Balaan ng mga Kasulatan
Doktrina kag mga Kasugtanan 87


Seksyon 87

Rebelasyon kag propesiya parte sa giyera, nga ginhatag paagi kay Joseph Smith nga Propeta nga yara ukon malapit sa Kirtland, Ohio sang ika-25 sang Disyembre 1832. Sa sini nga panahon ang mga pagbinaisay sa Estados Unidos parte sa pagpang-ulipon kag ang pag-untat sang South Carolina sa pagkolekta ukon pagbayad sang mga buwis nga ginapangayo sang gobyerno sang Estados Unidos nangin malapnagon. Ang kasaysayan ni Joseph Smith nagasiling nga “ang pagluntad sang mga kagamo sa mga nasyon” nangin “mas hayag” sa Propeta “sangsa nagligad sang nagasugod pa lang ang Simbahan sang iya sini pagpanglakaton pagwa sa kamingawan.”

1–4, Ang giyera ginpropesiya sa tunga sang mga Estado sa Norte kag mga Estado sa Sur sang Amerika; 5–8, Dalagko nga mga kalamidad ang matabo sa tanan nga pumuluyo sang duta.

1 Sa pagkamatuod, ini ang siling sang Ginuo parte sa mga giyera nga matabo sa indi madugay sumugod sa rebelyon sang South Carolina nga sa ulihi magaresulta sa kamatayon kag kalisud sing madamo nga kalag;

2 Kag magaabot ang panahon nga ang giyera igabubo sa tanan nga nasyon sumugod sa sining lugar.

3 Kay tan-awa, ang mga Estado sa Sur magabulag sa mga Estado sa Norte, kag magapangayo sang bulig ang mga Estado sa Sur sa iban pa nga mga nasyon, bisan pa sa nasyon nga ginatawag nga Great Britain, kag magapangayo ang mga Estado sa Sur sang bulig sa iban pa nga mga nasyon agud pangapinan ang ila mga kaugalingon batok sa iban nga mga nasyon; kag pagkatapos ang giyera igabubo sa tanan nga nasyon.

4 Kag matabo ini nga pagkaligad sing madamo nga adlaw, magarebelde ang mga ulipon batok sa ila mga amo nga pagatiponon kag pagahanason para sa giyera.

5 Kag matabo man ini nga ang nabilin nga mga tawo sang duta magatipon sang ila mga kaugalingon, kag mangin tuman kaakig, kag magapaantos sang mga Gentil sing tuman nga pagpaantos.

6 Kag gani, paagi sa espada kag sa pagpaagay sang dugo ang mga pumuluyo sang duta magapangalisud; kag paagi sa tiggulutom, kag pamalatian, kag linog, kag daguob sang langit, kag matalom kag masanag pa gid nga kilat, mapabatyag sa mga pumuluyo sang duta ang kaakig, kag kaugot, kag nagapina nga kamot sang isa ka Dios nga Makagagahum tubtob nga ang kahalitan nga ginmando magatapos sing lubos sang tanan nga nasyon;

7 Agud nga ang pagpakitluoy sang mga santos, kag sang dugo sang mga santos magauntat sa paglab-ot sa mga dulunggan sang Ginuo sang Kasoldadohan halin sa duta agud itimalus sila sa ila mga kaaway.

8 Gani, magtindog kamo sa balaan nga mga lugar, kag indi maisdog tubtob nga mag-abot ang adlaw sang Ginuo; kay tan-awa, magaabot ini sing madasig, siling sang Ginuo. Amen.