Seksyon 62
Rebelasyon nga ginhatag paagi kay Joseph Smith nga Propeta sa pangpang sang Missouri River sa Chariton, Missouri sang ika-13 sang Agosto 1831. Sa sini nga adlaw ang Propeta kag iya grupo nga nagapakadto sa Kirtland halin sa Independence, nakasugata sing pila ka mga elder nga nagapakadto sa duta sang Sion, kag pagkatapos sing malipayon nga pagtamyawanay, nakabaton sining rebelasyon.
1–3, Ang mga testimonya nasulat sa langit; 4–9, Ang mga elder dapat magpanglakaton kag magwali suno sa ila kaalam kag suno sa paggiya sang Espiritu.
1 Tan-awa, kag dungga ninyo, O mga elder sang akon simbahan, siling sang Ginuo nga inyo Dios nga si Jesucristo, ang inyo mananabang nga nakahibalo sang kaluyahon sang tawo kag kon paano buligan sila nga natentar.
2 Kag sa pagkamatuod ang akon mga mata nagatan-aw sa sinang wala pa nakakadto sa duta sang Sion; gani, wala pa natuman ang inyo misyon.
3 Gani, bulahan kamo kay ang testimonya nga inyo ginhatag nasulat sa langit para tamdan sang mga anghel; kag nagakalipay sila sa inyo, kag napatawad na ang inyo mga sala.
4 Kag karon padayona ang inyo pagpanglakaton. Tipona ang inyo mga kaugalingon sa duta sang Sion; kag maghiwat sang miting kag magkasadya kamo, kag maghalad sang sakramento sa Labing Mataas.
5 Kag dayon makabalik kamo sa pagpamatuod, huo, bisan pa nga ulolupod ukon tagduha-duha suno sa nagakaigo para sa inyo, indi ini importante sa akon; basta mangin tampad, kag ipahayag ang maayong balita sa mga pumuluyo sang duta ukon sa mga kongregasyon sang mga malain.
6 Tan-awa, ako, nga Ginuo, nagtipon sa inyo agud nga matuman ang promisa, nga ang mga tampad sa tunga ninyo maamligan kag magkasadya sa duta sang Missouri. Ako, nga Ginuo, nagapromisa sa mga tampad kag indi makabutig.
7 Ako, nga Ginuo, handa kon ang bisan sin-o sa inyo luyag nga magsakay sa mga kabayo, ukon sa mga mula, ukon sa mga karwahe, magabaton sia sining bugay kon batonon niya ini halin sa kamot sang Ginuo nga may mapinasalamaton nga tagipusuon sa tanan nga butang.
8 Ining mga butang nagapabilin sa inyo sa paghimo suno sa kaalam kag mga direksyon sang Espiritu.
9 Tan-awa, ang ginharian sa inyo. Kag tan-awa, kag yari karon, kaupod ako pirme sang mga tampad. Kag gani amo sini. Amen.