Seksyon 35
Rebelasyon nga ginhatag kanday Joseph Smith nga Propeta kag Sidney Rigdon nga yara ukon malapit sa Fayette, New York sang ika-7 sang Disyembre 1830. Sa sini nga tion, ang Propeta masako halos adlaw-adlaw sa paglubad sang Biblia. Ang paglubad ginsugdan sang Hunyo 1830, kag sanday Oliver Cowdery kag John Whitmer pareho nga nag-alagad bilang mga tagsulat. Bangod kay natawag na sila sa sini nga tion para sa iban nga mga tulumanon, si Sidney Rigdon gintawag sang Dios agud mag-alagad bilang tagsulat sang Propeta sa sining buluhaton (tan-awa sa bersikulo 20). Bilang introduksyon sa pagsulat sining rebelasyon, ang kasaysayan ni Joseph Smith nagasiling: “Sang Disyembre nag-abot [halin sa Ohio] si Sidney Rigdon agud magpamangkot sa Ginuo, kag kaupod niya si Edward Partridge. … Wala madugayi sang pag-abot sining duha ka kauturan sang simbahan, ang Ginuo naghambal sini.”
1–2, Paano ang mga tawo mangin mga anak sang Dios; 3–7, Si Sidney Rigdon gintawag sa pagbunyag kag sa paghatag sang Balaan nga Espiritu; 8–12, Ang mga tanda kag mga milagro ginahikot paagi sa pagtuo; 13–16, Ang mga alagad sang Ginuo magalinas sang mga nasyon paagi sa gahum sang Espiritu; 17–19, Si Joseph Smith nagakapot sang mga yabi sang mga misteryo; 20–21, Ang mga pinili makalampuwas sa adlaw sang pagkari sang Ginuo; 22–27, Ang Israel pagaluwason.
1 Magpamati sa tingug sang Ginuo nga inyo Dios, ang Alfa kag ang Omega, ang ginsuguran kag ang katapusan, nga ang iya alagyan isa ka wala’y katapusan nga nagalibot nga alagyan, nga amo man sa gihapon subong, sang kahapon, kag tubtob sa wala’y katapusan.
2 Ako si Jesucristo ang Anak sang Dios nga ginlansang para sa mga sala sang kalibutan, bisan pa para sa tanan nga nagapati sa akon ngalan agud nga mangin mga anak sila sang Dios, bisan pa agud nga mangin isa sila sa akon sa amo man nga ako isa sa Amay, sa amo man nga ang Amay isa sa akon agud nga kami mangin isa.
3 Tan-awa, sa pagkamatuod, sa pagkamatuod, ginasiling ko sa imo Sidney, alagad ko, nakita ko ikaw kag ang imo mga buhat. Nabatian ko ang imo mga pangamuyo, kag ginhanda ka para sa mas dako nga buluhaton.
4 Bulahan ka kay magahimo ka sang dalagko nga mga butang. Tan-awa ginpadala ka pareho kay Juan agud ihanda ang alagyan ko, kag ni Elias nga magakari, kag wala ka makahibalo sini.
5 Nagbunyag ka paagi sa tubig para sa paghinulsol, apang wala nila nabaton ang Balaan nga Espiritu;
6 Apang karon ginahatag ko sa imo ang kasugoan nga magbunyag ka paagi sa tubig, kag mabaton nila ang Balaan nga Espiritu paagi sa pagtakdong sang mga kamot, pareho sa mga apostoles sang dumaan nga panahon.
7 Kag matabo ini nga may dako nga buluhaton sa duta, bisan pa sa tunga sang mga Gentil kay ang ila kabuangan kag ila mga kangil-aran ipakita sa tanan nga katawhan.
8 Kay ako ang Dios, kag ang akon butkon wala ginpalip-ot; kag magapakita ako sang mga milagro, mga tanda, kag mga katilingalahan sa tanan nga nagapati sa akon ngalan.
9 Kag kon sin-o man ang magpangayo sini sa akon ngalan sa pagtuo, magatabug sila sang mga yawa; magapaayo sila sang mga nagamasakit; himuon nila nga ang mga bulag makabaton sang ila mga panulok, kag ang mga bungol nga makabati, kag ang mga apa nga makahambal, kag ang mga lupog nga makalakat.
