Seksyon 7
Rebelasyon nga ginhatag kanday Joseph Smith nga Propeta kag Oliver Cowdery, sa Harmony, Pennsylvania sang Abril 1829, sang nagpamangkot sila nga gamit ang Urim kag Tumim kon si Juan nga hinigugma nga disipulo nagpabilin sa unod ukon napatay. Ang rebelasyon amo ang ginlubad nga bersyon sang kasulatan nga ginhimo sa panit sang sapat ni Juan kag iya gintago.
1–3, Si Juan nga Hinigugma magakabuhi tubtob nga magkari ang Ginuo; 4–8, Sanday Pedro, Santiago, kag Juan ang nagakapot sang mga yabi sang ebanghelyo.
1 Kag ang Ginuo nagsiling sa akon: Juan, akon hinigugma, ano ang ginahandum mo? Kay kon magpangayo ka sang luyag mo, igahatag ini sa imo.
2 Kag nagsiling ako sa iya: Ginuo, hatagi ako sang gahum sa kamatayon agud nga mabuhi ako kag makadala sang mga kalag sa imo.
3 Kag ang Ginuo nagsiling sa akon: Sa pagkamatuod, sa pagkamatuod, ginasiling ko sa imo, bangod ginahandum mo ini magapabilin ka tubtob nga magkari ako sa akon himaya, kag magapropesiya ka sa mga nasyon, mga kaliwat, mga lengguahe kag mga katawhan.
4 Kag sa sini nga rason ang Ginuo nagsiling kay Pedro: Kon buot ko nga magpabilin sia tubtob nga magkari ako, ano bala ina sa imo? Kay ginpangayo niya sa akon nga makadala sia sang mga kalag sa akon, apang luyag mo nga madasig ka nga makakari sa akon sa akon ginharian.
5 Ginasiling ko sa imo, Pedro, ini nangin maayo nga handum; apang ang akon hinigugma nagahandum nga maghimo pa gid sia sing dugang, ukon mas dako pa nga buluhaton sa mga tawo sangsa iya na nahimo.
6 Huo, nagbutang sia sa iya kaugalingon sing mas dako nga buluhaton; gani, himuon ko sia pareho sa nagadabadaba nga kalayo kag isa ka nagaalagad nga anghel; magaalagad sia para sinang mangin mga manunubli sang kaluwasan nga nagapuyo sa duta.
7 Kag himuon ko ikaw nga magbulig sa iya kag sa imo utod nga si Santiago; kag sa inyo nga tatlo igahatag ko ining gahum kag ang mga yabi sining pag-alagad tubtob nga magkari ako.
8 Sa pagkamatuod ginasiling ko sa inyo, magabaton kamo nga duha suno sa inyo mga handum kay nagakalipay kamo nga duha sa sinang inyo ginahandum.