Seksyon 28
Rebelasyon nga ginhatag paagi kay Joseph Smith nga Propeta kay Oliver Cowdery sa Fayette, New York sang Septyembre 1830. Si Hiram Page nga miyembro sang Simbahan nakaangkon sing isa ka bato kag nagpahayag nga nagabaton sia sang mga rebelasyon paagi sa bulig sining bato parte sa pagpahamtang kag pagpauswag sang Sion kag sa pagpalakat sang Simbahan. Pila ka mga miyembro ang ginpatalang sining mga pagpahayag, kag bisan si Oliver Cowdery nadala man sining mga pagpahayag. Antes gid lang sang gintalana nga komperensya, nagpamangkot sing sinsero ang Propeta sa Ginuo parte sining butang, kag nagsunod ining rebelasyon.
1–7, Si Joseph Smith nagakapot sang mga yabi sang mga misteryo, kag sia lamang ang nagabaton sang mga rebelasyon para sa Simbahan; 8–10, Si Oliver Cowdery magawali sa mga Lamanhon; 11–16, Ginpatalang ni Satanas si Hiram Page kag ginhatagan sia sang sayop nga mga rebelasyon.
1 Tan-awa, ginasiling ko sa imo Oliver nga ihatag sa imo ang ikasarang nga pamatian ka sang mga miyembro sang simbahan sa tanan nga butang nga itudlo mo sa ila paagi sa Manugpasulhay, parte sa mga rebelasyon kag mga kasugoan nga akon ginhatag.
2 Apang, tan-awa, sa pagkamatuod, sa pagkamatuod, ginasiling ko sa imo, wala sing bisan sin-o ang pagapilion sa pagbaton sang mga kasugoan kag mga rebelasyon sa sining simbahan magluwas sa akon alagad nga si Joseph Smith Jr. kay ginabaton niya ang mga ini pareho sa kay Moises.
3 Kag dapat mangin matinumanon ka sa mga butang nga ihatag ko sa iya, pareho kay Aaron, sa pagpahayag sing matutum sang mga kasugoan kag sang mga rebelasyon nga may gahum kag awtoridad sa simbahan.
4 Kag kon ginatuytuyan ka sa bisan ano nga tion sang Manugpasulhay sa pagpahayag ukon pagtudlo, ukon sa tanan nga tinion kon ginasugo ka sa paghimo sini sa simbahan, himuon mo ini.
5 Apang indi ka magsulat sang mga kasugoan sa Simbahan, kundi magsulat suno sa kaalam;
6 Kag indi ka magsugo sa iya nga nagapangulo sa imo, kag nagapangulo sang simbahan;
7 Kay ginhatagan ko sia sang mga yabi sang mga misteryo, kag sang mga rebelasyon nga ginselyohan tubtob nga magpili ako para sa ila sang lain nga magbulos sa iya.
8 Kag karon, tan-awa, ginasiling ko sa imo nga magkadto ka sa mga Lamanhon kag magwali sang akon ebanghelyo sa ila; kag kon batonon nila ang imo mga panudlo ipahamtang mo ang akon simbahan sa tunga nila; kag makabaton ka sang mga rebelasyon apang indi ini pag-isulat bilang kasugoan.
9 Kag karon, tan-awa, ginasiling ko sa imo nga wala ini ginpahayag, kag wala sang tawo ang nakahibalo kon diin pagatukoron ang siyudad sang Sion, apang ihatag ini sa palaabuton nga tion. Tan-awa, ginasiling ko sa imo nga pagatukoron ini sa mga dulonan malapit sa mga Lamanhon.
10 Indi ka maghalin sining lugar kon indi matapos ang komperensya; kag dapat pilion ang akon alagad nga si Joseph sa pagpangulo sang komperensya paagi sa boto sang mga nagatambong, kag ang ginahambal niya sa imo ipahayag mo sa komperensya.
11 Kag sa liwat, dal-on mo ang imo utod (sa simbahan) nga si Hiram Page nga kamo lamang nga duha, kag sugiri sia nga yadtong mga butang nga iya ginsulat halin sa ato nga bato indi halin sa akon kag ginapatalang sia ni Satanas;
12 Kay tan-awa, ining mga butang wala ginpili nga ihatag sa iya, kag indi man pag-ihatag ang bisan ano sa bisan sin-o nga miyembro sining simbahan nga batok sa mga kasugtanan sang simbahan.
13 Kay ang tanan nga butang dapat himuon sa husto nga paagi, kag pagkatapos nga makompirma ang pagsugot sang kadam-an sa simbahan paagi sa pangamuyo sang pagtuo.
14 Kag magbulig ka sa pag-areglar sining tanan nga butang suno sa mga kasugtanan sang simbahan antes ka magpanglakaton sa tunga sang mga Lamanhon.
15 Kag ihatag sa imo sumugod nga magalakat ka, tubtob sa tion nga magabalik ka kon ano ang imo himuon.
16 Kag kinahanglan buksan mo ang imo baba sa tanan nga tinion sa pagpahayag sang akon ebanghelyo nga may tunog sang kasadya. Amen.