Seksyon 123
Tulumanon sang mga Santos parte sa ila mga manughingabot suno sa ginsulat ni Joseph Smith nga Propeta samtang isa ka preso sa bilanggoan sa Liberty, Missouri. Ini nga seksyon bahin sang mensahe halin sa sulat para sa Simbahan nga napetsahan ika-20 sang Marso 1839 (tan-awa sa introduksyon sang seksyon 121).
1–6, Ang mga Santos dapat magtipon kag magbantala sang panaysayon sang ila mga pag-antos kag mga paghingabot sa ila; 7–10, Ang espiritu nga nagpahamtang sang sayop nga mga doktrina amo man ang nagapanguna sa paghingabot sa mga Santos; 11–17, Madamo nga yara sa tanan nga sekta ang magabaton pa sang kamatuoran.
1 Kag sa liwat, ginatanyag namon para sa inyo pagbinag-binag kon bala nagakaigo nga ang tanan nga santos magtipon sang ihibalo sang tanan gid nga nagkalatabo, kag mga pag-antos kag mga pag-abuso nga ginhimo sa ila sang mga tawo sang sining Estado;
2 Kag amo man sang tanan nga kahalitan sa pagkabutang kag kantidad nga ila naagom, sa ila pagkatawo kag sa ila mga kaugalingon, amo man sa ila mga propiedad;
3 Kag amo man sang mga ngalan sang tanan nga tawo nga may kahilabtanan sa mga pagpanglupig sa ila tubtob sa masarangan nila nga makuha kag mahibaloan.
4 Kag isa ka komite ang mahimo pilion sa paghibalo sining mga butang, kag sa pagkuha sang mga pahayag kag mga sinumpaan nga panaysayon; kag sa pagtipon man sang binutig nga mga balasahon nga nagalapnag;
5 Kag tanan sinang yara sa mga magasin; kag sa mga ensiklopedya, kag tanan nga binutig nga mga kasaysayan nga ginabantala, kag ginasulat, kag kon kay sin-o, kag ipresentar ang bug-os nga serye sang mga hitabo sang yawan-on nga kapintasan kag malain kag makamamatay nga mga pagpuwersa nga ginhimo sa sining katawhan—
6 Agud nga indi lamang naton mabantala sa bilog nga kalibutan kundi mapresentar ang mga ini sa lubos nila kaitom kag yawan-on nga kolor sa mga opisyales sang gobyerno, bilang katapusan nga hilikoton nga ginsugo sa aton sang aton Amay nga Langitnon antes naton lubos kag bug-os nga maangkon inang promisa nga magatawag sa iya halin sa iya palanagoan; kag amo man agud nga ang bilog nga nasyon mangin wala sang balibad antes niya ipadala ang gahum sang iya mabaskog nga butkon.
7 Kinahanglanon gid ini nga tulumanon nga utang naton sa Dios, sa mga anghel kon kay sin-o kita dal-on sa pagtindog, kag amo man sa aton mga kaugalingon, sa aton mga asawa kag mga anak nga ginpaduko sang kalisud, kasubo, kag kabalaka sa idalom sang labing makasulumpa nga kamot sang pagpamatay, pagpamintas, kag pagpanglupig nga ginsuportahan kag ginpaisog kag ginsakdag paagi sa impluwensya sinang espiritu nga nagtatak gid sang mga doktrina sang mga amay nga nagpanubli sang mga kabutigan, sa mga tagipusuon sang mga anak, kag nagpuno sang kalibutan sang kagamo, kag padayon nga nagabakod kag nagabakod, kag subong amo mismo ang ginahalinan sang tanan nga korapsyon, kag ang bilog nga kalibutan nagaugayong sa idalom sang kabug-aton sang kalainan sini.
8 Isa ini ka salsalon nga gota, isa ini ka mabakod nga panggapos; ang mga ini amo mismo ang mga posas, kag mga kadena, kag mga gapos, kag mga gaid sang impiyerno.
9 Gani, kinahanglanon gid ini nga tulumanon nga utang naton, indi lamang sa aton kaugalingon nga mga asawa kag mga anak kundi sa mga balo kag mga ilo, nga ang ila mga bana kag mga amay ginpamatay sa idalom sang salsalon nga kamot sini;
10 Nga ang amo nga madulom kag maitom nga mga kahimoan tuman na agud nga mismo ang impiyerno magkurog, kag mahadlok kag manglapsi, kag ang mga kamot sang yawa mismo magpalangurog kag maparalisa.
11 Kag amo man kinahanglanon gid ini nga tulumanon nga utang naton sa tanan nga henerasyon sang mga ulihing tubo, kag sa tanan nga putli sing tagipusuon—
12 Kay madamo pa sa duta nga yara sa tanan nga sekta, mga grupo, kag mga denominasyon nga nabulagan sang pagpatalang sang mga tawo, sa diin nagabantay sila agud magpatalang, kag wala lang nakahibalo sang kamatuoran bangod wala sila kahibalo kon diin ini pangitaon—
13 Gani, dapat magpangabudlay kita kag magsakripisyo sa aton mga kabuhi agud dal-on sa kasanag ang tanan nga natago nga mga butang sang kadulom, sa aton pagkahibalo sang mga ini; kag matuod nga ginapakita ang mga ini sang langit—
14 Dapat himuon ang mga ini nga may labing katutum.
15 Indi dapat pagkabigon sing bisan sin-o nga tawo ang mga ini bilang kubos nga mga butang; kay madamo pa ang nagahulat sa palaabuton parte sa mga santos nga nagadepende sa sining mga butang.
16 Nakahibalo kamo, mga kauturan, nga ang isa ka dako kaayo nga sakayan-dagat ginatuytuyan sang gamay kaayo nga timon sa tion sang unos paagi sa pagpahamtang sini sa nagakaigo nga posisyon nga santo sa hangin kag sa mga balod.
17 Gani, labing pinalangga nga mga kauturan, malipayon naton nga himuon ang tanan nga aton masarangan; kag dayon kabay nga maghulat kita nga may lubos nga pagsalig nga makita ang kaluwasan sang Dios, kag mapahayag ang iya butkon.