Seksyon 17
Rebelasyon nga ginhatag paagi kay Joseph Smith nga Propeta kanday Oliver Cowdery, David Whitmer, kag Martin Harris, sa Fayette, New York sang Hunyo 1829, antes nila matan-aw ang kinurit nga mga plansa nga nagaunod sang kasulatan sang Libro ni Mormon. Nahibaloan nanday Joseph kag sang iya tagsulat nga si Oliver Cowdery halin sa ila paglubad sang mga plansa sang Libro ni Mormon nga tatlo ka espesyal nga mga saksi ang pagapilion (tan-awa sa Eter 5:2–4; 2 Nefi 11:3; 27:12). Sanday Oliver Cowdery, David Whitmer, kag Martin Harris natandog sang inspirado nga handum nga mangin ang tatlo ka espesyal nga mga saksi. Nagpamangkot ang Propeta sa Ginuo, kag ining rebelasyon ginhatag bilang sabat paagi sa Urim kag Tumim.
1–4, Paagi sa pagtuo makita sang Tatlo ka Saksi ang mga plansa kag iban pa nga sagrado nga mga butang; 5–9, Si Cristo nagapamatuod parte sa pagkadiosnon sang Libro ni Mormon.
1 Tan-awa, ginasiling ko sa inyo nga kinahanglan ninyo magsalig sa akon pulong nga sa diin kon himuon ninyo ini nga may bug-os nga tinutuyo sang tagipusuon, makita ninyo ang mga plansa, kag amo man ang taming, ang espada ni Laban, ang Urim kag Tumim nga ginhatag sa utod ni Jared sa bukid sang nagsugilanon sia sa Ginuo sing atubangay, kag ang milagroso nga mga manuggiya nga ginhatag kay Lehi samtang sa kamingawan, sa mga dulonan sang Pula nga Dagat.
2 Kag paagi sa inyo pagtuo nga makita ninyo ang mga ini bisan pa paagi sa sinang pagtuo nga iya sang mga propeta sang dumaan nga panahon.
3 Kag pagkatapos nga maangkon ninyo ang pagtuo, kag makita ang mga ini sa inyo nga mga mata, magpamatuod kamo sang mga ini paagi sa gahum sang Dios;
4 Kag ini himuon ninyo agud nga ang akon alagad nga si Joseph Smith Jr. indi magguba, agud nga mapatuman ko ang akon matarong nga mga katuyoan sa mga anak sang katawhan paagi sa sining buluhaton.
5 Kag magpamatuod kamo nga nakita ninyo ang mga ini, pareho man nga ang akon alagad nga si Joseph Smith Jr. nakakita sang mga ini; kay paagi sa akon gahum nga nakita niya ang mga ini, kag ini bangod may pagtuo sia.
6 Kag ginlubad niya ang libro bisan pa inang bahin nga ginsugo ko sa iya, kag samtang nagakabuhi ang inyo Ginuo kag inyo Dios matuod ini.
7 Karon, nabaton ninyo ang amo man nga gahum, kag ang amo man nga pagtuo, kag ang amo man nga bugay pareho sa iya;
8 Kag kon himuon ninyo ining ulihi nakon nga mga kasugoan nga ginhatag ko sa inyo, ang mga puwertahan sang impiyerno indi makadaug batok sa inyo; kay ang akon grasya nagakaigo para sa inyo, kag pagabayawon kamo sa katapusan nga adlaw.
9 Kag ako, si Jesucristo, ang inyo Ginuo kag inyo Dios, naghambal sini sa inyo agud nga mapatuman ko ang akon matarong nga mga katuyoan sa mga anak sang katawhan. Amen.