Balaan ng mga Kasulatan
Doktrina kag mga Kasugtanan 67


Seksyon 67

Rebelasyon nga ginhatag paagi kay Joseph Smith nga Propeta sa Hiram, Ohio, sa una nga bahin sang Nobyembre 1831. Tion sing isa ka espesyal nga komperensya, kag ginhambalan kag ginhikot ang pag-imprinta sang mga rebelasyon nga nabaton na halin sa Ginuo paagi sa Propeta (tan-awa sa introduksyon sang seksyon 1). Bag-o lang napahamtang ni Wiliam W. Phelps ang imprentahan sang Simbahan sa Independence, Missouri. Nadesisyonan sa komperensya nga ibantala ang mga rebelasyon sa Book of Commandments (Libro sang mga Kasugoan) kag mag-imprinta sing 10,000 ka kopya (nga bangod sang wala ginpaabot nga mga kabudlayan sang ulihi ginbuhinan tubtob na lang sa 3,000 ka kopya). Madamo sang mga kauturan ang nagpamatuod sing hugot nga ang mga rebelasyon nga gintipon sa sina nga tion para ibantala matuod gid suno sa ginpamatud-an sang Balaan nga Espiritu sa ila. Nasulat sa kasaysayan ni Joseph Smith nga pagkatapos nga nabaton ang rebelasyon nga nakilala bilang seksyon 1, may natabo nga mga pagsugilanon parte sa mga pulong nga gingamit sa mga rebelasyon. Nagsunod ini nga rebelasyon.

1–3, Ang Ginuo nagapamati sa mga pangamuyo sang Iya mga elder kag nagabantay sa ila; 4–9, Ginahangkat niya ang labing maalam nga tawo nga maghimo sing pareho sing labing kubos sang Iya mga rebelasyon; 10–14, Ang tampad nga mga elder papagsikon sang Espiritu kag makakita sang nawong sang Dios.

1 Tan-awa kag dungga ninyo, O mga elder sang akon simbahan nga nagtipon sang inyo mga kaugalingon, nga ang mga pangamuyo ginpamatian ko, kag ang mga tagipusuon nahibaloan ko, kag ang mga handum naglab-ot sa akon.

2 Tan-awa kag yari karon, ang akon mga mata yara sa inyo, kag ang kalangitan kag ang duta yara sa akon mga kamot, kag ang mga manggad sang wala’y katapusan akon agud ihatag.

3 Nagtinguha kamo sa pagpati nga dapat ninyo mabaton ang bugay nga gintanyag sa inyo; apang tan-awa, sa pagkamatuod ginasiling ko sa inyo nga may mga kahadlok sa inyo mga tagipusuon, kag sa pagkamatuod ini ang rason nga wala kamo nakabaton.

4 Kag karon ako, nga Ginuo, nagahatag sa inyo sang pagpamatuod sang kamatuoran sining mga kasugoan nga yara sa atubang ninyo.

5 Ang inyo mga mata yara sa akon alagad nga si Joseph Smith Jr., kag ang iya mga pulong nahibaloan ninyo, kag ang iya mga kakulangan nahibaloan ninyo; kag naghandum kamo sa inyo mga kaugalingon sang ikasarang agud nga makapabutyag kamo sing mas maayo sangsa iya mga pulong; ini nahibaloan man ninyo.

6 Karon, usisaa ang Libro sang mga Kasugoan bisan pa ang labing kubos nga yara dira, kag pilia sia nga labing maalam sa tunga ninyo nga maghimo sing pareho sina;

7 Ukon, kon may yara sa inyo nga makahimo sing isa nga pareho sina, sa amo nga rason napakamatarong kamo sa pagsiling nga wala kamo nakahibalo nga matuod ang mga ini;

8 Apang kon indi kamo makahimo sing isa nga pareho sina, pagakondenahon kamo kon indi kamo magpamatuod sang mga ini.

9 Kay nakahibalo kamo nga wala sing indi matarong sa mga ina, kag ang inang matarong nagahalin sa ibabaw, halin sa Amay sang mga kasanag.

10 Kag sa liwat, sa pagkamatuod ginasiling ko sa inyo nga pribilihiyo ninyo, kag promisa nga ginahatag ko sa inyo nga gin-ordinan sa sining pag-alagad nga kon huksan ninyo ang inyo mga kaugalingon sang mga pagkahisa kag mga kahadlok, kag magpaubos sang inyo mga kaugalingon sa akon atubang kay indi kamo tuman nga mapainubuson, pagagision ang belo kag makita ninyo ako kag makahibalo nga buhi ako—indi sa dutan-on ukon pisikal nga kaisipan kundi sa espirituhanon nga kaisipan.

11 Kay wala sang tawo nga nakakita sa Dios sa bisan ano nga tion sa unod luwas kon ginpapagsik sang Espiritu sang Dios.

12 Wala man sing bisan sin-o nga tawo nga di-espirituhanon nga makabatas sang presensya sang Dios, ukon sing bisan sin-o nga tawo nga may dutan-on nga kaisipan.

13 Indi kamo makabatas sang presensya sang Dios subong ukon sang pag-alagad sang mga anghel; gani, magpadayon nga may pagpasensya tubtob nga mangin perpekto kamo.

14 Indi pagpabalika ang inyo mga kaisipan; kag kon nagakaangay kamo, sa akon kaugalingon nga natalana nga tion makita ninyo ako kag makahibalo sinang ginhatag sa inyo paagi sa mga kamot sang akon alagad nga si Joseph Smith Jr. Amen.