Seksyon 27
Rebelasyon nga ginhatag kay Joseph Smith nga Propeta sa Harmony, Pennsylvania sang Agosto 1830. Sang nagahanda para sa isa ka miting sa simbahan sa diin ang sakramento sang tinapay kag alak pagapakamaayohon kag ipanagtag, naglakat si Joseph agud magkuha sang alak. Ginsugata sia sing isa ka langitnon nga mensahero kag nagbaton sining rebelasyon, sa diin ang bahin sini ginsulat sadto nga tion kag ang nabilin sang rebelasyon ginsulat sang masunod nga Septyembre. Ang tubig subong ang ginagamit imbes sang alak sa pangsakramento nga mga miting sang Simbahan.
1–4, Ang mga simbolo nga gamiton sa pag-ambit sang sakramento ginpaathag; 5–14, Si Cristo kag ang Iya mga alagad halin sa tanan nga dispensasyon magaambit sang sakramento; 15–18, Isul-ob ang bug-os nga hinganib sang Dios.
1 Magpamati sa tingug ni Jesucristo nga inyo Ginuo, inyo Dios, kag inyo Manunubos, nga ang iya pulong buhi kag gamhanan.
2 Kay, tan-awa, ginasiling ko sa inyo nga indi importante kon ano ang inyo kaunon ukon ano ang inyo imnon kon mag-ambit kamo sang sakramento, kon ginahimo ninyo ini nga may mata nga tampad sa akon himaya—kag ginadumdum sa atubang sang Amay ang akon lawas nga ginhatag para sa inyo, kag ang akon dugo nga ginpaagay para sa kapatawaran sang inyo mga sala.
3 Gani, isa ka kasugoan ang ginahatag ko sa inyo nga indi kamo magbakal sang alak ukon makahulubog nga ilimnon sang inyo mga kaaway;
4 Gani, indi kamo mag-ambit sang makahulubog nga ilimnon luwas kon ini bag-o ninyo nga ginhimo; huo, sa sini ang ginharian sang akon Amay nga pauswagon sa duta.
5 Tan-awa, kinaalam ini para sa akon; karon, indi magtingala kay ang oras magaabot nga imnon ko ang bunga sang ubas upod sa inyo sa duta, kag upod kay Moroni nga akon ginpadala sa inyo agud ipahayag ang Libro ni Mormon nga nagaunod sang kabug-osan sang akon wala’y katubtuban nga ebanghelyo, nga akon gintugyanan sang mga yabi sang kasulatan sang lipak sang Efraim;
6 Kag upod man kay Elias nga akon gintugyanan sang mga yabi sa pagpahanabo sang pagpanumbalik sang tanan nga butang nga ginhambal paagi sa baba sang tanan nga balaan nga mga propeta halin sa ginsuguran sang kalibutan, parte sa ulihing mga adlaw;
7 Kag upod man kay Juan nga anak ni Zacarias, si Zacarias nga ginbisitahan niya (ni Elias) kag ginpromisahan nga makaanak sia sing isa ka lalaki, kag ang iya ngalan dapat mangin Juan, kag mapuno sia sang espiritu ni Elias;
8 Si Juan nga ginpadala ko sa inyo, Joseph Smith Jr. kag Oliver Cowdery, mga alagad ko, agud ordinan kamo sa una nga pagkapari nga inyo nabaton, agud nga matawag kag maordinan kamo pareho kay Aaron;
9 Kag amo man kay Elias, nga akon gintugyanan sang mga yabi sang gahum sa pagliso sang mga tagipusuon sang mga amay sa mga anak, kag ang mga tagipusuon sang mga anak sa mga amay agud nga ang bilog nga duta indi sakiton sang sumpa;
10 Kag amo man kay Jose kag Jacob, kag Isaac, kag Abraham nga inyo mga amay, nga paagi sa ila ang mga promisa sang Dios nagapadayon;
11 Kag amo man kay Miguel, ukon Adan nga amay sang tanan, nga prinsipe sang tanan, nga ang dumaan sang mga adlaw;
12 Kag amo man kay Pedro, kag Santiago, kag Juan, nga akon ginpadala sa inyo, nga paagi sa ila gin-ordinan ko kamo kag ginkompirma kamo nga mangin mga apostoles, kag espesyal nga mga saksi sang akon ngalan, agud mag-angkon sang mga yabi sang inyo pag-alagad kag sang amo man nga mga butang nga ginpahayag ko sa ila;
13 Nga sa inyo gintugyan ko ang mga yabi sang akon ginharian, kag dispensasyon sang ebanghelyo para sa katapusan nga mga panahon; kag para sa kabug-osan sang mga panahon, sa diin pagatiponon ko nga mangin isa ang tanan nga butang nga yara sa langit, kag yara sa duta;
14 Kag amo man sa tanan sinang ginhatag sang akon Amay sa akon agud mangin akon katawhan.
15 Karon, ibayaw ang inyo mga tagipusuon kag magkasadya, kag wagkosi ang inyo mga balikawang, kag gamita ang bug-os ko nga hinganib agud nga mabatas ninyo ang adlaw nga malain, pagkatapos nga mahimo ninyo ang tanan-tanan, agud nga magpabilin kamo nga tampad.
16 Gani, magtindog nga nakawagkos sa inyo mga balikawang ang kamatuoran, nga nasul-ob ang taming sang pagkamatarong, kag nasoksok sa inyo mga tiil ang paghanda sang ebanghelyo sang paghidaet, sa diin ginpadala ko ang akon mga anghel agud itugyan sa inyo;
17 Kag dal-a ninyo ang taming sang pagtuo nga paagi sini mapalong ninyo ang nagadabadaba nga mga pana sang kaaway;
18 Kag gamita ang pandong sang kaluwasan kag ang espada sang akon Espiritu nga akon igabubo sa inyo, kag ang akon pulong nga ginapahayag ko sa inyo, kag mag-ugyon parte sa tanan nga butang kon ano man ang inyo pangayuon sa akon, kag mangin tampad tubtob nga magkari ako, kag sabniton kamo sing tingob paibabaw sa mga panganod agud nga kon diin ako didto man kamo. Amen.