1 Tan-awa, ini ang siling sang Ginuo sa imo, William, alagad ko, huo, bisan pa ang Ginuo sang bilog nga duta, gintawag ka kag ginpili; kag pagkatapos nga mabunyagan ka paagi sa tubig nga kon himuon mo nga may mata nga tampad sa akon himaya, maangkon mo ang kapatawaran sang imo mga sala kag mabaton mo ang Balaan nga Espiritu paagi sa pagtakdong sang mga kamot;

2 Kag dayon pagaordinan ka paagi sa kamot sang akon alagad nga si Joseph Smith Jr. nga mangin isa ka elder sa sining simbahan, nga magwali sang paghinulsol kag kapatawaran sang mga sala paagi sa bunyag sa ngalan ni Jesucristo nga Anak sang buhi nga Dios.

3 Kag makaangkon ka sang gahum sa paghatag sang Balaan nga Espiritu sa tanan sa ila nga takdongan mo sang imo mga kamot kon mahinulsulon sila sa akon atubang.

4 Kag sa liwat, pagaordinan ka nga magbulig sa akon alagad nga si Oliver Cowdery sa paghimo sang buluhaton nga pag-imprinta, kag sa pagpili kag pagsulat sang mga libro para sa mga eskwelahan sa sining simbahan agud nga makabaton man ang magagmay nga kabataan sang ihibalo sa akon atubang nga nagapalipay sa akon.

5 Kag sa liwat, sa pagkamatuod ginasiling ko sa imo, kay sa sini nga rason dapat maglakat ka upod sang akon mga alagad nga sanday Joseph Smith Jr., kag Sidney Rigdon agud nga mapahamtang kamo sa duta nga inyo panublion agud himuon ining buluhaton.

6 Kag sa liwat, palakta man ang akon alagad nga si Joseph Coe upod sa ila. Igapahibalo ang mabilin pagkatapos sini suno sa akon pagbuot. Amen.