Seksyon 103
Rebelasyon nga ginhatag paagi kay Joseph Smith nga Propeta sa Kirtland, Ohio sang ika-24 sang Pebrero 1834. Ini nga rebelasyon nabaton pagkatapos sang pag-abot sa Kirtland, Ohio nanday Parley P. Pratt kag Lyman Wight nga halin sa Missouri agud makigsugilanon sa Propeta parte sa pagpaumpaw kag pagpanumbalik sang mga Santos sa ila mga duta sa Jackson County.
1–4, Kon ngaa gintugotan sang Ginuo ang mga Santos sa Jackson County nga hingabuton; 5–10, Ang mga Santos magamadinalag-on kon tumanon nila ang mga kasugoan; 11–20, Ang pagtubos sang Sion matabo paagi sa gahum, kag ang Ginuo magauna sa Iya katawhan; 21–28, Ang mga Santos dapat magtipon sa Sion, kag inang mga maghalad sang ila kabuhi makita nila ini liwat; 29–40, Madamo nga kauturan sang simbahan ang gintawag sa pagpahamtang sang Guban sang Sion kag pagkadto sa Sion; ginpromisahan sila sang kadalag-an kon matutum sila.
1 Sa pagkamatuod ginasiling ko sa inyo, mga abyan ko, tan-awa, ihatag ko sa inyo ang isa ka rebelasyon kag kasugoan agud mahibaloan ninyo kon paano maggawi sa pagtuman sang inyo mga obligasyon parte sa kaluwasan kag pagtubos sang inyo mga kauturan nga naglinapta sa duta sang Sion;
2 Nga gintabug kag ginsakit sang mga kamot sang akon mga kaaway kon kay sin-o ko ibubo ang akon kaakig nga wala sing pugong-pugong sa akon kaugalingon nga panahon.
3 Kay gintugotan ko sila tubtob sa sini nga tion agud mapuno nila ang talaksan sang ila mga kalainan, agud mapuno ang ila ilimnan;
4 Kag agud inang nagatawag sang ila mga kaugalingon sa akon ngalan mapinahan sa malip-ot nga tion sing grabe kag mabug-at nga silot bangod wala sila nagpamati sing lubos sa mga pagsulundan kag mga kasugoan nga ginhatag ko sa ila.
5 Apang sa pagkamatuod ginasiling ko sa inyo nga nagmando ako sing isa ka mando nga matuman sang akon katawhan kon magpamati sila sumugod sini nga tion sa laygay nga ako, nga Ginuo nga ila Dios, magahatag sa ila.
6 Tan-awa, magasugod sila nga magmadinalag-on batok sa akon mga kaaway sumugod sini nga tion kay ginmando ko ini.
7 Kag paagi sa maid-id nga pagtuman sang tanan nga pulong nga ihambal ko, nga Ginuo nga ila Dios, sa ila, padayon sila nga magamadinalag-on tubtob nga ang mga ginharian sang kalibutan matasak sa idalom sang akon mga tiil, kag ang kalibutan mahatag sa mga santos agud angkonon ini tubtob sa wala’y katapusan.
8 Apang kon indi nila pagtumanon ang akon mga kasugoan, kag indi maid-id sa pagtuman sang tanan ko nga pulong, magamadinalag-on ang mga ginharian sang kalibutan batok sa ila.
9 Kay ginpahamtang sila nga mangin kasanag sa kalibutan, kag mangin mga manluluwas sang katawhan;
10 Kag kon indi sila mga manluluwas sang katawhan, pareho sila sa asin nga nadulaan sang iya sabor, kag wala na sing pulos kundi ipilak sa gwa kag pagatasakon sang mga tiil sang mga tawo.
11 Apang sa pagkamatuod ginasiling ko sa inyo, nagmando ako nga ang inyo mga kauturan nga naglinapta magabalik sa mga duta nga ila mga panublion, kag magatukod liwat sang nalaglag nga mga lugar sang Sion.
12 Kay pagkatapos sing madamo nga pag-antos, pareho sa akon ginsiling sa inyo sa una nga kasugoan, magaabot ang bugay.
13 Tan-awa, ini ang bugay nga ginpromisa ko pagkatapos sang inyo mga pag-antos, kag mga pag-antos sang inyo mga kauturan—ang inyo pagtubos, kag ang pagtubos sang inyo mga kauturan, bisan pa ang ila pagpanumbalik sa duta sang Sion nga ipahamtang, nga indi na paglaglagon pa.
14 Apang, kon higkoan nila ang ila mga panublion pagalaglagon sila; kay indi ko sila pagkaluoyan kon higkoan nila ang ila mga panublion.
15 Tan-awa, ginasiling ko sa inyo, ang pagtubos sang Sion kinahanglanon nga matabo paagi sa gahum;
16 Gani, magabangon ako sa akon katawhan sing isa ka tawo nga magadumala sa ila pareho sa pagdumala ni Moises sa mga anak sang Israel.
17 Kay mga anak kamo sang Israel, kag kaliwatan ni Abraham, kag kinahanglanon kamo ipagwa halin sa pagkaulipon paagi sa gahum, kag sa nakauntay nga butkon.
18 Kag pareho nga ang inyo mga amay gingiyahan sang una, amo man ang pagtubos sang Sion.
19 Gani, indi dapat magluya ang inyo mga tagipusuon kay wala ko ginasiling sa inyo ang pareho sang akon ginsiling sa inyo mga amay: Ang akon anghel magauna sa inyo, apang indi ang akon presensya.
