sa temprano nga pagbantala gin-aprobahan sa espesyal nga komperensya sang ika-1 tubtob ika-2 sang Nobyembre. Sang ika-3 sang Nobyembre, ang rebelasyon nga makita diri bilang seksyon 133 gindugang nga sang ulihi gintawag nga Apendise. Gintugyanan si Oliver Cowdery sang nagligad nga dal-on ang manuskrito sang natipon nga mga rebelasyon kag mga kasugoan sa Independence, Missouri para sa pag-imprinta. Dapat man niya dal-on ang kwarta nga gin-amot para sa pagpauswag sang Simbahan sa Missouri. Ini nga rebelasyon nagasugo kay John Whitmer nga updan si Oliver Cowdery kag nagasugo man kay Whitmer nga magpanglakaton kag magkolekta sang makasaysayan nga mga dokumento sa iya tawag bilang tagsulat sang kasaysayan kag tagsulat sang Simbahan.
1–2, Dapat updan ni John Whitmer si Oliver Cowdery sa Missouri; 3–8, Dapat man sia magwali kag magkolekta, magrekord, kag magsulat sang makasaysayan nga mga dokumento.
1 Dungga ako, siling sang Ginuo nga inyo Dios, para sa kaayohan sang akon alagad nga si Oliver Cowdery. Indi kinaalam para sa akon nga isalig sa iya ang mga kasugoan kag ang kwarta nga iya pagadal-on sa duta sang Sion luwas kon may mag-upod sa iya nga matuod kag masaligan.
2 Gani ako, nga Ginuo, nagasugo sa akon alagad nga si John Whitmer nga updan niya ang akon alagad nga si Oliver Cowdery;
3 Kag magapadayon man sia sa pagsulat kag paghimo sang kasaysayan sang tanan nga importante nga mga butang nga iya dapat mapanilagan kag mahibaloan parte sa akon simbahan;
4 Kag magabaton man sia sang laygay kag bulig halin sa akon alagad nga si Oliver Cowdery kag mga iban.
5 Kag amo man, ang akon mga alagad nga nagalibot sa kalibutan dapat magpadala sa duta sang Sion sang mga pagsaysay sang pagtuman nila sang ila pagkatulugyanan;
6 Kay ang duta sang Sion mangin sentro kag lugar sa pagbaton kag paghimo sang tanan sining mga butang.
7 Apang, palakta pirme ang akon alagad nga si John Whitmer sa tagsa ka lugar, kag sa tagsa ka simbahan agud nga mas mahapos sia nga makaangkon sang ihibalo—
8 Sa pagwali kag pagpaathag, pagsulat, pagkopya, pagpili, kag pag-angkon sang tanan nga butang nga para sa kaayohan sang simbahan, kag para sa henerasyon sang mga ulihing tubo nga magadalagko sa duta sang Sion, nga magapuyo diri ang tanan nga henerasyon tubtob sa wala’y katapusan. Amen.