1 Dungga ninyo, O mga katawhan, kag buksi ang inyo mga tagipusuon kag magpamati halin sa malayo; kag magpamati kamo nga nagatawag sang inyo mga kaugalingon nga katawhan sang Ginuo, kag pamatii ang pulong sang Ginuo kag iya pagbuot parte sa inyo.

2 Huo, sa pagkamatuod ginasiling ko, pamatii ang pulong niya nga ang kaakig nagadabadaba batok sa mga malain kag mga nagarebelde;

3 Nga iya pagbuot nga kuhaon bisan pa sila nga iya luyag nga kuhaon, kag amligan ang kabuhi nila nga iya luyag nga amligan;

4 Nga nagapauswag sa iya kaugalingon nga pagbuot kag kaluyag; kag nagaguba kon luyag niya, kag sarang nga magdap-ong sang kalag sa impiyerno.

5 Tan-awa, ako, nga Ginuo, nagahambal sa akon tingug kag dapat tumanon ini.

6 Gani, sa pagkamatuod ginasiling ko, paandama ang mga malain, kag pahadloka kag pakuroga ang mga nagarebelde; kag pahiposa ang mga wala’y pagtuo kay ang adlaw sang kaakig sang Dios magatupa sa ila pareho sang buhawi; kag ang tanan nga tinuga makahibalo nga ako ang Dios.

7 Kag sia nga nagapangita sang mga tanda makakita sang mga tanda apang indi tubtob sa kaluwasan.

8 Sa pagkamatuod, ginasiling ko sa inyo, may mga yara sa tunga ninyo nga nagapangita sang mga tanda, kag may mga yara sang amo sina bisan pa halin sa ginsuguran;

9 Apang, tan-awa, nagaabot ang pagtuo indi bangod sang mga tanda kundi ang mga tanda nagasunod sa sinang mga nagapati.

10 Huo, ang mga tanda nagaabot bangod sang pagtuo, indi bangod sang pagbuot sang tawo ukon suno sa ila luyag kundi bangod sang pagbuot sang Dios.

11 Huo, ang mga tanda nagaabot bangod sang pagtuo nga nagabunga sang gamhanan nga mga buhat kay kon wala sang pagtuo wala sang tawo nga makapalipay sa Dios; kag sa ila nga akig ang Dios wala sia nahamuot; gani, wala sia nagapakita sang mga tanda sa ila luwas sa kaakig tubtob sa ila pagkondenar.

12 Gani ako, nga Ginuo, wala nalipay sinang sa inyo nga nagpangita sang mga tanda kag mga katilingalahan agud makaangkon sang pagtuo, kag indi para sa kaayohan sang mga tawo para sa akon himaya.

13 Apang, nagahatag ako sang mga kasugoan, kag madamo ang nagsikway sang akon mga kasugoan kag wala nagtuman sang mga ini.

14 May yara sang mga nagapanginbabayi ukon nagapanginlalaki sa tunga ninyo; ang pila sa ila nagbiya sa inyo, kag ang iban nagapabilin upod sa inyo nga igapahibalo sa ulihi.

15 Paandama kag pahinulsola sila sing gilayon, indi gani magatupa ang paghukom sa ila pareho sang siod, kag mabuyagyag ang ila kabuangan, kag ang ila mga binuhatan magasunod sa ila sa mga mata sang mga tawo.

16 Kag sa pagkamatuod ginasiling ko sa inyo, pareho sa akon ginsiling sadto, sia nga nagatulok sa babayi sa pagkaibog sa iya ukon kon ang bisan sin-o magpanginbabayi sa ila mga tagipusuon, indi nila makaupod ang Espiritu kundi magapanghiwala sila sang pagtuo kag magakahadlok.

17 Karon, ako, nga Ginuo, nagsiling nga ang mga mahinadlokon, kag ang mga wala’y pagtuo, kag ang tanan nga butigon, kag kon sin-o man ang namian kag nagahimo sang butig, kag ang mga makihilawason, kag ang mga manughiwit, ang ila bahin mangin sa sinang linaw nga nagadabadaba sang kalayo kag asupre nga amo ang ika-duha nga kamatayon.

18 Sa pagkamatuod ginasiling ko nga wala sila sang mangin bahin sa una nga pagkabanhaw.

19 Kag karon tan-awa, ako, nga Ginuo, nagasiling sa inyo nga wala kamo ginapakamatarong bangod ining mga butang yara sa tunga ninyo.

20 Apang, sia nga nagapadayon sa pagtuo kag nagahimo sang akon pagbuot, ang amo man mangin madinalag-on, kag magabaton sang panublion sa duta kon mag-abot na ang adlaw sang pagbalhin sang dagway sang duta;

21 Kon ang duta magbalhin sang dagway suno sa sulundan nga ginpakita sa akon mga apostoles sa bukid; wala pa ninyo mabaton ang kabug-osan sining kasaysayan.

