Seksyon 113
Mga sabat sa pila ka mga pamangkot parte sa mga kasulatan ni Isaias nga ginhatag ni Joseph Smith nga Propeta nga yara ukon malapit sa Far West, Missouri sang Marso 1838.
1–6, Ang puno ni Jesse, ang salingsing nga magagwa halin dira, kag ang gamot ni Jesse ginkilala; 7–10, Ang naglinapta nga mga nabilin sang Sion may kinamatarong sa pagkapari kag ginatawag nga magbalik sa Ginuo.
1 Sin-o ang puno ni Jesse nga ginahambal sa una, ika-2, ika-3, ika-4, kag ika-5 nga mga bersikulo sang ika-11nga kapitulo sang Isaias?
2 Sa pagkamatuod ini ang siling sang Ginuo: Si Cristo.
3 Ano ang salingsing nga ginahambal sa una nga bersikulo sang ika-11 nga kapitulo sang Isaias nga magahalin sa Puno ni Jesse?
4 Tan-awa, ini ang siling sang Ginuo: Isa ini ka alagad sa mga kamot ni Cristo nga bahin sang kaliwat ni Jesse kag amo man ni Efraim, ukon sang panimalay ni Jose, kon kay sin-o ginhatag ang dako nga gahum.
5 Ano ang gamot ni Jesse nga ginahambal sa ika-10 nga bersikulo sang ika-11 nga kapitulo?
6 Tan-awa, ini ang siling sang Ginuo, kaliwat ini ni Jesse, amo man ni Jose, nga tunay nga nagapanag-iya sang pagkapari, kag sang mga yabi sang ginharian bilang bandera, kag para sa pagtipon sang akon katawhan sa ulihing mga adlaw.
7 Mga pamangkot ni Elias Higbee: Ano kon sayuron ang mando sa Isaias, ika-52 nga kapitulo, ika-1 nga bersikulo, nga nagasiling: Isul-ob ang imo kusog, O Sion—kag ano nga katawhan ang ginatumod ni Isaias?
8 Nagatumod sia sa sinang pagatawgon sang Dios sa ulihing mga adlaw nga magakapot sang gahum sang pagkapari agud ibalik liwat ang Sion, kag tuboson ang Israel; kag ang pagsul-ob sang iya kusog amo ang pagsul-ob sang awtoridad sang pagkapari nga sia, ang Sion, may kinamatarong suno sa linahe; amo man ang pagbalik sa sinang gahum nga iya nadula.
9 Ano ang aton dapat hangpon sa paghukas sang Sion sang mga gapos sa iya sini liog; ika-2 nga bersikulo?
10 Aton dapat hangpon nga ang naglinapta nga mga nabilin ginlaygayan nga magbalik sa Ginuo halin sa ila pagkalaglag; nga kon himuon nila ini, ang promisa sang Ginuo amo nga magahambal sia sa ila ukon magahatag sa ila sang rebelasyon. Tan-awa sa ika-6, ika-7, kag ika-8 nga mga bersikulo. Ang mga gapos sa iya liog amo ang mga sumpa sang Dios sa iya, ukon ang mga nabilin sang Israel nga nagalinapta sa tunga sang mga Gentil.