10 Kag ang tion madasig nga magaabot nga dalagko nga mga butang ang ipahayag sa mga anak sang katawhan;
11 Apang kon wala sang pagtuo wala sing bisan ano nga ipakita magluwas sa mga kahalitan sa Babilonia, ang amo man nga nagpainom sa tanan nga nasyon sang alak sang kaakig sang Dios bangod sang iya mga sala.
12 Kag wala sing bisan sin-o nga nagahimo sang maayo magluwas sa sinang handa sa pagbaton sang kabug-osan sang akon ebanghelyo nga akon ginpadala sa sining henerasyon.
13 Karon, ginatawag ko ang mga mahuyang sang kalibutan, ang inang mga wala’y tinun-an kag ginakaugtan sa paglinas sang mga nasyon paagi sa gahum sang Espiritu;
14 Kag ang ila butkon mangin akon butkon, kag ako ang ila mangin taming kag ila panagang; kag wagkosan ko ang ila mga balikawang, kag magaaway sila sing maisog para sa akon; kag ang ila mga kaaway pagatasakon sa idalom sang ila mga tiil; kag ipatupa ko ang espada agud buligan sila, kag amligan ko sila paagi sa kalayo sang akon kaakig.
15 Kag iwali sa mga imol kag mga malulo ang ebanghelyo, kag paabuton nila ang tion sang akon pagkari kay malapit na—
16 Kag matun-an nila ang paanggid parte sa kahoy nga higuera, kay bisan pa subong malapit na ang tig-ilinit.
17 Kag ginpadala ko ang kabug-osan sang akon ebanghelyo paagi sa kamot sang akon alagad nga si Joseph; kag ginpakamaayo ko sia sa iya kahuyangan;
18 Kag ginhatag ko sa iya ang mga yabi sang misteryo sinang mga butang nga gintago, bisan pa ang mga butang nga halin pa sa pagtuga sang kalibutan, kag ang mga butang nga matabo sumugod sa sini nga tion tubtob sa tion sang akon pagkari, kon magpabilin sia nga tampad sa akon, kag kon indi, lain ang ibutang ko nga magbulos sa iya.
19 Karon, bantayi sia nga indi mag-untat ang iya pagtuo, kag ihatag ang mga ini sang Manugpasulhay, ang Balaan nga Espiritu nga nakahibalo sang tanan nga butang.
20 Kag ginahatag ko sa imo ang kasugoan—nga magsulat ka para sa iya; kag ang balaan nga mga kasulatan igahatag pareho nga ang mga ini halin sa akon mismo nga dughan para sa kaluwasan sang akon kaugalingon nga mga pinili;
21 Kay mabatian nila ang akon tingug, kag makita nila ako, kag indi sila magakatulog, kag makalampuwas sila sa adlaw sang akon pagkari; kay pagatinloan sila sa amo man nga ako matinlo.
22 Kag karon ginasiling ko sa imo, magpabilin upod sa iya, kag magapanglakaton sia nga kaupod ka; indi sia pagbayai, kag pat-od gid nga matuman ining mga butang.
23 Kag sa tion nga wala kamo nagasulat, tan-awa, pagahatagan sia sang ikasarang nga magpropesiya; kag iwali mo ang akon ebanghelyo kag magsambit sang balaan nga mga propeta agud pamatud-an ang iya mga pulong, sa bagay nga ang mga ini ipahayag sa iya.
24 Tumana ang tanan nga kasugoan kag mga kasugtanan nga may obligasyon kamo sa pagtuman; kag pauyogon ko ang kalangitan para sa inyo kaayohan, kag magakurog si Satanas kag magakasadya ang Sion sa mga bungyod kag magauswag;
25 Kag ang Israel pagaluwason sa akon kaugalingon nga natalana nga tion; kag pagatuytuyan sila paagi sa mga yabi nga akon ginhatag, kag indi na sila magtalang-talang pa.
26 Ibayaw ang inyo mga tagipusuon kag magkalipay kay nagahilapit na ang pagtubos sa inyo.
27 Indi magkahadlok, diutay nga panong, inyo ang ginharian tubtob nga magkari ako. Tan-awa, magakari ako sing madasig. Kag gani amo sini. Amen.