22 Kag karon, sa pagkamatuod ginasiling ko sa inyo nga pareho sang akon ginsiling nga ipahibalo ko ang akon pagbuot sa inyo, tan-awa, ipahibalo ko ini sa inyo indi bilang kasugoan kay madamo sang wala nagatuman sang akon mga kasugoan.

23 Apang sa iya nga nagatuman sang akon mga kasugoan ihatag ko ang mga misteryo sang akon ginharian, kag ang amo man mangin tuburan sa sulod niya sang buhi nga tubig nga nagaibwal sa kabuhi nga wala’y katubtuban.

24 Kag karon, tan-awa, ini ang pagbuot sang Ginuo nga inyo Dios parte sa iya mga santos nga dapat nila tiponon ang ila mga kaugalingon sa duta sang Sion, indi sing dali-dali agud nga wala sang ginamo nga nagadala sang peste.

25 Tan-awa, ang duta sang Sion—ako, nga Ginuo, nagakapot sini sa akon kaugalingon nga mga kamot;

26 Apang ako, nga Ginuo, nagahatag kay Cæsar sang mga butang nga iya ni Cæsar.

27 Gani, ako nga Ginuo nagasugo nga dapat ninyo baklon ang mga duta agud nga may bentaha kamo sang kalibutan, agud nga maangkon ninyo ang kinamatarong sa kalibutan, agud nga indi sila mapukaw sa kaakig.

28 Kay ginabutang ni Satanas sa ila mga tagipusuon nga maakig batok sa inyo, kag magpaagay sang inyo dugo.

29 Karon, indi maangkon ang duta sang Sion luwas nga paagi sa pagbakal ukon paagi sa dugo, indi gani wala kamo sang panublion.

30 Kag kon paagi sa pagbakal, tan-awa, bulahan kamo;

31 Kag kon paagi sa dugo, bangod ginadilian kamo sa pagpaagay sang dugo, yari karon, magasalakay ang inyo mga kaaway sa inyo, kag pagasilotan kamo sa tagsa ka siyudad, kag sa tagsa ka sinagoga, kag pila lang ang mabilin sa pagbaton sang panublion.

32 Ako, nga Ginuo, akig sa mga malain; ginadumili ko ang akon Espiritu sa mga pumuluyo sang duta.

33 Nagsumpa ako sa akon kaakig, kag nagmando sang mga giyera sa ibabaw sang duta, kag ang mga malain magapatay sang mga malain, kag ang kahadlok magapangibabaw sa tagsa ka tawo;

34 Kag haluson man nga makapalagyo ang mga santos; apang ako, nga Ginuo, kaupod nila, kag magapanaog sa langit halin sa presensya sang akon Amay kag pagasunogon ang mga malain sa di-mapalong nga kalayo.

35 Kag tan-awa, wala pa ini, apang madali na lang.

36 Karon, bangod nga ako, nga Ginuo, nagmando sining tanan nga butang sa ibabaw sang duta, pagbuot ko nga magtipon ang akon mga santos sa duta sang Sion;

37 Kag ang tagsa ka tawo dapat magdala sang pagkamatarong sa iya mga kamot kag pagkatampad sa iya mga balikawang, kag magbayaw sang tingug sang pagpaandam sa mga pumuluyo sang duta; kag magpahayag paagi sa pulong kag paagi sa pagpalagyo nga ang kahalitan matabo sa mga malain.

38 Karon, ipahamtang sa akon mga disipulo sa Kirtland, nga nagapuyo sa sining uma, ang ila dutan-on nga mga kaayohan.

39 Ipabaligya sa akon alagad nga si Titus Billings ang duta nga iya ginatatap, agud nga mangin handa sia sa magaabot nga tigpamulak sa paglakat sa duta sang Sion upod sinang mga nagapuyo sa uma, luwas sinang pagapainon ko sa akon kaugalingon nga indi dapat maglakat tubtob nga suguon ko sila.

40 Kag ipadala ang tanan nga sobra nga kwarta, indi importante sa akon kon diutay ini ukon madamo, sa duta sang Sion, sa ila nga ginpili ko nga magbaton sini.

41 Tan-awa, ako, nga Ginuo, magahatag sa akon alagad nga si Joseph Smith Jr. sang gahum nga magatugot sa iya sa paghibalo paagi sa Espiritu sinang magakadto sa duta sang Sion, kag sinang akon mga disipulo nga magapabilin.

42 Ipadayon sa akon alagad nga si Newel K. Whitney ang iya tindahan, ukon sa iban nga pulong, ang tindahan, sa malip-ot pa nga tion.

43 Apang, pahataga sia sang tanan nga kwarta nga iya mahatag agud ipadala sa duta sang Sion.

44 Tan-awa, ining mga butang yara sa iya kaugalingon nga mga kamot, pahimoa sia suno sa kaalam.

45 Sa pagkamatuod ginasiling ko, paordinan sia bilang representante sa mga disipulo nga magapabilin, kag paordinan sia sa sining gahum;

46 Kag karon bisitahi sing gilayon upod sang akon alagad nga si Oliver Cowdery ang mga sanga sang simbahan nga nagapaathag sining mga butang sa ila. Tan-awa, ini ang akon pagbuot, ang magtipon sang kwarta suno sa akon ginsugo.

