Seksyon 118
Rebelasyon nga ginhatag paagi kay Joseph Smith nga Propeta sa Far West, Missouri sang ika-8 sang Hulyo 1838 bilang sabat sa pangamuyo, “Ipakita sa amon ang imo pagbuot, O Ginuo, parte sa Dose.”
1–3, Ang Ginuo magapatigayon para sa mga pamilya sang Dose; 4–6, Ang mga bakante sa Dose ginbuslan.
1 Sa pagkamatuod, ini ang siling sang Ginuo: Maghiwat gilayon sing isa ka komperensya; i-organisar ang Dose; kag pilia ang mga tawo nga magbulos sa sinang mga nalaglag.
2 Tugoti ang akon alagad nga si Thomas nga magpabilin sa pila ka tinion sa duta sang Sion agud ipahayag ang akon pulong.
3 Papadayona ang mga nabilin sa pagwali sumugod sa sina nga oras, kag kon himuon nila ini sa lubos nga pagpakaubos sang tagipusuon, sa pagkalulo kag pagkamapainubuson, kag pagkamainantuson, ako, nga Ginuo, nagapromisa sa ila nga magapatigayon ako para sa ila mga pamilya; kag ang mabungahon nga puwertahan pagabuksan para sa ila sugod subong.
4 Kag sa madason nga tigpamulak palakta sila agud magtabok sa dako nga mga katubigan, kag didto ipahayag ang akon ebanghelyo, ang kabug-osan sini, kag magpamatuod sang akon ngalan.
5 Dapat magpaalam sila sa akon mga santos sa siyudad sang Far West sa madason nga ika-beynte sais nga adlaw sang Abril sa lugar nga pagatukoran sang akon balay, siling sang Ginuo.
6 Pilia ang akon alagad nga si John Taylor, kag amo man ang akon alagad nga si John E. Page, kag amo man ang akon alagad nga si Wilford Woodruff, kag amo man ang akon alagad nga si Willard Richards nga magbulos sinang mga nalaglag, kag pormal nga pahibal-on sang pagkapili sa ila.