20 Apang ginasiling ko sa inyo: Ang akon mga anghel magauna sa inyo, kag amo man ang akon presensya, kag sa ulihi maangkon ninyo ang maayo nga duta.
21 Sa pagkamatuod, sa pagkamatuod ginasiling ko sa inyo nga ang akon alagad nga si Joseph Smith Jr. ang tawo nga ginpaanggid ko ang alagad kon kay sin-o naghambal ang Ginuo sang ulubasan sa paanggid nga ginhatag ko sa inyo.
22 Gani, pahambala ang akon alagad nga si Joseph Smith Jr. sa puwersa sang akon panimalay, sa akon mga pamatan-on kag sa mga medyo may edad—Tipona ang inyo mga kaugalingon sa duta sang Sion, sa duta nga ginbakal sang Ginuo sang kwarta nga ginkonsagrar sa iya.
23 Kag padal-a ang tanan nga simbahan sang maalam nga mga tawo upod ang ila nakolekta nga mga kwarta, kag magbakal sang mga duta pareho sang akon ginsugo sa ila.
24 Kag kon ang akon mga kaaway magsalakay batok sa inyo agud pahalinon kamo sa akon maayo nga duta nga ginkonsagrar ko nga mangin duta sang Sion, bisan pa sa inyo kaugalingon nga mga duta pagkatapos sining mga pagsaksi nga gindala ninyo sa akon batok sa ila, pagasumpaon ninyo sila;
25 Kag kon sin-o man ang inyo isumpa, pagasumpaon ko, kag itimalus ninyo ako sa akon mga kaaway.
26 Kag ang akon presensya mangin kaupod ninyo bisan pa sa pagtimalus sa akon batok sa akon mga kaaway tubtob sa ika-tatlo kag ika-apat nga henerasyon sinang naugot sa akon.
27 Wala sang tawo nga dapat mahadlok nga maghalad sang iya kabuhi para sa akon; kay kon sin-o man ang maghatag sang iya kabuhi para sa akon makita niya ini liwat.
28 Kag kon sin-o man ang indi handa nga maghalad sang iya kabuhi para sa akon indi akon disipulo.
29 Pagbuot ko nga ang akon alagad nga si Sidney Rigdon magbayaw sang iya tingug sa mga kongregasyon sa mga rehiyon sa este sa paghanda sang mga simbahan agud tumanon ang mga kasugoan nga ginhatag ko sa ila parte sa pagpanumbalik kag pagtubos sang Sion.
30 Pagbuot ko nga ang akon alagad nga si Parley P. Pratt kag ang akon alagad nga si Lyman Wight indi dapat magbalik sa duta sang ila mga kauturan sa simbahan tubtob nga may yara sila sang mga kaupdanan nga magkadto sa duta sang Sion nga tagpulo-pulo, ukon tagbeynte-beynte, ukon tagsulusingkwenta, ukon tagsien-sien tubtob nga makalab-ot sila sa kadamuon nga lima ka gatos nga puwersa sang akon panimalay.
31 Tan-awa, ini ang akon pagbuot; magpangayo kag magabaton kamo; apang wala pirme ginahimo sang mga tawo ang akon pagbuot.
32 Gani, kon indi kamo makakuha sing lima ka gatos, tinguhai sing matutum agud basi makakuha kamo sing tatlo ka gatos.
33 Kag kon indi kamo makakuha sing tatlo ka gatos, tinguhai sing matutum agud basi makakuha kamo sing isa ka gatos.
34 Apang sa pagkamatuod ginasiling ko sa inyo, isa ka kasugoan ang ginahatag ko sa inyo nga indi kamo magkadto sa duta sang Sion tubtob nga makakuha kamo sing isa ka gatos nga puwersa sang akon panimalay nga makaupod ninyo sa pagkadto sa duta sang Sion.
35 Gani, pareho sang akon ginsiling sa inyo, magpangayo kag magabaton kamo; magpangamuyo sing sinsero nga basi ang akon alagad nga si Joseph Smith Jr. makaupod ninyo, kag magpangulo sa tunga sang akon katawhan, kag magpahamtang sang akon ginharian sa ginkonsagrar nga duta, kag magpahamtang sang mga anak sang Sion sa mga layi kag mga kasugoan nga ginhatag kag igahatag pa sa inyo.
36 Ang tanan nga kadalag-an kag himaya igapahanabo sa inyo paagi sa inyo katutum, katampad, kag mga pangamuyo sang pagtuo.
37 Palakta ang akon alagad nga si Parley P. Pratt upod sang akon alagad nga si Joseph Smith Jr.
38 Palakta ang akon alagad nga si Lyman Wight upod sang akon alagad nga si Sidney Rigdon.
39 Palakta ang akon alagad nga si Hyrum Smith upod sang akon alagad nga si Frederick G. Williams.
40 Palakta ang akon alagad nga si Orson Hyde upod sang akon alagad nga si Orson Pratt kon sa diin man ang akon alagad nga si Joseph Smith Jr. magsugo sa ila sa pagtuman sining mga kasugoan nga ginhatag ko sa inyo, kag itugyan ang iban pa nga butang sa akon mga kamot. Kag gani amo sini. Amen.