47 Sia nga tampad kag nagapadayon mangin madinalag-on sa kalibutan.

48 Sia nga nagapadala sang mga manggad sa duta sang Sion magabaton sang panublion sa sining kalibutan kag sang padya pa gid sa kalibutan nga magaabot, kag ang iya mga binuhatan magasunod sa iya.

49 Huo, kag bulahan ang mga namatay nga tampad sa Ginuo sugod subong, kon magkari ang Ginuo, kag ang tanan nga daan nga mga butang magataliwan, kag ang tanan nga butang mangin bag-o, mabanhaw sila halin sa kamatayon kag indi na mapatay pagkatapos sini, kag magabaton sang panublion sa atubang sang Ginuo sa balaan nga siyudad.

50 Kag sia nga buhi kon magkari ang Ginuo, kag nagpabilin nga tampad, bulahan sia; apang, ginhatag sa iya nga mapatay sa edad sang tawo.

51 Karon, magatubo ang mga kabataan tubtob nga magtigulang sila; makalamatay ang mga tigulang; apang indi sila magatulog sa yab-ok kundi nga pagabaylohon sila sa isa lang ka pisok sang mata.

52 Karon, kay sa sini nga rason nagwali ang mga apostoles sa kalibutan sang pagkabanhaw sang mga minatay.

53 Ining mga butang ang mga butang nga kinahanglan ninyo bantayan; kag suno sa paagi sang Ginuo sa paghambal, malapit na ini, kag sa magaabot nga tion nga amo ang adlaw sang pagkari sang Anak sang Tawo.

54 Kag tubtob sa sina nga oras may yara sang mangin buang-buang nga mga birhen sa tunga sang mga maalam; kag sa sina nga oras magaabot ang kabug-osan nga pagpain sang mga matarong kag sang mga malain; kag sa sina nga adlaw magapadala ako sang akon mga anghel agud bugnoton ang mga malain kag idap-ong sila sa di-mapalong nga kalayo.

55 Kag karon tan-awa, sa pagkamatuod ginasiling ko sa inyo, ako, nga Ginuo, wala nalipay sa akon alagad nga si Sidney Rigdon; ginpakataas niya ang iya kaugalingon sa iya tagipusuon, kag indi magbaton sang laygay apang ginpasubo ang Espiritu;

56 Gani, ang iya sinulatan indi mabaton sang Ginuo, kag dapat maghimo sia sang lain; kag kon indi ini pagbatonon sang Ginuo, tan-awa, indi na sia magpabilin sa palangakoan sa diin ginpili ko sia.

57 Kag sa liwat, sa pagkamatuod ginasiling ko sa inyo, paordinan sa sining gahum inang mga nagahandum sa ila mga tagipusuon sa kalulo nga magpaandam sang mga makasasala nga maghinulsol.

58 Kay ini ang adlaw sang pagpaandam, kag indi adlaw sing madamo nga hambal. Kay ako, nga Ginuo, indi paglahog-lahogan sa ulihing mga adlaw.

59 Tan-awa, halin ako sa ibabaw, kag may gahum ako sa tanan nga yara sa idalom sini. Sa ibabaw ako sang tanan, kag sa sulod sang tanan, kag yara sa tanan kag nagausisa sang tanan nga butang, kag magaabot ang adlaw nga ang tanan nga butang mapaidalom sa akon.

60 Tan-awa, ako ang Alfa kag ang Omega nga si Jesucristo.

61 Gani, paandama ang tanan nga tawo kon paano nila dal-on ang akon ngalan sa ila mga bibig—

62 Kay tan-awa, sa pagkamatuod ginasiling ko nga madamo ang yara sa idalom sining pagkondenar nga nagagamit sang ngalan sang Ginuo, kag nagagamit sini sa wala’y kapuslanan nga wala sang awtoridad.

63 Gani, pahinulsola ang mga miyembro sang ila mga sala, kag ako, nga Ginuo, magaangkon sa ila; indi gani pagasikwayon sila.

64 Dumduma nga sagrado inang nagahalin sa ibabaw, kag kinahanglan ihambal sing may paghalong, kag may pagpugong sang Espiritu; kag sa sini wala sang pagkondenar, kag mabaton ninyo ang Espiritu paagi sa pangamuyo; gani, kon wala sini magapabilin ang pagkondenar.

65 Papangitaa ang akon mga alagad nga sanday Joseph Smith Jr., kag Sidney Rigdon sang ila puluy-an suno sang gintudlo sa ila sang Espiritu paagi sa pangamuyo.

66 Ining mga butang nagapabilin nga kinahanglan daugon sang mga miyembro paagi sa pagpaumod agud nga makabaton sila sing labaw sa tanan kag wala’y katapusan nga kabug-aton sang himaya, indi gani, mas dako nga pagkondenar. Amen.